කොරෝනා වෛරසය ආසාදනය වීමෙන් මිය යන ඉස්ලාම් බැතිමතුන්ගේ සිරුරු භුමදානය කිරීමට
ජාත්‍යන්තර ප්‍රමිති නොතකා රජය විසින් පනවා තිබූ තහංචිය ඉවත් කොට ඇති බවට කෙරෙන ප්‍රචාර අසත්‍ය බව හෙළි වී තිබේ.
සෞඛ්‍ය අමාත්‍යාංශයේ මාධ්‍ය ප්‍රකාශක වෛද්‍ය ජයරුවන් බණ්ඩාර පවසන්නේ කොරෝනා ආසාදිත දේහ භූමදානය කිරීමට රජයෙන් අවසර දුන් බවට පලවන වාර්තා අසත්‍ය බවයි. ශ්‍රී ලංකාවේ ප්‍රමුඛතම ඉස්ලාමීය විද්වතුන්ගේ සංවිධානය විසින් ප්‍රචාරය කොට තිබුණු පරිදි මුස්ලිම්වරුන්ගේ අවසන් කටයුතු ආගමානුකුලව සිදු කිරීම සඳහා කරන ලද ඉල්ලීමට රජය ඉඩ දුන් බවයි.
සිලෝන් තව්හීද් ජමාඅත් සංවිධානයේ මහ ලේකම් ආර්.අබ්දුර් රාසික් නොවැම්බර් 09 ජනාධිපති, අගමැති රාජපක්ෂ සොහොයුරන් වෙත ලිපියක් යොමු කරමින් සදහන් කර තිබුනේ මුස්ලිම් මෘත දේහයන් භුමදානය කිරීමට අවසර ලබා දීම සම්බන්ධයෙන් ජනාධිපති ඇතුලු වත්මන් රජයට “අනන්ත අප්‍රමාණ ස්තුතිය” පුද කරන බවයි.
පළවන මාධ්‍ය වාර්තා ප්‍රතික්ෂේප කරමින් වෛද්‍ය ජයරුවන් බණ්ඩාර නොවැම්බර් 10 අගහරුවාදා මාධ්‍ය වෙත ප්‍රකාශ කර තිබුනේ වර්තමානයේ පවතින විද්‍යාත්මක හා තාක්ෂණික කරුණු පදනම් කරගනිමින් තවමත් යම් අයකු මියගියහොත් සිදු කරනු ලබන්නේ ආදාහනය බවයි.
මේ වනවිට සමාජ මාධ්‍යජාලා තුල මෙම නීති වෙනස් කළ බවට තොරතුරු පළවුවත් එවැනි තීරණයක් තවමත් සෞඛ්‍ය අමාත්‍යාංශය ගෙන නොමැති බව ඔහු වැඩි දුරටත් පවසා තිබුනි.
"කෝවිඩ් මරණ දේහයන් පිළිබදව අවසාන කටයුතු සිදු කෙරෙන්නේ ආදාහනය කිරීම. ඒ තිරණය සෞඛ්‍ය සේවා අධ්‍යක්ෂ ජෙනරාල් තුමා ප්‍රකාශයට පත් කරේ විද්‍යාත්මක හා තාක්ෂණික කරුණුත් මේ රටේ භුමිය පිළිබදව විද්‍යාත්මක හා තාක්ෂණික කරුණු කාරනා දෙකම පදනම් කරගෙන.
මේ තිරණය පදනම් කරගත්ත කරුණු කාරනා පිළිදව තවම කිසිදු වෙනස් කමක් ගැන වාර්තා වෙන්නේ නෑ. මෑතක සමාජ මාධ්‍ය ජාලා ඔස්සේ ඒ කෙරෙන්නා වු නොයෙකුත් කාරණා පිළිබදව වෙනස් කරපු බවට කිසිදු නිවේදනයක් සෞඛ්‍ය අමාත්‍යාංශය මේ වන තෙක් නිකුත් කරලා නැහැ "
සමාජ මාධ්‍ය ජාලා තුළ සංසරණය වන සිලෝන් තව්හීද් ජමාඅත් සංවිධානයේ ලිපියේ ඉහලින්ම සදහන් කර තිබුනේ නව කොරෝනා වෛරස් ආසාදනයයෙන් මරණයට පත් වන මුස්ලිම් මෘත දේහ භුමදානය කිරීමට වත්මන් රජය අවසර ලබා දී ඇති බවයි.
"ශ්‍රී ලාංකික මුස්ලිම් ජනතාවගේ ආගමික අයිතිය ගරු කරමින් මුස්ලිම් ජනතාවගේ හැගීම් අවබෝධ කරගෙන මෘත දේහ භුමදානය කිරීමට අවසර දුන් අතිගරු ජනාධිපති ගෝඨාභය රාජපක්ෂ මැතිතුමාටත් ගරු අග්‍රාමාත්‍ය මහින්ද රාජපක්ෂ මැතිතුමාටත් ගරු අධිකරණ ඇමති නීතිඥ අලි සබ්රි මැතිතුමා ඇතුළු වත්මන් රජයටත් මුස්ලිම් ජනතාව වශයෙන් සිලෝන් තව්හිද් ජමාඅත් CTJ සංවිධානය ස්තුතිය පුද කර සිටිමු," යි එම ලිපියේ වැඩි දුරටත් සදහන්ව තිබුනි.
