හොඳ කණ්ඩායමක් සිටියත් නායකයා දක්ෂයෙක් නොවේ නම් එවැනි කණ්ඩායමකට ජයග්‍රහණ පත්පත් කර ගැනීම අසිරුබව
කෑගල්ල දිස්ත්‍රීක් පාර්ලිමේන්තු මන්ත්‍රී කනක හේරත් රාජ්‍ය අමාත්‍යවරයා පැවසිය.
“එදා අවුරුදු දෙකකට කලින් පෝලිම් නැතිකරන්න බෑ කියපු, IMF යන්න බෑ කියපු රටේ ආර්ථිකය ගොඩගන්න බෑ කියපු කණ්ඩායම හොඳම කණ්ඩායම ද ? බෑ කියපු නායකයො අපිත් එක්ක නැහැ.” යයි රාජ්‍ය අමාත්‍ය කනක හේරත් එබව කියා සිටියේ, රුවන්වැල්ල නගරයේ සැප්තැම්බර් 09 දා පැවති ''පුළුවන් ශ්‍රී ලංකා'' ජනරැළිය අමතමිනි.
අද මේ වේදිකාවේ සිටින සියලුම දෙනා “පුළුවන්” කියන මතයේ සිටින කණ්ඩායමක් බවත් අභියෝගවලින් පැනගිය කණ්ඩායම සිටින්නේ විපක්ෂයේ බවත් ඔහු තවදුරටත් මෙහිදී ප්‍රකාශ කලේය.
එමෙන්ම රාජ්‍ය සේවකයන්ගේ තැපැල් ඡන්දයෙන් පසුව විපක්ෂය මේ වන විට පසුබැස ගොස් සිටින බවත්, ජනාධිපති රනිල් වික්‍රමසිංහ ක්‍රියාත්මක කර තිබෙන වැඩපිළිවෙළ ඉදිරියට ගෙන ගියහොත් ශක්තිමත් රටක් බිහිවීම වළක්වන්න බැරි බවත් ඔහු අවධාරණය කර සිටියේය.
“ඔය කියන කණ්ඩායම ජනාධිපතිතුමා එක්ක කාළයක් හිටියා, ඒ වුනාට ජනාධිපතිතුමාගෙන් රටට වැඩක් ගන්න ඔය කණ්ඩායමට බැරි වුණා. දැන් ජනාධිපතිතුමා එක්ක ඉන්නෙ එතුමාගෙන් වැඩක් ගන්න පුලුවන් කණ්ඩායමක්.”
රටේ අනාගතය, වැඩ පුලුවන් කණ්ඩායමකට භාරදීමට ගෞරවණීය ඡන්දදායකයින් කටයුතු කරන බව තමන්ට විස්වාස බව සඳහන් කල අමාත්‍යවරයා, ඒ නිසාම ජනාධිපති රනිල් වික්‍රමසිංහ සැප්තැම්බර් 22 උදේ සියයට 50% නියත චන්ද ප්‍රතිශතයක් ලබාගනිමින් ජනාධිපතිවරණය ජයග්‍රහණය කරන බවත් ඔහු මෙහිදී ප්‍රකාශ කළේය.
මහා සංඝරත්නය ප්‍රමුඛ සෙසු අන්‍යාගමික නායකයන් ද උතුරු මැද පළාත් ආණ්ඩුකාර මහිපාල හේරත්, රාජ්‍ය අමාත්‍ය රංජිත් සියඹලාපිටිය, පාර්ලිමේන්තු මන්ත්‍රී උදයකාන්ත ගුණතිලක, පාර්ලිමේන්තු මන්ත්‍රී රාජිකා වික්‍රමසිංහ, පාර්ලිමේන්තු මන්ත්‍රී දුෂ්මන්ත මිත්‍රපාල, පාර්ලිමේන්තු මන්ත්‍රී සුදත් මංජුල, සබරගමුව පළාත් ආණ්ඩුකාර නවීන් දිසානායක, අමාත්‍ය ප්‍රසන්න රණතුංග, පාර්ලිමේන්තු මන්ත්‍රී එස්. එම්. එම්. මුෂාරෆ්, හිටපු අමාත්‍ය චම්පිකා ප්‍රේමදාස, හිටපු පාර්ලිමේන්තු මන්ත්‍රීවරුන් වන තලතා අතුකෝරල, සන්දිත් සමරසිංහ, හිටපු පළාත් සභා අමාත්‍ය ශ්‍රී ලාල් වික්‍රමසිංහ, දෙහිඕවිට ප්‍රාදේශීය සභාවේ හිටපු සභාපති අමිල රුවන්, ලංකා කම්කරු කොංග්‍රසයේ උප සභාපති අන්නමලේ බාස්කරන්, දෙහිඕවිට සජබ කණ්ඩායම් නායක සෙස්ටස් අර්සකුලරත්න ඇතුළු ප්‍රාදේශීය දේශපාලන නායකයන් පිරිසක් ද මෙම අවස්ථාවට එක්ව සිටියහ.
