ශ්‍රී ලංකාවේ 9 වැනි විධායක ජනාධිපතිවරයා තෝරා පත් කර ගැනීමේ ජනාධිපතිවරණ ඡන්ද විමසීම අද පෙරවරු 7.00ට ආරම්භ විය.
ඒ අනුව අද පෙරවරු 7.00 සිට පස්වරු 4.00 දක්වා දිවයින පුරා පිහිටි ඡන්ද මධ්‍යස්ථාන 13,421කදී ඡන්ද විමසීම පැවැත්වීමට නියමිතව ඇත.
උදෑසනම ගොස් තම වටිනා ඡන්දය භාවිත කරන ලෙස මැතිවරණ කොමිෂන් සභාවේ සභාපති ආර්.එම්.ඒ.එල්.රත්නායක ඡන්ද දායකයින්ගෙන් ඉල්ලා සිටියි.
2024 ජනාධිපතිවරණය සඳහා නව ඡන්දදායකයන් ලක්ෂ 9කට ආසන්න පිරිසක් ඇතුළුව සුදුසුකම් ලබා ඇති සමස්ත ඡන්ද දායකයින් සංඛ්‍යාව 17,140,354කි.
මෙරට ඉතිහාසයේ ජනාධිපතිවරණයකට ඉදිරිපත් වු වැඩිම අපේක්ෂකයින් සංඛ්‍යාව මෙවර ඉදිරිපත්ව ඇත. ඒ සඳහා අපේක්ෂකයින් 39 දෙනෙකු ඉදිරිපත් වූ නමුත් එක් අපේක්ෂකයෙක් වූ මොහොමඩ් ඉල්ලෙයාස් මහතාගේ අභාවයත් සමග එය 38 දක්වා අඩු විය.
2022 වසරේදී රට දරුණු ආර්ථික අර්බුදයකට පසු මුහුණදීමෙන් පසු පැවැත්වෙන පළමු මැතිවරණය මෙයයි.
රට දරුණු ආර්ථික අර්බුදයකට පසු මුහුණදීමෙන් පසු පැවැත්වෙන පළමු මැතිවරණය
මැතිවරණ දිස්ත්‍රීක්ක 22 අතරින් වැඩිම ඡන්දදායකයින් සහිත දිස්ත්‍රීක්කය බවට ගම්පහ දිස්ත්‍රීක්කය පත්ව ඇති අතර එම දිස්ත්‍රීක්කයේ ලියාපදිංචි ඡන්ද දායකයින් සංඛ්‍යාව 1,881,129 දෙනෙකු බව මැතිවරණ කොමිෂන් සභාව පවසයි.
අනෙකුත් දිස්ත්‍රීක්කයන්හි ලියාපදිංචි ඡන්දදායකයින් සංඛ්‍යා මෙසේය.
කොළඹ දිස්ත්‍රීක්කයේ ලියාපදිංචි ඡන්දදායකයින් සංඛ්‍යාව - 1,765,351
කුරුණෑගල දිස්ත්‍රීක්කයේ ලියාපදිංචි ඡන්දදායකයින් සංඛ්‍යාව - 1,417,226
මහනුවර දිස්ත්‍රීක්කයේ ඡන්දදායකයින් සංඛ්‍යාව - 1,191,399
කළුතර දිස්ත්‍රීක්කයේ ඡන්දදායකයින් සංඛ්‍යාව - 1,024,244
රත්නපුර දිස්ත්‍රීක්කයේ ඡන්දදායකයින් සංඛ්‍යාව - 923,736
ගාල්ල දිස්ත්‍රීක්කයේ ඡන්දදායකයින් සංඛ්‍යාව - 903,163
අනුරාධපුර දිස්ත්‍රීක්කයේ ඡන්දදායකයින් සංඛ්‍යාව - 741,862
කෑගල්ල දිස්ත්‍රීක්කයේ ඡන්දදායකයින් සංඛ්‍යාව - 709,622
බදුල්ල දිස්ත්‍රීක්කයේ ලියාපදිංචි ඡන්දදායකයින් සංඛ්‍යාව - 705,772
මාතර දිස්ත්‍රීක්කයේ සංඛ්‍යාව - 686,175
පුත්තලම දිස්ත්‍රීක්කයේ ඡන්දදායකයින් සංඛ්‍යාව- 663,673
නුවරඑළිය දිස්ත්‍රීක්කයේ ඡන්දදායකයින් සංඛ්‍යාව - 605,292
යාපනය සහ කිලිනොච්චිය ඇතුළත් යාපනය මැතිවරණ දිස්ත්‍රීක්කයේ ලියාපදිංචි ඡන්දදායකයින් සංඛ්‍යාව - 593,187
දිගාමඩුල්ල දිස්ත්‍රීක්කයේ ඡන්දදායකයින් සංඛ්‍යාව - 555,432
හම්බන්තොට දිස්ත්‍රීක්කයේ ඡන්දදායකයින් සංඛ්‍යාව - 520,940
මඩකලපුව දිස්ත්‍රීක්කයේ ලියාපදිංචි ඡන්දදායකයින් සංඛ්‍යාව - 449,686
මාතලේ දිස්ත්‍රීක්කයේ ඡන්දදායකයින් සංඛ්‍යාව - 429,991
මොනරාගල දිස්ත්‍රීක්කයේ ඡන්දදායකයින් සංඛ්‍යාව - 399,166
පොළොන්නරුව දිස්ත්‍රීක්කයේ ඡන්දදායකයින් සංඛ්‍යාව - 351,302
ත්‍රීකුණාමලය දිස්ත්‍රීක්කයේ ඡන්දදායකයින් සංඛ්‍යාව - 315,925
අඩුම ඡන්ද දායකයින් පිරිසක් සහිත මැතිවරණ දිස්ත්‍රීක්කය බවට පත්ව ඇත්තේ වව්නියාව, මන්නාරම සහ මුලතිව් ඇතුළත් වන්නි මැතිවරණ දිස්ත‍්‍රික්කය වන අතර එහි ඡන්දදායකයින් සංඛ්‍යාව 306,081ක් බව මැතිවරණ කොමිෂන් සභාව පෙන්වා දී තිබේ.
මෙවර ජනාධිපතිවරණය සඳහා ලියාපදිංචි වැඩිම ඡන්දදායකයින් පිරිසක් සහිත ඡන්ද බලප්‍රදේශය බවට පත්ව ඇත්තේ කොළඹ දිස්ත්‍රික්කයට අයත් හෝමාගම ඡන්ද බල ප්‍රදේශය වන අතර ඒ සඳහා සුදුසුකම් ලබා ඇති ඡන්ද දායකයින් සංඛ්‍යාව 215,075 දෙනෙකි.
මැතිවරණ ප්‍රතිපල theleader.lk සජීවී විකාශයට පස්වරු 06 සිට ආරම්භ කිරීමට කටයුතු යොදා ඇත.
