ඝාතනයට ලක් වු සියළු මාධ්‍යවේදීන් වෙනුවෙන් යුක්තිය ඉල්ලා සිටින නැගෙනහිර මාධ්‍යවේදීන් පිරිසක්
මාධ්‍ය මෙහෙවරෙහි යෙදී සිටිනවුන්ට කරන හිරිහැර ද නවතා දමන ලෙස රජයට බල කර සිටී.
 
සියලු ආණ්ඩු යටතේ ඝාතනයට ලක් වූ එකදු මාධ්‍යවේදියකු වෙනුවෙන් හෝ යුක්තිය ඉටු කිරීමට ආණ්ඩුව සමත් වී නැති බවට පවසන ඔවුන් පෙන්වා දෙන්නේ උතුරු,  නැගෙනහිර මාධ්‍යවේදීන් ඉලක්ක කොට කෙරෙන හිංසා පීඩා තවමත් නතර වී නොමැති බවයි.
 
 අම්පාර හා මඩකලපුව මාධ්‍ය සමාජයත්, මඩකලපුව දෙමළ මාධ්‍යවේදී සංගමයත් ඒ බව අවධාරණය කර ඇත්තේ සිසු දරුවන් පස් දෙනකු මරා දැමීම පිළිබඳව ලොවට හෙළි කිරීම නිසා ඝාතනය කෙරුණු දෙමළ මාධ්‍යවේදියකුගේ පහළොස් වැනි ගුණානුස්මරණය මඩකලපුව කාර්තිව්හිදී සමරමිනි.
 
vikalpa 2021.01.25
අධි ආරක්ෂක කලාපයක පිහිටි ත්‍රිකුණාමලේ ආණ්ඩුකාර කාර්යාලය අබියස සිය නිවසට නුදුරේදී සුඩර් ඔලි හා උදයන් වාර්තාකාර සුබ්‍රමනියම් සුගීර්දරාජන් වෙඩි තබා මරා දමා තිබුනේ 2006 ජනවාරි 24 දාය.
 
එයින් හතර අවුරුද්දක් පිරෙන දවසේ පැහැරගෙන යන ලද දකුණේ මාධ්‍යවේදී ප්‍රගීත් එක්නැලිගොඩ අද වනතුරු අතුරුදහන්ය.
 
 පහලොස් වසරකට ඉහතදී ඝාතනයට ලක් වු සිය මාධ්‍ය සගයාගේ ඡායාරූපයකට මල් මලයක් පළදා පුෂ්ප උපහාරය සමග ඔහු වෙනුවෙන් පහන් දැල්වීමටත් අම්පාර හා මඩකලපුව මාධ්‍ය සමාජයත් මඩකලපුව දෙමළ මාධ්‍යවේදී සංගමයත් කටයුතු කර තිබුනි.
 
 ‘රාජන්’ නම් ප්‍රකට සුගීර්දරාජන් ඝාතනය කරන ලද්දේ ත්‍රිකුණාමලයේදී මරා දමන ලද සිසුන් පස් දෙනකුගේ ඝාතනයට රජයේ ආරක්ෂක අංශ වග කිව යුතු බවට ප්‍රබල සාක්ෂි දැක්වෙන ඡායාරූප පල කිරීමෙන් අනතුරුවය.
 
 ෂන්මුගරාජා ගජේන්ද්‍රන්, ලෝගිදරාජා රෝහන්, තංගදුරෙයි සිවානන්දා, යෝගරාජා හේමචන්ද්‍රන් හා මනෝහරන් රජිහර් 2006 ජනවාරි දෙවැනිදා මියගියේ බෝම්බ ප්‍රවාහනය කරමින් සිටිය දී ඒවා පුපුරා යාමෙන් බවට ආණ්ඩුව සහ ආරක්ෂක අංශ ශ්‍රී ලංකාවේ අධිපති මාධ්‍ය ඔස්සේ ගෙනගිය ප්‍රචාරය බොරු කරන්නට රාජන්ගේ ඡායාරූප සමත් විය.
 
