ශ්‍රී ලංකාවේ යුද අපරාධ සිදු කළ සියලු දෙනා ජාත්‍යන්තර යුද අපරාධ අධිකරණයට ඉදිරිපත් කර
යුක්තිය ඉටු කර දෙන ලෙස මෙරට සිවිල් සංවිධාන කිහිපයක් විසින් එක්සත් ජාතීන්ගේ මානව හිමිකම් කොමිසමෙන් ඉල්ලා සිටී.
"ජාත්‍යන්තර යුද අපරාධ අධිකරණයට යුද අපරාධ කළ සියලු දෙනා ඉදිරිපත් කරන ලෙසටත් අපට යුක්තිය ඉටු කර දෙන ලෙසටත් අපි ඉල්ලා සිටිනවා."
මාරිමුත්තු සතිවේල් පියතුමා ඒ බව සදහන් කළේ පෙබරවාරි 14 බදාදා කොළඹදී පැවැති මාධ්‍ය හමුවක් අමතමිනි.
එක්සත් ජාතීන්ගේ මානව හිමිකම් කොමිසම විසින් වසර දහයක් තිස්සේ ශ්‍රී ලංකාව සම්බන්ධයෙන් ඉදිරිපත් කළ කිසිදු යෝජනාවක් පිළිගැනීමට හෝ ක්‍රියාත්මක කිරීමට පැවැති රජයන් හෝ වත්මන් රජය ක්‍රියා කර නොමැති බවත් පියතුමා එහිදී පෙන්වා දුන්නේය.
මානව හිමිකම් කඩවීම සම්බන්ධයෙන් යුක්තිය ඉල්ලා සිවිල් සංවිධාන සහ ආගමික නායකයන් එක්ව පසුගිය ජනවාරි මාසයේදී එක්සත් ජාතීන්ගේ සංවිධානය වෙත යොමු කළ ලිපියේ අන්තර්ගත කරුණු සම්බන්ධයෙන් එක්සත් ජාතීන්ගේ සංවිධානය විසින් කිසිදු තැකීමක් සිදු කර නොමැති බවට චෝදනා කරන දිවයිනේ ප්‍රමුඛතම මානව හිමිකම් ක්‍රියාධරයෙක් වන මාරිමුත්තු සතිවේල් පියතුමා පෙන්වා දෙන්නේ රටවල් පහක් ඒකාබද්ධව මෙවර මානව හිමිකම් කොමිසමේදී ශ්‍රී ලංකාව සම්බන්ධයෙන් ඉදිරිපත් කිරීමට නියමිත යෝජනාවලියේද ලංකාවේ සිවිල් සංවිධාන විසින් සිදු කළ ඉල්ලිම් සම්බන්ධයෙන් සලකා නොමැති බවයි.
එක්සත් ජාතීන්ගේ මානව හිමිකම් කොමිසම වෙත සිවිල් සංවිධාන විසින් ඉදිරියේදී නැවත වතාවක් යොමු කිරීමට නියමිත වාර්තාවක් උපුටා දක්වමින් මාරිමුත්තු සතිවේල් පියතුමා වැඩි දුරටත් පෙන්වා දුන්නේ ශ්‍රී ලංකාවේ මානව හිමිකම් චර්යාව පිළිබඳ එක්සත් ජාතීන්ගේ නවතම සමාලෝචනය යුද අපරාධ චෝදනා ලද්දවුන් සම්බන්ධයෙන් ක්‍රියාමාර්ග ගැනීමට සුදානම් බවක් නොපෙනෙන බවයි.
"මුලික යෝජනාවලියේදී අප විසින් බලාපොරොත්තු වන කිසිවක් එහි සදහන් කර නැහැ."
යුද්ධයේ අවසන් සමයේදී ජන සංහාරයක් සිදු වු බව පවසන මාරිමුත්තු සතිවේල් පියතුමා එහිදී තවදුරටත් සදහන් කළේ හමුදාවට සම්බන්ධ අය විසින් කරන ලද යුද අපරාධ පිළිබදව ජාත්‍යන්තර සංවිධාන විසින් සාක්ෂි සහිතව ඉදිරිපත් කර තිබියදීත් එය සාකච්ඡාවට භාජනය නොවන තත්වයක් උදා වී තිබෙන බවයි.
"ඒ වගේම මානව හිමිකම් කොමසාරිස් වන මිෂෙල් බැෂලේ විසින් සුදානම් කරලා තිබෙන වාර්තාවේදී සදහන් වෙනවා සිදුවුනු සියලු යුද අපරාධ පිළිබදව මානව හිමිකම් උල්ලංඝනය පිළිබදව. සංහාරය පිළිබදව සදහන්ව තිබෙනවා. ඒ විතරක් නෙමෙයි ජාත්‍යන්තර යුද අපරාධ අධිකරණයට ඉදිරිපත් කළ යුතුයැයි යෝජනා කර තිබෙනවා. නමුත් මේ මොහොතේ දී යෝජනාවක් ලෙස ඉදිරිපත් කර තිබෙන්නා වු ඒ යෝජනාවේදී ජාත්‍යන්තර යුද අපරාධ අධිකරණයට ඉදිරිපත් කිරීමට හෝ වෙනත් සුදුසු ක්‍රියාවලියක් ගැනීමට හෝ සුදානම් නැති බව අපට පෙනෙනවා. "
සිවිල් සංවිධාන, ආගමික නායකයන්, දෙමළ වින්දිතයන්ගේ සංවිධාන විසින් සකස් කළ නවතම ලියවිල්ලට අත්සන් ලබා ගැනීම අවසන් වු වහාම එක්සත් ජාතීන්ගේ මානව හිමිකම් කොමිසම වෙත යොමු කරන බව මාරිමුත්තු සතිවේල් පියතුමා අගනගරයේ මාධ්‍යවේදීන් හා කියා තිබේ.
එක්සත් ජාතීන්ගේ මානව හිමිකම් කොමසාරිස් මිෂෙල් බැෂලේ
එක්සත් ජාතීන්ගේ මානව හිමිකම් කොමසාරිස් වන චිලී රටේ හිටපු ජනාධිපති මිෂෙල් බැෂලේ පසුගියදා ඇයගේ වාර්තාවෙන් ශ්‍රී ලංකාව ‘බරපතල මානව හිමිකම් උල්ලංඝනය කිරීම්’ සිදු කර ඇති බවට පුළුල් ලෙස චෝදනා කර ඇති අතර යුද්ධය අතරතුර සිදු වූ අපරාධ සම්බන්ධයෙන් වගවීමක් ඉල්ලා තිබුනි.
“ජාත්‍යන්තර පරිමානයේ අපරාධ සම්බන්ධයෙන් යුක්තිය සලසා ලීම සඳහා ජාත්‍යන්තර ක්‍රියාමාර්ගයක් ගැනීමට කාලය එළැඹ තිබේ,” යි කොමසාරිස්වරිය ඇගේ පිටු 17 ක වාර්තාවේ සඳහන් කර ඇත.
මහා පරිමාන මානව හිමිකම් උල්ලංඝන චෝදනා ලබන ශ්‍රී ලාංකිකයන්ට එරෙහිව විදේශ වලදී දේපල සහ සංචාර තහනම් කිරීම ඇතුළු පියවර ගන්නා ලෙසද මානව හිමිකම් කොමසාරිස්වරිය සාමාජික රටවලින් ඉල්ලා තිබුනි.
ස' ගේ සිස්ටම් නිසා පට් පට් ගාලා වැක්සීන් එක ගහගත්තා
පාස්කු බෝම්බයේ මහ මොළකරු කවුද ?