කැබිනට් පත්‍රිකාවක් නැහැ !
මේ අතර ඇතැම් වෙබ් අඩවි වාර්තා කර තිබුනේ අධිකරණ අමාත්‍ය අලි සබ්රි විසින් ඉදිරිපත් කර තිබු කැබිනට් පත්‍රිකාවක් සැලකිල්ලට ගනිමින් රජය මෙම තිරණය ගෙන තිබු බවයි.
කෙසේ වෙතත් රජයේ ප්‍රවෘත්ති දෙපාර්තමේන්තුව විසින් ප්‍රකාශයට පත් කර තිබෙන නොවැම්බර් 9 දිනැති කැබිනට් තීරණවල ඒ සම්බන්ධයෙන් කිසිදු සඳහනක් නැත.
පාර්ලිමේන්තුවේ වාද විවාද
කොරෝනා ආසාදනය වීමෙන් මියයන ශ්‍රී ලාංකික ඉස්ලාම් බැතිමතුන්ගේ අවසන් කටයුතු සම්බන්ධයෙන් නිගමනයකට එළඹීමට අපක්ෂපාතී විශේෂඥ කමිටුවක් පත් කරන ලෙස වෛද්‍ය විශේෂඥයන් සිදු කළ ඉල්ලීමට හය මසක් යනතුරුත් සෞඛ්‍ය අමාත්‍යාංශය ප්‍රතිචාරයක් නොදැක්වීම සම්බන්ධයෙන් පසුගියදා පාර්ලිමේන්තුව තුලදී විපක්ෂයේ බලවත් කනස්සල්ලත්, විරෝධයත් පල කර තිබුනි.
වසංගතයට ගොදුරුවී මියයන මුස්ලිම්වරුන් ගේ සිරුරු පිළිස්සීමට රජය විසින් ලෝක සෞඛ්‍ය සංවිධානයේ නිර්දේශ පවා නොතකා පියවර ගැනීම නිසා ඒ සම්බන්ධයෙන් තීරණයකට එළඹීම සඳහා කමිටුවක් පත් කරන ලෙස ඉල්ලා ඇත්තේ හය මසකට ඉහතදීය.
කඩිනමින් එම කමිටුව ස්ථාපිත කර මෙරට මුස්ලිම් ජනතාවගේ මළ සිරුරු භුමදානය කිරීමේ මානුෂික අයිතිය ලබා දෙන ලෙස සමගි ජන බලවේගයේ පාර්ලිමේන්තු මන්ත්‍රී මුජිබර් රහුමාන් අධිකරණ අමාත්‍යවරයාගෙන් නොවැම්බර් 4 අඟහරුවාදා පාර්ලිමේන්තුවේ ඉල්ලා සිටි අතර එහිදී විපක්ෂයේ මන්ත්‍රීවරයා අනාවරණය කර තිබුනේ ඒ වන විටත් ඉස්ලාම් භක්තිකයන්ගේ ආගමික පිලිවෙත නොතකා රජය විසින් කොරෝනාබාධිතව මිය ගිය මුස්ලිම් ජාතිකයන් නම දෙනකුගේ සිරුරු පුළුස්සා ඇති බවයි.
“අද වෙන කොට නම දෙනයි. තව මේක කල් යන්න කල් යන්න මේක වැඩි වෙනවා. මේක මානුෂික ප්‍රශ්නයක්. මේක දේශපාලනයක් නෙමෙයි. ඔබතුමා මැරුනොත් ඔබතුමාවත් පුච්චනවා. මම මැරුනොත් මාවත් පුච්චනවා. අන්න ඒක කල්පනා කරන්න. " රහුමාන් මන්ත්‍රීවරයා අධිකරණ අමාත්‍යවරයාට අවධාරණය කළේය.
අන්තවාදී තීන්දුවක්:
කොරෝනා වසංගතය ආසාදනය වීමෙන් සිදුවන මරණයකදී අදාල පාර්ශවයන්ගේ කැමැත්ත මත අවසන් කටයුතු භුමදානය හෝ ආදාහනය යන දෙආකාරයෙන් කැමති ආකාරයකට සිදු කළ හැකි බවට ලෝක සෞඛ්‍ය සංවිධානය ප්‍රකාශ කර තිබියදීත්, ආණ්ඩුව මෙරට මුස්ලිම් ජාතිකයන්ට එරෙහිව ගෙන ඇත්තේ අන්තවාදී තීන්දුවක් බවට විපක්ෂ නායක සජිත් ප්‍රේමදාස එහිදී චෝදනා කළේය.
