සයිනොෆාම් එන්නත සඳහා අනුමැතියක් ලැබුණු බවට ජනාධිපතිවරයා සිය අලුත් මාධ්‍ය ප්‍රකාශකයා හරහා කළ දැනුම්දීම
ලෝක සෞඛ්‍ය සංවිධානය විසින් ප්‍රතික්ෂේප කිරීම සමගම වසංගතය පාලනය සඳහා මේ මොහොතේ කඩිනම් විසඳුම එන්නත් කරණය නොවන බව සෞඛ්‍ය විශේෂඥ පිරිසක් ජනාධිපතිවරයාට දැනුම් දී තිබේ.
"එන්නත දුන්නට පස්සේ මේ රෝගීන්ට ඒ එන්නතේ ප්‍රතිශක්තිය ඇඟේ ඉපදීමට යන කාලය බැලුවහම තවත් මාස තුනක් විතර යනකං සැලකිය යුතු ප්‍රමාණයකට අපි ඉතාමත් වේගයෙන් එන්නත් කළත් සැලකිය යුතු ප්‍රමාණයකට ප්‍රතිශක්තිය නිපදවා ගැනීමට නොහැකි බව අපි දැනුවත් කළා."
එවැනි තත්වයක් තුළ ඉතාමත් වේගයෙන් රෝගය පාලනය කිරීමේ අවශ්‍යතාවය මැයි 10 සඳුදා ජනාධිපතිවරයා හා කැබිනට් මණ්ඩලය සමග පැවැති සාකච්ඡාවේදී යළි යළිත් අවධාරණය කළ බව ශ්‍රී ලංකා වෛද්‍ය සංගමයේ සභාපති විශේෂඥ වෛද්‍ය පද්මා ගුණරත්න මැයි 11 අගහරුවාදා කොළඹදී පැවැති මාධ්‍ය හමුවකදී සදහන් කළාය.
කෙසේ වෙතත්, වසංගතය පාලනය කිරීම සදහා රජය ගෙන යන එන්නත් කරණ වැඩ පිළිවෙල ප්‍රශංසාවට ලක් කරන ශ්‍රී ලංකා වෛද්‍ය සංගමය මාධ්‍ය හමුවේදී වැඩි දුරටත් සඳහන් කළේ දීර්ඝකාලීනව රෝගයෙන් මිදීම සඳහා ඇති විසඳුම එන්නත් කරණය බවයි.
සංචරණ සීමා :
වසංගතය ශ්‍රී ලංකාව තුළ තවදුරටත් ව්‍යාප්ත වීමේ වේගය ඉතා අධික බව ජනාධිපතිවරයාට පෙන්වා දී ඇති ශ්‍රී ලංකා වෛද්‍ය සංගමය අවධාරණය කර ඇත්තේ, මෙවැනි වසංගත ලෝකය පුරා පාලනය කර ඇත්තේ දැඩි සංචරණ සීමා පැනවීමෙන් පමණක් බවයි.
"මේ වගේ අවස්ථාවක දැඩි සංචරණ සීමා වලින් පමණක් මේ රෝගය අනිකුත් රටවල පාලනය කර ඇති බවක් අපි රජය දැනුවත් කර සිටියා."
පැවැත්වු සාකච්ඡාවට සාවධානව ඇහුන්කම් දුන් ජනාධිපතිවරයා සිය සංගමය ඉදිරිපත් කළ යෝජනාවලට බොහෝ දුරට අනුතග විය හැකි බව දැනුම් දුන් බවත් විශේෂඥ වෛද්‍ය පද්මා ගුණරත්න සදහන් කළාය.
මේ වන විට දෛනිකව වාර්තා වන කෝවිඩ් මරණ මීට මාසයකට පමණ ඉහතදී කොරෝනාබාධිත වු පුද්ගලයන් බව පෙන්වා දෙන විශේෂඥ වෛද්‍යවරිය එහිදී තව දුරටත් අවධාරණය කළේ ඉදිරි සති තුන තුළ තවදුරටත් කෝවිඩ් මරණ සංඛ්‍යාව සහ අසාධ්‍ය වන රෝගින් ගණන වැඩි විය හැකි බවයි.
රටේ පවතින වසංගත තත්වය පාලනය කිරීම සදහා මැයි 11 අඟහරුවාදා මධ්‍යම රාත්‍රියේ සිට මැයි 30 දක්වා පළාත් අතර සංචරණය සීමා කිරීමට තීරණය කර ඇතැයි රජය දැනුම් දුන්නද, වෛද්‍ය වරුන් සහ ජනාධිපතිවරයා අතර හමුවට පසුදා අමාත්‍ය මණ්ඩලය විසින් තීරණය කර තිබුනේ පළාත් අතර මගී ප්‍රවාහනය පහසු කිරීම සඳහා පුද්ගලික බස් රථ හිමියන්ට සහන සලසා දීමටයි.
