පරිසර අමාත්‍ය මහින්ද අමරවීර විසින් ඉදිරිපත් කරන ලද අමාත්‍ය මණ්ඩල පත්‍රිකාවක් අනුව
ලබන වසර මුල සිට සැෂේ පැකට් තහනම් කිරීමට අමාත්‍ය මණ්ඩල අනුමැතිය ලැබී තිබේ.
ඒ අනුව එම තහනම ක්‍රියාත්මක කිරීමට පෙර දැනට මෙරට එම ව්‍යාපාර කටයුතුවල නිරත පුද්ගලයන්ගෙන් ඔවුන් මුහුණපාන ගැටළු සම්බන්ධවත්, ඔවුන්ගේ නිෂ්පාදන අලෙවිය සඳහා දැනට භාවිතා කරන පරිසරයට අතිශය අහිතකර සැෂේ පැකට් වෙනුවට විකල්ප නිෂ්පාදන හා ක්‍රියාමාර්ග සම්බන්ධවත් සාකච්ඡා පැවැත්වුන බවයි රජයේ ප්‍රවෘත්ති දෙපාර්තමේන්තුව පවසන්නේ.
දෙසැම්බර් 2 බදාදා පරිසර අමාත්‍යාංශයේ පැවැති එම සාකච්ඡාවේදී හෙළි වී ඇත්තේ මෙරට වසරකට රුපියල් මිලියන 960ක සැෂේ පැකට්වල වල අඩංගු ෂැම්පු, හෙයාර් ඩයි හා හෙයාර් ජෙල් භාවිතා කරන බවයි.
ඒ අනුව මෙරට දිනකට රුපියල් ලක්ෂ 26ක එම ද්‍රව්‍ය අලෙවි කෙරෙන බව රජය පවසයි.
මෙරට වසරකට රුපියල් මිලියන 960ක සැෂේ පැකට්වල වල අඩංගු ෂැම්පු, හෙයාර් ඩයි හා හෙයාර් ජෙල් භාවිතා කරන බවත්, ඒ අනුව මෙරට දිනකට රුපියල් ලක්ෂ 26ක එම ද්‍රව්‍ය අලෙවි කෙරෙන බවත් රජය පවසයි.
මෙලෙස භාවිතා කරන ලද හිස් සැෂේ පැකට් සියල්ලම පරිසරයට මුදා හැරෙන අතර එමනිසා ජලමුලාශ්‍ර, ගංගා ඇලදොළ මෙන්ම වැව් පොකුණු මෙන්ම දිය ඇලි ද බරපතල පරිසර තර්ජනයකට ලක් ව ඇති බව පරිසර අමාත්‍ය මහින්ද අමරවීර එහිදී පෙන්වා දී තිබේ.
මෙරට එක්තරා සමාගමක් විසින් මේ වනවිට ෂැම්පු, හෙයාර් ඩයි මෙන්ම හෙයාර් ජෙල් ඇසුරුම් කිරීම සඳහා එම පැකට් බිලියන 05ක් ගෙන්වා ඇතැයි එම සමාගම විසින් තමන්ට දන්වන ලද බව අමාත්‍යවරයා එහිදී ප්‍රකාශ කර ඇත.
නමුත් එම සමාගමේ නම රජය විසින් හෙළි කර නැත.
කෙසේ වුවද, 2021 ජනවාරි 01 දින සිට මෙම සැෂේ පැකට් භාවිතය මෙරට තහනම් කිරීමට සැලසුම් කර ඇති අතර එහිදී වෛද්‍ය හා ආහාර සැකසුම් තහනම් නොකෙරෙන බව ද අමාත්‍යවරයා අවධාරණය කර තිබේ.
''2021 ජනවාරි 01 දින සිට මෙම සැෂේ පැකට් භාවිතය මෙරට තහනම් කිරීමට සැලසුම් කර ඇති අතර එහිදී වෛද්‍ය හා ආහාර සැකසුම් තහනම් නොකෙරෙන බව ද අමාත්‍යවරයා අවධාරණය කර තිබේ.''
තමන්ට සහන කාලයක් ලබා දෙන ලෙස ඇතැම් සමාගම් විසින් ඉල්ලා සිටියද මෙම තීරණය ගනු ලැබුයේ එම සමාගම් අකර්මණ්‍ය කිරීමේ අරමුණින් නොවන නමුත් අදාල සමාගම් විසින් සැෂේ පැකට් හරහා විශාල ලාභයක් මෙමගින් උපයන නිසා රටේ පරිසර සුරක්ෂිතතාවය උදෙසා ද අවධානය යොමු කළ යුතු බව පරිසර අමාත්‍ය මහින්ද අමරවීර එහිදී වැඩි දුරටත් අවධාරණය කර තිබේ.
