විදෙස් ගමන් බලපත්‍ර ලබාගැනීම සඳහා පසුගිය දිනවල පැවති දිගු පෝලිම් පසුපස මාෆියාවක් ක්‍රියාත්මකවී ඇති බව
මහජන ආරක්ෂක අමාත්‍ය ටිරාන් අලස් පවසයි.
ජාතික ජන බලවේගයේ පාර්ලිමේන්තු මන්ත්‍රී විජිත හේරත් සිදුකළ චෝදනාවකට ප්‍රතිචාර දක්වමින් අමාත්‍යවරයා මේ බව පැවසුවේ, මහජන ආරක්ෂක අමාත්‍යංශයේ (09) පස්වරුවේ පැවති මාධ්‍ය හමුවකදීය.
ආගමන විගමන දෙපාර්තමේන්තුව සතු නව හිස් විදෙස් ගමන් බලපත්‍ර හිඟවීම හේතුවෙන් එහි කාර්යාල ඉදිරිපිට පසුගිය දිනවල දිගු පෝලිම් දක්නට ලැබුණි.
ජාතික ජන බලවේගය අද ප්‍රවෘත්ති සාකච්ඡාවක් පවත්වමින් මෙම පාස්පෝට් ගැටලුව සම්බන්ධයෙන් රජයට චෝදනාවක් එල්ල කළේය.
එම චෝදනාව සම්බන්ධයෙන් අදහස් දැක්වූ විෂය භාර අමාත්‍ය ටිරාන් අලස් ,
"පෝලිම් හැදුණේ පාස්පොට් එකේ අඩුකම නිසා නෙමෙයි. අපි ඉස්සරවෙලා පටන් ගත්තේ ඔන්ලයින් එපොයිමන්ට්. අපි රෑ 12ට ඔන්ලයින් එපොයිමන්ට් එක ඕපන් කළා. මිනිත්තු 15ක් 20ක් යනකොට ඔක්කොම එපොයිමන්ට් ඉවරයි. එක කට්ටියක් සිම් පත් 100ක් පමණ අරගෙන එවලෙම එපොයිමන්ට් ටික අරගන්නවා. ඒ එපොයිමන්ට් එන අහිංසක මිනිස්සුන්ට විකුණනවා රුපියල් 45,000කට. ඒක මම දැනගත් වහාම ඔන්ලයින් එක නවත්වන්න කිව්වා. නවත්තලා පෝලිමේ එන්න අරින්න, එතකොටත් පෝලිම හැදෙනවා ඉවරයක් නැහැ. ඊට පස්සේ පෝලිමේ ඉඳලා ඒක විකුණනවා රුපියල් 20,000ට 25,000ට. ඊට පස්සේ තමයි මම තීරණයක් ගත්තේ පෝලිම භාරගන්න කිව්වා පොලීසියට. පොලිසියට කරන ක්‍රමය කිව්වා ඒ දිනයෙන් පස්සේ දැන් 10.30, 11.30 වනවිට පෝලිම් ඉවරයි. පාස්පෝට් අවුලට ආගමන විගමන ලොක්කෝ පෝලන්තයට ගියා කිව්වා. මේවා අමූලික බොරු. දැන් පාස්පෝට් චීෆ් මෙතන ඉන්නවා."
විසදුමක් ලැබෙන තෙක් ඔන් අරයිවල් වීසා ක්‍රියාත්මකයි
වීසා ගැටලුවට අධිකරණ විසදුමක් ලැබෙන තෙක් දිවයිනට පැමිණි පසු (ඔන් අරයිවල්) වීසා නිකුත් කිරීමේ ක්‍රමය ක්‍රියාත්මක කරන බව මහජන ආරක්ෂක අමාත්‍ය ටිරාන් අලස් පැවැසීය.
ඒ සදහා ගුවන් තොටුපොළේ වීසා කවුන්ටර් 12 ක් වැඩි කර ඇති බව ඇමතිවරයා කියා සිටියේය.
ගුවන් යානා කිහිපයක් එකවර පැමිණීමේදී වීසා නිකුත් කරනු ලබන කවුන්ටර්වල පෝලිම් ඇතිවන අතර මෙම තත්ත්වය අවම කරගැනීම සදහා පවතින කවුටර්වලට අමතරව නව කවුන්ටර් 12 ක් ස්ථාපිත කළ බවත් ඇමතිවරයා කීවේය.
වී.එෆ්.එස් ග්ලෝබල් සමාගම මගින් වීසා නිකුත් කිරීමේ ක්‍රියාවලිය අධිකරණය විසින් වාරණය කිරීම හේතුවෙන් විදේශිකයන් දිවයිනට පැමිණීමෙන් පසු දින 30 කට හෝ දින 60 කට වීසා ලබාදීමට කටයුතු කරන බව ඇමතිවරයා කිවේය.
වී.එෆ්.එස් ග්ලෝබල් සමාගම හරහා විසා නිකුත් කිරීම ක්‍රියාත්මක කළ අවසන් මාසයේදී පමණක් සංචාරකයින් එක්ලක්ෂ අසූ නව දහසක් පැමිණි බවත් එම ක්‍රමවේදය වාරණයවීම ගැන හෝටල් ව්‍යාපාරිකයින් රැසක්ම කනස්සල්ල පළකරන බවත් ඇමතිවරයා කීවේය.
එසේම අධිකරණ නියෝගය සම්බන්ධයෙන් අධිකරණය හමුවේ කරුණු පැහැදිලි කරන බවද හෙතෙම කීවේය.