 නිර්භීත ලෙසින් තම රැකියාවේ යෙදී කළ හෙළිදරව්වෙන් සති දෙකක් ගතවූ තැන ජීවිතයෙන් වන්දි ගෙවන්නට සිදුවූ තම මාධ්‍ය සගයාට ඉටු නොවූ යුක්තිය පහළොස් වැනි අවුරුද්දේත් ඉල්ලා සිටි අම්පාර හා මඩකලපුව මාධ්‍ය සමාජයත් මඩකලපුව දෙමළ මාධ්‍යවේදී සංගමය තව දුරටත් රජයට බල කර තිබුනේ මාධ්‍යවේදීන්ට සිදු කරන හිංසා කිරීම් නවතා දැමීමට කටයුතු කරන ලෙසයි.
 
නැගෙනහිර මාධ්‍යවේදීන්ට මරණ තර්ජන
 
2020 වසරේ ජනවාරි මාසයේදීත් දෙමළ මාධ්‍යවේදීන් හට මරණ තර්ජන කරමින් අත්පත්‍රිකා තොගයක් මඩකලපුව දෙමළ මාධ්‍ය සංගම් මුලස්ථානයට රහසේ ගෙනත් දමා තිබුනි.
 
 සන්ඩේ ලීඩර් පුවත් පතේ හිටපු කතෘ ලසන්ත වික්‍රමතුංගගේ නැගෙනහිර අනුස්මරණ අවස්ථාවක ගන්නා ලද ඡායාරූපය එම අවස්ථාවට සහභාගී වු මාධ්‍යෙවේදීන්ගේ මුහුණු රවුම් කර ඔවුන්ට තර්ජනය එල්ල කර තිබුනි.
 
 “පරිස්සම් වෙන්න, පරිස්සම් වෙන්න මේ ඉන්නේ පිටරට ඉන්නට කොටින්ගෙන් සල්ලි ලැබෙන වාර්තාකරුවන්. ඔවුන්ට ලඟදීම මරණ දඬුවම ලබා දෙනවා,” යි එම තර්ජනාත්මක අත් පත්‍රිකා වල සඳහන් කර තිබේ.
 
 ස්වාධීන රූපවාහිනියේ ක්‍රිෂ්ණකුමාර්, ලංකා ශ්‍රී ආයතනයේ සෙල්වකුමාර් නිලන්තන්, සිරස රූපවාහිනියේ පුන්‍යමුර්ති සසිකරන්, ශක්ති නාළිකාවේ කුහර්ෂ සුපෝජන් හා නල්ලතම්බි නිත්‍යනාදන් මෙන්ම තිනකුරල් පුවත් පතේ වඩිවෙල් ශක්තිවේල් සහ සුබ්‍රමනියම් කුනලිංගම් මෙසේ තර්ජනයට ලක්ව සිටින මාධ්‍යවේදීන් වේ.
 
මහින්ද රාජපක්ෂ පාලන සමයේදී උතුරේත් දකුණේත් ඝාතනය වු සහ අතුරුදහන්වු මාධ්‍යවේදීන් වැඩිම ප්‍රමාණයක් අතුරුදහන් වී ඇත්තේ ජනවාරි මාසයේදී ය.
 
 ජනාධිපති ගෝඨාභය රාජපක්ෂ ආරක්ෂ ලේකම් ධුරය දරන සමයේදී ඝාතන සහ පැහැරගැනීම් ඇතුළු පීඩාවලට රට තුලදී ලක්වූ මාධ්‍යවේදීන් ගණන 44 ක් බව ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) විසින් සම්පාදනය කරන ලද වාර්තාවක දැක්වේ.

 

 

 


 

 
ගරානා මාෆියාව, රෝයල් ප්‍රින්සිපල් එලවයි ද ? 
 
 
ජනපතිගේ අලුත් කොමිසමට ජාත්‍යන්තර ප්‍රහාරයක්
 
 

subscribeYT

WhatsApp Image 2021 09 13 at 13.49.58