රාජ්‍ය අනුග්‍රහයෙන් ශ්‍රී ලංකාවේ පවත්වාගෙන යනු ලැබූ බවට චෝදනා කෙරෙන වධකාගාර දැක්වෙන සිතියමක් පළමු වතාවට එලි දක්වා තිබේ.

 

පසුගිය දශක තුනක කාලය ඇතුළත දිවයින පුරා සිංහල, දෙමළ හා මුස්ලිම් ජනයා වධහිංසාවන්ට පාත්‍ර කිරීමට යොදාගත් වධක ස්ථාන 219ක් සළකුණු කරමින් ජූනි 26 වැනිදාට යෙදෙන වධහිංසා වින්දිතයන්ට සහයෝගය පළකිරීමේ ජාත්‍යන්තර දිනය නිමිත්තෙන් එම සිතියම ප්‍රසිද්ධියට පත් කර ඇත්තේ සත්‍යය සහ යුක්තිය පිළිබඳ ජාත්‍යන්තර ව්‍යාපෘතිය (ITJP) හා ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) සංවිධානය විසිනි.

ස්වකීය සිතියම මගින් දිවයින පුරා සිදුවූ වධ හිංසාවන්ගේ පරිමාණය පූර්ණ වශයෙන් චිත්‍රණය නොකෙරෙන බව ITJP හා JDS සඳහන් කර සිටියි.

“ජනතා විමුක්ති පෙරමුණේ පළමු සහ දෙවැනි නැගිටීම් සිදුවූ වකවානුවල වධහිංසා පමුණුවීම සඳහා යොදාගත් පොලිස් ස්ථාන විශාල ප්‍රමාණයක් ඇති හෙයින් ඒවා මෙහි ඇතුළත් කර නොමැත,” යැයි එම සංවිධාන දෙක පවසයි.

“2006 සිට 2019 දක්වා වූ කාලයට අදාළව සඳහන් කර ඇති ස්ථාන සත්‍යය සහ යුක්තිය පිළිබඳ ජාත්‍යන්තර ව්‍යාපෘතියේ සාක්ෂි ගොනු කිරීමේ ව්‍යාපෘතිය යටතේ සිදුකර ඇති අතර එය ද කිසිසේත් පරිපූර්ණ එකක් නොවේ.”

ලංකාවේ වධක භූමි සිතියම එළිදක්වමින් ITJP සහ JDS විසින් ප්‍රකාශ කර ඇති පරිදි, අසූව දශකයේ අපරභාගයේ දී වධහිංසා පමුණුවීම සඳහා යොදාගත් ස්ථාන අතරට විස්මයජනක ලෙස කොළඹ විශ්ව විද්‍යාලයේ නීති පීඨ ගොඩනැගිල්ල මෙන්ම ලේක් හවුස් ගොඩනැගිල්ලේ බිම් මාලය ද ඇතුළත් ය.

Lake House

දශක ගණනාවක් මුළුල්ලේ, ශ්‍රී ලංකාවේ පාසැල්, උසස් විද්‍යාල හා පුහුණු ආයතන විශාල සංඛ්‍යාවක් වධක ස්ථාන වශයෙන් යොදාගෙන ඇති අතර කර්මාන්ත ශාලා, ගොවිපොළ භූමි, සිනමා ශාලා, ක්‍රීඩාගාර හා ගොල්ෆ් පිටියක් පවා මෙසේ වධහිංසා පැමිණවීමට භාවිතා කර තිබේ.

 "1987-89 වකවානුවේ සිංහල තරුණ ජනයා අතිශය ම්ලේච්ඡ වධහිංසාවන්ට ලක්කිරීමට හා ඝානය කිරීමට සන්නද්ධ හමුදාවන් විසින් යොදාගත් මෙම ස්ථාන මතකයෙන් මකා දමා ඇතැ"යි ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ සංවිධානයේ රෝහිත භාෂණ අබේවර්ධන ප්‍රකාශ කර තිබේ. "

ඕනෑම සමාජයක සාමූහික සදාචාර හෘදය සාක්ෂිය හැඩගස්වන්නේ හුදෙක් මිනිසුන් ජීවත්වෙන ආකාරයෙන් පමණක් නොව, නමුත් මිනිසුන් මිය යන ආකාරයත්, ඔවුන් ස්මරණය කෙරෙන ආකාරයත් විසිනුයි. ජීවත්වන්නවුන් විසින් මළවුන් අමතක කරන්නේ නම්, සමාජය භයානක වූ ප්‍රතික්‍ෂේප කිරීමක සිටින අතර එම සිදුවීම් නැවත සිදුවීමේ අවදානමට ද මුහුණ දෙයි."

