වසංගත සමයේ නීතිය දේශපාලනඥයන්ට හා පොදු ජනතාවට දෙආකාරයකින් ක්‍රියාත්මක කිරීම
ගැන රාජ්‍ය නිලධාරීන් බරපතල දෝෂ දර්ශනයට ලක්වී තිබේ.
වසර ගණනාවක් තිස්සේ අතුරුදහන් කර සිටින සිය සමීපතමයන් සොයා දෙන ලෙස රජයට බලකරමින් ජාත්‍යන්තර මානව හිමිකම් දිනයේ පැවැත්වීමට සැලසුම් කළ විරෝධතාවය නවතා දමන ලෙස බලපෑම් කළ මහජන සෞඛ්‍ය පරීක්ෂකවරයකු ඇතුළු පොලිස් නිලධාරීන්ට නැගෙනහිර මාතාවක් දැඩි කෝපයෙන් පෙන්වා දී ඇත්තේ නීතිය පොදු ජනතාවට වෙනස් කම් පෑම සඳහා යොදා ගන්නා ආකාරයයි.
"මේ වගේ උද්ඝෝෂණයක් දේශපාලනඥයෝ කළොත් ඉඩ දෙනවද? නැද්ද? ඔබතුමා කියන්න. දේශපාලනඥයන්ට එක නීතියක්. පොදු ජනතාවට එක නීතියක් " බලහත්කාරයෙන් අතුරුදහන්කරවුවන්ගේ පවුල් වල ඥාතීන්ගේ සංගමයේ ලේකම්වරිය විමසන අයුරු නැගෙනහිර පළාත් මාධ්‍යවේදීන්ගේ කැමරාකාචයට හසුව තිබේ.
එයට පිළිතුරු ලෙසින් මහජන සෞඛ්‍ය පරීක්ෂකවරයා පවසා ඇත්තේ "ඔයා කියන දෙයක් කියන්න. ඒක මට අදාල නෑ. අපි ඔහෙලා දින 14 ක් නිරෝධායනය කරනවා. " යනුවෙනි.
මඩකලපු දිස්ත්‍රික් වාර්තාකරුවන් පවසන්නේ ජගත් මානව හිමිකම් දිනය සැමරීම සදහා දෙසැම්බර් 10 බ්‍රහස්පතින්දා උදෑසන මඩකලපුව බස්නැවතුම් පොළට රැස්වු අතුරුදහන් වුවන්ගේ පවුල් වලක්වා ලීමට පොලිස් නිලධාරීන් සහ මහජන සෞඛ්‍ය පරීක්ෂකවරුන් වෑයම් කළ අවස්ථාවේදී දෙපිරිස අතර වාග් සංග්‍රාමය හටගත් බවයි.
එහිදී රාජ්‍ය නිලධාරීන් විරෝධතාකරුවන්ට දන්වා ඇත්තේ ඔවුන් එම විරෝධතාවය දියත් කළහොත් රටේ පවතින වසංගත තත්වය හමුවේ ඔවුන් දින 14 ක කාලයක් නිරෝධායනය කිරීමට සිදු වන බවයි.
''රාජ්‍ය නිලධාරීන් විරෝධතාකරුවන්ට දන්වා ඇත්තේ ඔවුන් එම විරෝධතාවය දියත් කළහොත් රටේ පවතින වසංගත තත්වය හමුවේ ඔවුන් දින 14 ක කාලයක් නිරෝධායනය කිරීමට සිදු වන බවයි.''
පසුව එම ස්ථානයට පැමිණි දෙමළ ජාතික සන්ධානයේ හිටපු පාර්ලිමේන්තු නියෝජිතයන් පිරිසක් ද කැටුව මඩකලපුව තන්දෙයි සෙල්වා උද්‍යානය ඉදිරිපිටට ගිය බලහත්කාරයෙන් අතුරුදහන්කරවුවන්ගේ පවුල් වල ඥාතීන් ආරක්ෂක අංශ වල බාධා නොතකා සිය විරෝධතාවය දියත් කර තිබේ.
“අපේ ඥාතීන් හොයන එක ත්‍රස්තවාදයද?, අපේ ඥාතීන් හොයන එක දේශද්‍රෝහීද?, අපිට තර්ජන කරන්න එපා, අපේ මානව හිමිකම් කඩ කරන්න එපා,” ආදී සටන්පාඨ ප්‍රදර්ශනය කරමින් බලහත්කාරයෙන් අතුරුදහන්කරවුවන්ගේ පවුල් වල ඥාතීන්ගේ සංගමය සිය විරෝධතාවය දියත් කළ බව පළාත් බද වාර්තාකරුවෝ පවසති.
ඔවුන් වැඩි දුරටත් සදහන් කරන්නේ විරෝධතාවය දියත් කළ පුද්ගලයන්ගේ පෞද්ගලික විස්තර ආරක්ෂක අංශ නිලධාරීන් විසින් රැස් කරගත් බවයි.
