එකොලොස් දෙනකු මරා දමමින් සියයකට වැඩි පිරිසකට තුවාල සිදු කළ මහර බන්ධනාගාරයේ සමුලඝාතක
ප්‍රහාරයෙන් මිය ගිය රැඳවියන් අතරින් මේ දක්වා පශ්චාත් මරණ පරීක්ෂණ අවසන් කළ අට දෙනෙගේම මරණය සිදු වී ඇත්තේ වෙඩි වැදීමෙන් බව අධිකරණය හමුවේ තහවුරු වී තිබේ.
මහර බන්ධනාගාරයේ ගැටුමේදී මියගිය රැඳවියන් එකොලොස් දෙනාගේ පශ්චාත් මරණ පරික්ෂණ වාර්තා ඔස්සේ ගැටුම සම්බන්ධයෙන් විමර්ශනය කරන පංච පුද්ගල විශේෂඥ කමිටුව විසින් දෙසැම්බර් 23 බදාදා වැලිසර මහේස්ත්‍රාත් අධිකරණයට දැනුම් දී ඇත්තේ වෙඩි වැදීමෙන් සිදු වූ බරපතල තුවාල සහ කොවිඩ් 19 ආසාදනයෙන් තවත් රැඳවියන් සිව් දෙනෙකු මිය ගොස් ඇති බවයි.
වැලිසර මහේස්ත්‍රාත් බුද්ධික සී රාගල ඉදිරියේ නඩුව දෙසැම්බර් 16 බදාදා කැදවු අවස්ථාවේදීත් පශ්චාත් මරණ පරික්ෂණ වාර්තා ඇතුළත් රහසිගත වාර්තාවක් අධිකරණයට ඉදිරිපත් කරමින් ගැටුම සම්බන්ධයෙන් විමර්ශනය කරන පංච පුද්ගල විශේෂඥ කමිටුව දැනුම් දී තිබුනේ ඒ වන විට මරණ පරීක්ෂණ හමාර කළ තිබු රැදවියන් සිව් දෙනෙකුද මිය ගොස් තිබුනේ වෙඩි වැදීමෙන් බවයි.
රජයේ අධිනීතිඥ නිශාරා ජයරත්නගෙන් මුලික විරෝධතාවක්
මහර බන්ධනාගාරයේ සමුලඝාතක ප්‍රහාරයෙන් පීඩාවට පත් වුවන් වෙනුවෙන් පෙනී සිටින නීතිඥයන් රාජ්‍ය නොවන සංවිධාන නියෝජිතයන් ලෙස පසුගිය නඩු වාරයේදී ගර්හාවට ලක් කළ නීතිපති දෙපාර්තමේන්තුව නියෝජනය කරන රජයේ අධිනීතිඥ නිශාරා ජයරත්න පීඩාවට පත් වු පාර්ශවය වෙනුවෙන් නීතිඥවරුන් කණ්ඩායමක් අධිකරණය හමුවේදී කරුණු දැක්වීම පිළිබදව ඊයේ දිනයේ ද මුලික විරෝධතාවක් ඉදිරිපත් කළ බව නීතිඥ සේනක පෙරේරා මාධ්‍යවේදීන් හා කියා තිබේ.
මෙම නීතිඥවරුන් කුමන මරණකරුගේ ඥාතීන් වෙනුවෙන් පෙනී සිටින්නේදැයි නිශ්චිතව සඳහන් කිරීමකින් තොරව කරුණු දක්වන බැවින් එම නීතිඥවරුන්ට කරුණු දැක්වීමට අවසර ලබා නොදෙන ලෙස රජයේ අධිනීතිඥවරිය අධිකරණයෙන් ඉල්ලා සිටි බව ජනමාධ්‍ය වාර්තා කර තිබේ.
වෙඩි වැදීමෙන් මරණය සිදු වී ඇති බවට ඊයේ දිනයේ අධිකරණයට වාර්තා කළ රැඳවියන්ගේ සිරුරු සම්බන්ධයෙන් ගත යුතු පියවර ගැන වැලිසර මහේස්ත්‍රාත් බුද්ධික සී රාගල ඊයේ දිනයේ නියෝගයක් ලබා නොදුන් බව මානව හිමිකම් නීතිඥයා වැඩි දුරටත් මාධ්‍යවේදීන් හා කියා තිබේ.
එම රැඳවියන් සිව් දෙනාගේ මළ සිරුරු භූමදානය කිරීමට අවසර ලබා දෙන්නේ ද නැතහොත් ආදාහනය කිරීමට අවසර ලබා දෙන්නේ ද යන නියෝගය දෙසැම්බර් 30 වැනි දා නිකුත් කිරීමට මහේස්ත්‍රාත්වරයා තීරණය කර තිබේ.
සිරකරු අයිතිවාසිකම් සුරැකීමේ කමිටුවේ සභාපති නීතිඥ සේනක පෙරේරා
සිරකරු අයිතිවාසිකම් සුරැකීමේ කමිටුවේ සභාපති නීතිඥවරයා පවසන පරිදි ඉස්ලාම් ආගමට අයත් කොවිඩ් -19 වින්දිතයන්ගේ මළ සිරුරු භුමදානය කිරීම සම්බන්ධයෙන් නිශ්චිත තිරණයක් ලබා දෙන තෙක් කොව්ඩ් 19 වසංගතය හේතුවෙන් මිය යන අයගේ මළ සිරුරු සිසිල් කළ කන්ටේනර් තුළ තැන්පත් කිරීමේ හැකියාව සම්බන්ධයෙන් සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන අධිකරණ අමාත්‍යවරයා ප්‍රමුඛ පාර්ලිමේන්තු මන්ත්‍රීවරුන් වෙත යොමු කර තිබෙන ලිපිය සම්බන්ධයෙන් රජයේ අධිනීතිඥ නිශාරා ජයරත්න විනිසුරුවරයාගේ අවධානයට යොමු කර ඇත.
වෙඩි වැදීමෙන් මරණය සිදු වී ඇති බවට දෙසැම්බර් 16 බදාදා අධිකරණයට වාර්තා කළ රැඳවියන් සිව් දෙනාගේ සිරුරු රජයේ වියදමින් ආදාහනය කිරීමට වැලිසර මහේස්ත්‍රාත් බුද්ධික ශ්‍රී රාගල එදින නියෝග කර තිබුනි.
මහර හිරගෙදර ප්‍රහාරයෙන් අගතියට පත් පාර්ශවය වෙනුවෙන් අද අධිකරණය හමුවේ පෙනී සිටි නීතිඥයන් ගණන පහකි.
මෙම නඩුව දෙසැම්බර් 30 වැනිදා යළි කැඳවීමට නියමිතය.
