වසංගත සමයේ ඉන්දීය ධීවර ට්‍රෝලර් යාත්‍රා මෙරට උතුරු මුහුදු සීමාවේ නීති විරෝධී ලෙස මාළු බෑම නවත්වන්නට පියවර ගැනීමෙන් ආරක්ෂක බලධාරීන් වැළකී සිටීම නිසා උතුරේ ධීවරයන් දහස් ගණනකගේ ජීවිකාවට
මරු පහරක් එල්ල වී තිබේ.
කොරෝනා ආසාදනයට බියේ නාවික හමුදාව අසල්වැසි රටේ ධීවර යාත්‍රා අත් අඩංගුවට ගැනීමට ක්‍රියා නොකිරීමෙන් උතුරු මුහුදේ ඉන්දීය බෝට්ටු වැඩි වී ඇති බවට ධීවර සංගම් චෝදනා කරති.
ඉන්දීය ධීවර ට්‍රෝලර් යාත්‍රා 500 ක් පමණ ලංකාවේ ගොඩබිම ට පෙනෙන දුරින් මුලතිව් මුහුදේ කිසිදු බාධාවකින් තොරව මසුන් මරන්නේ මුලතිව්හි චලෙයි සිට කොකිලායි දක්වා හමුදා සහ නාවික හමුදා කදවුරු 50 ක් පමණ පිහිටා තිබියදී බවයි ඔවුන් වැඩි දුරටත් පෙන්වා දෙන්නේ.
''ඉන්දීය ධීවර ට්‍රෝලර් යාත්‍රා 500 ක් පමණ ලංකාවේ ගොඩබිම ට පෙනෙන දුරින් මුලතිව් මුහුදේ කිසිදු බාධාවකින් තොරව මසුන් මරන්නේ මුලතිව්හි චලෙයි සිට කොකිලායි දක්වා හමුදා සහ නාවික හමුදා කදවුරු 50 ක් පමණ පිහිටා තිබියදී බවයි ඔවුන් වැඩි දුරටත් පෙන්වා දෙන්නේ.''
මුලතිව් වෙරලාසන්නයටම පැමිණෙන ඉන්දීය යාත්‍රා බාධාවකින් තොරව මසුන් මැරීමේ යෙදී සිටින අයුරු මුලතිව් ධීවර සංගම් නායකයෝ පසුගියදා මාධ්‍යවේදීන් කැඳවා දැකගන්නට සලස්වා තිබුණි.
තමන් මුහුණ දී සිටින අභාග්‍ය සම්පන්න තත්වය සම්බන්ධයෙන් ඒ අවස්ථාවේ මුලතිව් සමුපකාර ධීවර සමිතියේ සභාපති මරියදාස් පැට්‍රික් ජොන්සන් වට්ටුවාහල්හි ගෝඨාභය නාවික හමුදා කඳවුරේ ප්‍රධානියකුට දුරකතනයෙන් කතා කර පැමිණිලි කළත් කිසිදු පියවරක් ගත් බවක් දැනගන්නට ලැබී නැත.
මුලතිව් දිස්ත්‍රික් ලේකම් කේ. කනගේෂ්වරන් සමග දෙසැම්බර් 10 බ්‍රහස්පතින්දා පැවැති සාකච්ජාවකදී ධීවර නායක ජොන්සන් අනතුරු අඟවා ඇත්තේ දෙසැම්බර් 15 අගහරුවාදා දිනට පෙර රජය මැදිහත් වී විසදුමක් ලබා නොදුනහොත් ධීවරයන් සමග එක්වී ඉන්දීය ධීවර ට්‍රෝලර් යාත්‍රා මෙරට ගොඩබිමට ඇදගෙන ඒමට කටයුතු කරන බවයි.
ධීවරයන්ගේ ඉල්ලීම් සාධාරණ බව පිළිගත් මුලතිව් දිස්ත්‍රික් ලේකම් කේ. කනගේෂ්වරන් ධීවර සංගම් සමග පැවැති සාකච්ඡාවෙන් පසු මාධ්‍ය හමුවක් පවත්වමින් පවසා ඇත්තේ තමන් පළාත් ආණ්ඩුකාරවරයා සහ ධීවර අමාත්‍යවරයා සමග සාකච්ඡා කර විසදුමක් ලබා දෙන බවයි.
පළාත් බද වාර්තාකරුවන් පවසන්නේ, ඉන්දීය ධීවරයන් මෙරට මත්ස්‍ය සම්පත නෙලා ගැනීම නතර කිරීමට දෙසැම්බර් 14 සදුදා හවස් වන විටත් රජය කිසිදු විසඳුමක් ලබා දී නොමැති බවට ධීවර වෘත්තිය සමිති නායකයන් සදහන් කළ බවයි.
ධීවර ප්‍රජාව මුහුණ දී සිටින තත්වය පැහැදිලි කරමින් ධීවර සංගම් නායකයන් පෙන්වා දෙන්නේ වැඩිම මත්ස්‍ය අස්වැන්නක් සහිත මේ කාලයේදී ලක් මුහුදේ මසුන් මරණ ඉන්දීය ධීවරයන් කුඩා මසුන් මෙන්ම මත්ස්‍ය බිත්තර පවා විනාශ කරන බවයි.
'' ධීවර ප්‍රජාව මුහුණ දී සිටින තත්වය පැහැදිලි කරමින් ධීවර සංගම් නායකයන් පෙන්වා දෙන්නේ වැඩිම මත්ස්‍ය අස්වැන්නක් සහිත මේ කාලයේදී ලක් මුහුදේ මසුන් මරණ ඉන්දීය ධීවරයන් කුඩා මසුන් මෙන්ම මත්ස්‍ය බිත්තර පවා විනාශ කරන බවයි.''
නොවැම්බර්, දෙසැම්බර් සහ ජනවාරි, පෙබරවාරි යන මාස මුලතිව් මුහුදේ ඉස්සන් අස්වැන්න වැඩි වශයෙන් පවතින කාල සීවාව වුවත් එම අස්වැන්න ඉන්දීය ධීවරයන් අත්ට පත් වන බව පෙන්වා දෙන වෘත්තිය සමිති නායකයන් අවධාරණය කරන්නේ, මුලතිව් ධීවරයන් වසරක් ජීවත් වන්නේ මෙම කාලයේදී ලබා ගන්නා ආදායමෙන් බවයි.
වගකිව යුතු බලධාරීන් රාජකාරිය පැහැරහැරීම නිසා එම ආදායම ඉන්දීය ධීවරයන් අතට පත් වීමෙන් මුලතිව් දිස්ත්‍රික්කයේ ධීවර පවුල් 5000 ක් පමණ දැඩි ආර්ථික අර්බුදයකට මුහුණ පා සිටින බව පළාත් බද වාර්තාකරුවෝ පෙන්වා දෙති.