 

කර්නල් ජී රාජපක්ෂ

1989දී, සිය ගජබා රෙජිමේන්තු ලුතිනන්වරුන් වූ (වත්මන් යුද හමුදාපති) ශවේන්ද්‍ර සිල්වා , (හිටපු හමුදා මාණ්ඩලික ප්‍රධානී) ජගත් ඩයස් සහ  (හිටපු නියෝජ්‍ය මාණ්ඩලික ප්‍ර‍ධානි හා මෑතදී අමාත්‍යාංශ ලේකම් ධූරයකට පත් කළ) සුමේධ පෙරේරා යන කණිෂ්ඨ නිලධාරීන් සමග මාතලේ දිස්ත්‍රික් හමුදා සම්බන්ධීකරණ නිලධාරියා වශයෙන් කටයුතු කරන ලද්දේ වර්තමාන ජනාධිපති කර්නල් ගෝඨාභය රාජපක්ෂ විසින් බව ITJP සහ JDS සිහිපත් කර දෙයි.

ජවිපෙ නැගිටීම සමයේ සිදු වූ දස දහස් සංඛ්‍යාත අතුරුදහන් වීම් පිළිබඳ පරීක්ෂණ පැවැත් වූ ආණ්ඩුවේ විමර්ශන කොමිසමක් විසින් සම්පාදනය කරනු ලැබ ප්‍රසිද්ධියට පත් නොකරන ලද මාතලේ දිස්ත්‍රික්කයේ අපරාධවලට වගකිවයුත්තන් 24 දෙනෙකුගේ නාම ලැයිස්තුවේ ද, "මාතලේ හමුදා කඳවුර භාර නිලධාරී, ජී. රාජපක්ෂ" යන නම සඳහන්ව ඇතැයි එම සංවිධාන කියා සිටී.

1989 දී මාතලේ දිස්ත්‍රික්කයට යාබද බදුල්ල දිස්ත්‍රික්කයේ ජවිපෙ මැඩලීම සඳහා සම්බන්ධ වී ඇත්තේ වර්තමාන ආරක්ෂක ලේකම් කමල් ගුණරත්න ය.

 

ජවිපෙ දෙවැනි නැගිටීම මැඩලීමට සම්බන්ධ හමුදා නිලධාරීන් උතුරට !

"ජවිපෙ දෙවැනි නැගිටීම මැඩලීමට සම්බන්ධ වූ හමුදා නිලධාරීන්, පසුව පූර්ණ දණ්ඩ මුක්තිය සහිතව දෙමළ ජනයාට එරෙහි යුද අපරාධ හා මානව වර්ගයාට එරෙහි අපරාධ සිදුකිරීමට කටයුතු කරන ලදැ"යි සත්‍යය සහ යුක්තිය පිළිබඳ ජාත්‍යන්තර ව්‍යාපෘතියේ විධායක අධ්‍යක්ෂිකා යැස්මින් සූකා ප්‍රකාශ කර තිබේ.

"මානව හිමිකම් උල්ලංඝනයන් හා ඊට සම්බන්ධ පුද්ගලයන් සැළකූ විට 1989 සිට 2009 දක්වා සෘජු සම්බන්ධයක් පෙන්වා දිය හැකි"බව ඇය වැඩිදුරටත් කීවාය.  

"ශ්‍රී ලංකාවේ වධහිංසා පැමිණවීම රාජ්‍ය අනුග්‍රහය යටතේ සිදුවන බවටත්, එය රාජ්‍ය පිළිවෙත්වලට අදාළ ප්‍රධාන මෙවලමක් බවටත් කිසිදු සැකයන් නැති අතර, එකී පිළිවෙත රාජ්‍යයේ පූර්ණ අධිකාරය හා ව්‍යුහයන් යොදාගනිමින්   සෑම තලයකම ක්‍රියාවට නැංවීම සඳහා ආරක්ෂක හමුදා විසින් ක්‍රියා කර තිබේ.

 ප්‍රචණ්ඩත්වය පාලනය කිරීමට නම්, අතීතයට අදාළ ගණුදෙනු බේරාගත යුතුව ඇති අතර, සියළු වින්දිතයන් පිළිගැනීමත්, ශ්‍රී ලංකාවේ දණ්ඩ මුක්තිය පිළිබඳ සංස්කෘතිය බිඳ දැමීමත් අවශ්‍ය වේ."

 Apekshakaya

subscribeYT

Cyber Window

නවතම පුවත්