සමගි ජන බලවේගය රටේ දුප්පත්කම තුරන් කිරීමේ නව වැඩසටහනකට මුල පුරන බව විපක්ෂ නායක සජිත් ප්‍රේමදාස පැවසී ය.
විපක්ෂ නායකවරයා මෙලෙස පැවසුවේ අද (13) සමෘද්ධි සංවර්ධන නිලධාරින් සමග කොළඹ දී පැවැති සමුළුවක දී ය.
එහි දී වැඩි දුරටත් අදහස් දැක්වූ විපක්ෂ නායකවරයා...
රජය සමෘද්ධිලාභීන්ටත් ණය යි
‘‘ජනසවිය අස්වැසුම ගැමිදිරිය සමෘද්ධි යනාදි වැඩසටහන් හි හොඳ ගුණංග සම්බන්ධ කර ගෙන අඩුපාඩු මග හරිමින් අප රටේ දුප්පත්කම තුරන් කිරීමට මාස විසි හතරක් තුළ දුප්පත් පවුලකට ප්‍රධාන ක්‍රමවේද පහක් හරහා මසකට රු විසි දහසක් බැගින් ලබා දෙනවා. ඊට අමතරව තවත් මුල්‍ය උත්තේජක සමග දුගී දුප්පත්කම තුරන් කිරීමේ වැඩසටහන් ශක්තිමත්ව ක්‍රියාත්මක කරනවා. එහි දී සමෘද්ධි ක්ෂේත්‍රය ලබා දෙන දායකත්වය අගය කරන අතර එය ශක්තිමත් කරන්නට කැපවෙනවා. ප්‍රජාමුල බැංකු එක්දහස් අනූහතක්, සමිති සංවිධාන තිස් දහසක් ඇති මෙම ව්‍යාපාරය කොරෝනා කොවිඩ් සමයේ රජයට ණය ලබා දෙන්න පවා කටයුතු කළ ද වත්මන් රජය තවමත් ණය සහ පොලිය ගෙවා නැහැ. රජය බිලියන හතළිස් තුනක් ණය යි.