විපක්ෂ නායකයා එල්ල කරන චෝදනා වලට පිළිතුරු දෙමින් අධිකරණ අමාත්‍ය ජනාධිපති නීතීඥ අලි සබ්රි සදහන් කළේ මුස්ලිම් ජාතිකයන්ගේ මළ සිරුරු පුළුස්සා දැමීම සම්බන්ධයෙන් එම ජනතාවට ප්‍රශ්නයක් පැවතියත් එය දේශපාලනීකරණය කර නොගත යුතු බවයි.
ලෝකෙටම වෙනස් ලංකාව:
කෝවිඩ් 19 වසංගතය ශ්‍රී ලංකාවේ මුල් වටයේ පැතිරීම ආරම්භ වීමත් සමග මුස්ලිම්වරුන්ට කරන අඩන්තේට්ටම් අත්හිටුවන ලෙස තෙල් අපනයනය කරන ප්‍රධාන රටවල් ඇතුළු ලෝකයේ බලවත් ඉස්ලාමීය රාජ්‍ය ශ්‍රී ලංකාවට පසුගියදා දැනුම් දීමක් ද කර තිබුනි.
මුස්ලිම්වරුන්ට එරෙහිව කෙරෙන වෙනස්කම් පෑම් හෙලා දකින රටවල් 57 කින් සැදුම්ලත් ඉස්ලාමීය සහයෝගිතා සංවිධානය (OIC) එම ප්‍රජාවේ අයිතිවාසිකම් හා ගෞරවය ආරක්ෂා කිරීමට පියවර ගන්නා ලෙස කෝපාන්විත ස්වරයෙන් යුත් නිවේදනයකින් ශ්‍රී ලංකාවේ රජයෙන් ඉල්ලා තිබුනි.
කොරෝනා රෝගාතුර වී මියයන ශ්‍රී ලංකාවේ ඉස්ලාම් බැතිමතුන්ගේ සිරුරු ලෝක සෞඛ්‍ය සංවිධානයේ නිර්දේශ සහ ඉස්ලාමීය වත් පිළිවෙත් වලට පටහැනිව ආදාහනය කිරීමත්, කෝවිඩ් 19 වසංගත මර්දනය බාර රාජ්‍ය බලධාරීන් මෙන්ම ප්‍රධාන ධාරාවේ ජනමාධ්‍ය හා සමාජ මාධ්‍ය මුස්ලිම් විරෝධී වෛරය ඇවිලවීමත් සම්බන්ධයෙන් එක්සත් ජාතීන් ඇතුළු ජාත්‍යන්තර හා දේශීය මානව හිමිකම් සංවිධාන කනස්සල්ල පළකර තිබේ.
සබැඳි පුවත් :
කොරෝනා වලින් මියගෙන මුස්ලිම්වරුන්ගේ දේහයන් මන්නාරම දී භූමදාන කිරීමට අනුමැතිය
මුස්ලිම් විරෝධී වලදැමීම් හා වෛර කතා නවතන පියවර ගන්නා මෙන් එක්සත් ජාතීහු ඉල්ලති
ජාතිවාදය අවුස්සන බවට ශ්‍රී ලංකාවේ ජනමාධ්‍යයට එක්සත් අරාබි එමීර් රාජ්‍යයෙන් චෝදනා
කොරෝනා සහ ශ්‍රී ලංකාවේ මුස්ලිම් ආදාහන: "මගේ පවුලට වෙච්ච දේ මේ ලෝකේ කිසිම කෙනෙකුට වෙන්න එපා"
කෝවිඩ් ඇතැයි සැක කළ පලියටත් මුස්ලිම් මල සිරුරක් පුච්චලා!
මුස්ලිම් දේහයන් ආදාහනය ගැන ACJU සභාපති නොකියපු කතාවක් !
''කොරෝනාවෙන් මියයන මුස්ලිම් ජාතිකයන් පුච්චන්න එපා'' -ෆයිසර් මුස්තාෆා බැගෑපත් වේ (VIDEO)
මුස්ලිම් දේහයන් භූමදානය කිරීමට අගමැතිගෙන් විශේෂඥ කමිටුවක්! - වළවල් කොන්ක්‍රීට් කිරීමට යෝජනාවක්!
කොරෝනා මරණයක් ආදාහනයද? භූමදානයද? : ඔබ ඇසිය යුතුම කතාවක්... (VIDEO)
''කොරෝනා ආසාදනයෙන් මියයන කතෝලිකයින් පුච්චන්න එපා'' - ඖෂල හේරත් ගෙන් මුලික අයිතිවාසිකම් පෙත්සමක් !
ලංකාවේ කොරෝනා දේහයන් පිච්චීම ගැන BBC වැඩසටහනක් 15 දා !
කොරෝනා රෝගීන්ගේ මෘතදේහ භූමදානය නොකිරීම :එක්සත් ජාතීන්ගේ සංවිධානය ජනපතිගෙන් කරුණු විමසයි
ලංකාවේ කොරෝනා දෙවන මරණය : 'ආදාහනය ගැන කතා කළේ ජාතිවාදී අදහසකින් නොවේ' - හකීම් කියයි
