දෙවසරකට ඉහතදී දෙදෙනකුට මරු කැඳවමින් තවත් තිහකට ආසන්න පිරිසකට හානි සිදුකළ කන්ද උඩරට මුස්ලිම් ප්‍රහාර සමයේ

මධ්‍යම පළාත භාරව සිටි පොලිස් ප්‍රධානියා රජයේ ඉහලම තානතුරකට පත් කර තිබේ.

“මහජන පැමිණිලි සහ දුක්ගැනවිලි විමර්ශනය කොට කඩිනමින් සහන සැලසීම පිණිස”  ඔම්බුඩ්ස්මන්වරයෙක් ලෙස පත් කර ඇත්තේ දිගන කේන්ද්‍ර කරගෙන 2018 මාර්තුවේ මහනුවර දිස්ත්‍රික්කයේ මුස්ලිම් විරෝධී ප්‍රචණ්ඩ ක්‍රියා සිදුවනවිට දිස්ත්‍රික්කයේ නීතිය හා සාමය භාර ඉහලම නිලධාරියා වූ එස්.එම්. වික්‍රමසිංහයි.  

“පරිපාලන බලතල ක්‍රියාත්මක කිරීමේදී රාජ්‍ය නිලධාරීන් වෙතින් වගකීම් පැහැර හැරීමක් හෝ සීමාව ඉක්මවා ක්‍රියා කිරීමක් සිදුව තිබේනම් හා ඉන් මහජනයාට අපහසුතාවක් හෝ පීඩාවක් සිදුවී ඇත්නම් ඒ පිළිබඳව සොයාබලා විසඳුම් දීම ඔම්බුඩ්ස්මන් කාර්යාලය ස්ථාපනය කිරීමේ පරමාර්ථයයි,” යනුවෙන් එම පත්වීම ප්‍රකාශයට පත් කරමින් ජනාධිපති ලේකම් කාර්යාලය නිකුත් කළ නිවේදනයේ සඳහන් වෙයි.

ප්‍රචණ්ඩ ක්‍රියා සම්බන්ධයෙන් චෝදනා ලබා සිටින මහසෝන් බලකායේ ප්‍රධානී අමිත් ජීවන් වීරසිංහ කලබල හටගත් දා රාත්‍රියේ දිගනට ගෙන්වාගත්තේ ජ්‍යෙෂ්ඨ නියෝජ්‍ය පොලිස්පති එස්.එම්. වික්‍රමසිංහ බවට චූදිතයාගේ බිරිඳ මෙන්ම භික්ෂුන් වහන්සේ නමක් විසින්ද ඒ දිනවල කරන ලද චෝදනා මේතාක් ප්‍රතික්ෂේප වී නැත.

“නුවර DIG මහත්තයා තමයි අමිත් වීරසිංහ ඔයා මේ වෙලාවේ මෙතෙන්ට එන්න කියලා මේ ප්‍රශ්නෙට එයාව පටලැව්වේ,” යි වීරසිංහ බිරිඳ ජයංගනී සිතුම් කුමාරි  මීට ඉහතදී මාධ්‍යවේදීන් හමුවේ කියා තිබේ.

 

DIG ගැන ජයංගනී සිතුම් කුමාරි කියන කතාව : 

මුස්ලිම් විරෝධී ප්‍රහාර දියත් වූ මාර්තු 5දා  එහි ගොස් සිටි මඩකලපුවේ මංගලාරාම විහාරාධිපති හිමියන්ද  තහවුරු කර තිබුනේ ජ්‍යෙෂ්ඨ නියෝජ්‍ය පොලිස්පති එස්.එම්. වික්‍රමසිංහ ගැටුමට පුද්ගලයන් කැඳවූ බවයි.  

“ජ්‍යෙෂ්ඨ නියෝජ්‍ය පොලිස්පති සිට මුලස්ථාන පොලිස් පරීක්ෂක දක්වා හිටපු සියලුම නිලධාරීන් කරපු දේ තමයි පළාතේ සියලු භික්ෂුන් වහන්සේලා පොලිසියට කැඳවලා, අමිත් වීරසිංහ පොලිසියට කැඳවලා දේශපාලන පක්ෂ කැඳවලා මේ ගැටුම ඇතිකළේ ඒ පොලීසියේ හිටපු නිලධාරීන් කියලා මේ ලෝකේ ඕනේ තැනක සාක්කි දෙන්න මම සුදානම්,” යැයි මංගලාරාම විහාරාධිපති අම්පිටියේ සුමන හිමියෝ මාධ්‍යයට පවසා තිබුණි.

 

ජාත්‍යන්තර අවධානය !

මහනුවර දිස්ත්‍රික්කයේ 2018 මුස්ලිම් විරෝධී ප්‍රචණ්ඩතා වලට පොලිසිය සෘජු ලෙසම සම්බන්ධ බවට විශ්වසනීය සාක්ෂි මාධ්‍යවේදීන්, මුස්ලිම් ප්‍රජා නායකයන් සහ එක්සත් ජාතීන්ගේ සංවිධානය විසින් ප්‍රකාශයට පත් කර තිබුනත් ඒ සම්බන්ධයෙන් ශ්‍රී ලංකාවේ මානව හිමිකම් කොමිසම විසින් පවත්වන ලද විමර්ශනයේ වාර්තාව තවමත් එලි දක්වා නැත.

දෙදෙනකුට මරු කැඳවමින් 28 දෙනකුට තුවාල සිදුකොට දේවස්ථාන, නිවාස, කඩසාප්පු සහ වාහන වලට හානි පමුණුවමින්  වසර දෙකහමාරකට ඉහතදී කන්ද උඩරට මුස්ලිම්වරුන්ට එරෙහිව දියත් කෙරුණු ජාතිවාදී ප්‍රහාරය සම්බන්ධයෙන් කිසිවකුටත් දඬුවම් පමුණුවා නැති බවත්, පසුගිය වසර අග වනවිට බොහෝ දෙනකුට වන්දි ගෙවා නැති බවත් එක්සත් ජනපද රාජ්‍ය දෙපාර්තමේන්තුව 2019 ශ්‍රී ලංකාවේ ආගමික නිදහස පිළිබඳව මේ සතියේ නිකුත් කළ වාර්තාවේ සඳහන් කොට තිබේ.

මහජනතාවට තම පැමිණිලි හෝ දුක්ගැනවිලි විශ්‍රාමික ජ්‍යෙෂ්ඨ නියෝජ්‍ය පොලිස්පති එස්.එම්. වික්‍රමසිංහගේ ප්‍රධානත්වයෙන් යුත් කාර්යාලයට පැමිණ පෞද්ගලිකව ඉදිරිපත් කිරීමට අවස්ථාව සලසා ඇතැයි ජනාධිපති කාර්යාලය විසින් දැනුම් දී තිබේ.

නැතහොත් “ජනාධිපති කාර්යාලයේ ඔම්බුඩ්ස්මන්, ජනාධිපති කාර්යාලය, කොළඹ 01” ලිපිනයට තැපැල් මගින් නැතහොත්  011-2338073 ෆැක්ස් අංකය හෝ This email address is being protected from spambots. You need JavaScript enabled to view it. විද්‍යුත් ලිපිනය ඔස්සේ පැමිණිලි යොමු කළ හැකි බව ජනාධිපති මාධ්‍ය ඒකකය වැඩිදුරටත් කියා සිටී.

STF භටයන් මුස්ලිම්වරුන්ට පහරදෙන ආකාරය දැක්වෙන වීඩියෝ දර්ශන

 

 Apekshakaya

subscribeYT

Cyber Window

නවතම පුවත්