කොවිඩ් -19 වසංගත තත්වය හමුවේ අන්තර් පළාත් මගී බස්රථ ධාවන කටයුතු අඛණ්ඩව පවත්වාගෙන යාම සඳහා 2021 අප්‍රේල් මස 01 දින සිට 2021 සැප්තැම්බර් මස 31 දින දක්වා බස්රථ ධාවකයන් ගේ වාර්ෂික ටෙන්ඩර් ගාස්තුවෙන් 50%ක් පමණක් අය කිරීමට සහ අධිවේගී මාර්ගයේ තාවකාලික අවසර පත්‍ර ගාස්තුවෙන් 50%ක් පමණක් අය කිරීමට ප්‍රවාහන අමාත්‍ය ගාමිණී ලොකුගේ විසින් ඉදිරිපත් කරන ලද යෝජනාව අමාත්‍ය මණ්ඩලය විසින් අනුමත කරන ලද බව කැබිනට් කාර්යාලය දැනුම් දී ඇත.
මේ අතර දුම්රිය ගමනාගමන අධිකාරිවරයා පවසා ඇත්තේ 11 දා මධ්‍යම රාත්‍රියේ සිට දුම්රිය ධාවනය සිදු කෙරෙන්නේ පළාත් තුළ පමණක් බවයි.
සෞඛ්‍ය ක්ෂේත්‍රයේ ‘කඩා වැටීමක්’
ඉතාමත් වේගයෙන් රෝගීන් වැඩි වීම නිසා සෞඛ්‍ය ක්ෂේත්‍රයේ කඩා වැටීමක් ඇති විය හැකි බවටත් ශ්‍රී ලංකා වෛද්‍ය සංගමය රජයට අනතුරු අඟවා තිබේ.
පී.සී.ආර් ප්‍රතිපල නිකුත් වීමේ ඇති ප්‍රමාදය නිසා ප්‍රතිපල නිකුත් වන විට ආසාදිත පුද්ගලයා විසින් තවත් බොහෝ පිරිසකට රෝගය පතුරුවා අවසන් බව පවසන විශේෂඥ වෛද්‍යවරිය රජයට දැනුම් දී ඇත්තේ ග්‍රාම නිලධාරී කොට්ඨාශ හුදකලා කිරීමෙන් පමණක් වසංගතය පාලනය කළ නොහැකි බවයි.
චීන එන්නත
ශ්‍රී ලංකාවේ ජනාධිපති ගෝඨාභය රාජපක්ෂ ගේ ඉල්ලීමක් අනුව සයිනොෆාම් එන්නත් හදිසි භාවිතය සඳහා අනුමත කරන ලද බවට ජනාධිපති මාධ්‍ය ප්‍රකාශක මැයි 10 සඳුදා සිදු කළ ප්‍රකාශය ලෝක සෞඛ්‍ය සංවිධානය විසින් පසුදා ප්‍රතික්ෂේප කර තිබේ.
ඩේලි මිරර් පුවත්පත විසින් කරන ලද විමසීමකට පිළිතුරු දෙමින් ලෝක සෞඛ්‍ය සංවිධානය කියා ඇත්තේ එන්නත් ලැයිස්තුගත කිරීමට සාමාන්‍යයෙන් මාස දෙක තුනක කාලයක් ගතවන බවයි.
සුදුසුකම ලබා ගැනීමේ ක්‍රියාවලිය වඩාත් සංකීර්ණ වන බවත්, ඒ සඳහා යම් කාලයක් ගත වන බවත් ඔවුන් සඳහන් කර තිබේ.
මෙම සියලුම එන්නත් හදිසි භාවිතයට අවසර ලබා දී ඇත්තේ එම රටවල් වල අභිමතය අනුව මිස ලෝක සෞඛ්‍ය සංවිධානය අනුමැතියට යටත්ව නොවන බවද ලෝක සෞඛ්‍ය සංවිධානය තවදුරටත් ප්‍රකාශ කර තිබේ.
THE LEADER TV
ලෙබනනයේ ලංකා තානාපතිනී ශානි වැඩ වර්ජනයක : රට විරුවන් අමාරුවේ!
ලංකාවත් ඉන්දියාවේ තත්වයට පත් වුණොත් මොකද කරන්නෙ?
