එළුවන් රැක බලා ගන්නා දෙමළ තරුණයකුට පහර දී වධ හිංසා කළ බවට ශ්‍රී ලංකා යුද හමුදා සාමාජිකයන් පිරිසකට චෝදනා එල්ල වී තිබේ.
තැලුම් තුවාල සහිත තරුණයා ප්‍රතිකාර සදහා කිලිනොච්චි රෝහලට ඇතුලත් කර ඇති බව උතුරේ වාර්තාකරුවෝ පවසති.
මෙලෙස හමුදා ප්‍රහාරයට ලක්ව ඇත්තේ කිලිනොච්චි තුනුක්කායි පොලිස් වසමේ පොන්නගර් ඔට්ටංකුලම් ප්‍රදේශයේ පදිංචි විසි හැවිරිදි රාසරත්නම් ධනුෂන් නැමැති තරුණයෙකි.
හමුදා සාමාජිකයන්ගෙන් පහර කෑමට ලක්වු තරුණයාගේ ඥාතීන් තුනුක්කායි පොලීසිය වෙත පැමිණිලි කර ඇති පරිදි එළුවන් රැක බලා ගන්නා රාසරත්නම් ධනුෂන් ජුනි 30 වැනිදා උදෑසන සිය රාජකාරිය සදහා වනාන්තරයට යමින් සිටියදී එරුවිල් ප්‍රදේශයේදී යුද හමුදා සාමාජිකයන් පිරිසක් ඔහුට පහර දී තිබේ.
පහර කෑමට ලක්වු රාසරත්නම් ධනුෂන් සිය ඥාතීන්ට ඇමතීමට ගත් උත්සාහය වලක්වා ඔහුගේ දුරකතනය හමුදා බාරයට ගෙන ඔහු එම ස්ථානයෙන් රැගෙන ගොස් එදින රාත්‍රී 7 ට පමණ මාන්කුලම් වන සංරක්ෂණ නිලධාරීන් වෙත භාර දී තිබේ.
මාන්කුලම වන සංරක්ෂණය නිලධාරීන් විසින් රාසරත්නම් ධනුෂන්ගේ ඥාතීන් දැනුවත් කිරීමෙන් පසු එදිනම රාත්‍රි ඔහු මුලංකාවිල් රෝහලට ඇතුලත් කර ඇති අතර වැඩි දුර ප්‍රතිකාර සදහා ජුලි 01 බදාදා කිලිනොච්චි රෝහල වෙත මාරු කර යවා තිබේ.
පහර කෑමට ලක් වු තරුණයාගේ ඥාතීන් තුනුක්කායි පොලීසිය වෙත වැඩි දුරටත් පැමිනිලි කර ඇත්තේ, ඔහු රැක බලා ගනිමින් සිටි එළුවන් කිහිපදෙනකුද අතුරුදහන්ව ඇති බවයි.
