1200 x 80 DMirror
 
 

මාරාන්තික වසංගතයෙන් ජනතාවගේ ජීවිත බේරා ගැනීම සඳහා පහසුකම් ඉල්ලා සටන් වදින අවස්ථාවේ
සෞඛ්‍ය සේවාව අත්‍යාවශ්‍ය යයි ජනාධිපතිවරයා හදිසියේ නියෝග පැනවීම මර්දනීය ක්‍රියාමාර්ගයක් ලෙස පෙන්වා දෙන වෘත්තිය සමිති එයට දැඩි විරෝධය පළ කර තිබේ.
 
කෝවිඩ්  19 වසංගත තත්වය තුළ දැඩි අවදානමකට ලක්වෙමින් රෝගීන් සමග ඍජුව ගැටෙමින් කටයුතු කරන්නේ සෞඛ්‍ය සේවයේ කාර්ය මණ්ඩලයයි.
 
එහෙත් ඔවුන්ට වසංගතයෙන් ආරක්ෂා වීමට අවශ්‍ය අවම පහසුකම් ලබාදීමට ආණ්ඩුව කටයුතු කර නැති බවයි වැඩ කරන 'ජන බලය' සංවිධානය පවසන්නේ.
 
සෞඛ්‍ය කාර්ය මණ්ඩලවල ද සැලකිය යුතු පිරිසකට මේ වන විට කෝවිඩ්  19 වෛරසය  ආසාදනය වී තිබේ.
 
මේ තත්වය මත හෙද, පරිපූරක වෛද්‍ය   ඇතුළු සෞඛ්‍ය සේවයේ වෘත්තීය සමිති 24 ක් ඒකාබද්ධව සෞඛ්‍ය කාර්ය මණ්ඩල සඳහා අවශ්‍ය පහසුකම් ලබාදීමට බලකිරීමේ වෘත්තීය ක්‍රියාමාර්ගයක් ප්‍රකාශයට පත් කර තිබුණි.
 
ඒ අනුව ජුලි 3 බ්‍රහස්පතින්දා  පෙ.ව. 7.00 සිට  දහවල් 12.00 දක්වා පැය 5 ක් සෞඛ්‍ය සේවකයන් සේවයෙන් බැහැරවීමට කටයුතු කර තිබුණි.
 
එසේම සෞඛ්‍ය සේවකයන් පිරිසක් මේ වන විට තම ඉල්ලීම් වෙනුවෙන් අඛණ්ඩ සත්‍යග්‍රහයක ද නිරත වෙමින් සිටින බවයි වැඩ කරන ජන බලය සංවිධානය පවසන්නේ.
 
 Health workers on token strike 1
Health workers on token strike 4
Health workers on token strike 8
 
'ජන බලය' සංවිධානය චෝදනා කරන්නේ  මෙම වෘත්තීය ක්‍රියාමාර්ගය මර්දනය කිරීමේ අදහසින් ජනාධිපතිවරයා විසින් අත්‍යවශ්‍ය සේවා නියෝග පනවා ඇති බවයි.
 
"එසේ වෘත්තීය ක්‍රියාමාර්ගයක් ප්‍රකාශයට පත්කර තිබියදී 2021 ජුනි 02 දිනැති 2230/9 අංකයෙන් යුතු අතිවිශේෂ ගැසට් නිවේදනය මගින් ජනාධිපතිවරයා විසින් සෞඛ්‍ය ඇතුළු සේවාවන් කිහිපයක් අත්‍යවශ්‍ය සේවා බවට පත්කර ඇත. "
 
ජනාධිපතිවරයා මීට ඉහතදී ඒ ආකාරයෙන්ම කටයුතු කළ අවස්ථාවක්ද 'වැඩ කරන ජන බලය' ජුනි 3 බ්‍රහස්පතින්දා නිකුත් කළ මාධ්‍ය නිවේදනය මගින් පෙන්වා දී තිබේ.
 
"කෝවිඞ් 19 වසංගතයෙන් ආරක්ෂා වීමට ක්ෂේත්‍ර ගණනාවක් විසින් එන්නත් ඉල්ලා සිටීම හා ග්‍රාම නිලධාරීන් විසින් එන්නත් ලබාදෙන ලෙස බලකරමින් වැඩවර්ජනයක් දියත් කළ අවස්ථාවේද මේ ආකාරයෙන්ම එම සේවා අත්‍යවශ්‍ය සේවා බවට පත් කිරීමට කටයුතු කරන ලදී. ඒ හේතුවෙන් එන්නත් නොලබාම ග්‍රාම නිලධාරීන්ගේ වැඩවර්ජනය නතර කෙරුණි."
 
 
වසර එකහමාරකට වැඩි කාලයක් මෙරට කෝවිඩ්  19 වසංගත තත්වය තුළ තම සේවාවන් අඛණ්ඩ සිදු කිරීමට සෞඛ්‍ය සේවයේ කාර්ය මණ්ඩල දැඩි කැපවීමකින් කටයුතු කළ අතර, සෞඛ්‍ය සේවය අත්‍යවශ්‍ය සේවා බවට පත් කිරීමට කිසිදු අවශ්‍යතාවයක් නොතිබුන බවයි වැඩ කරන ජන බලය පවසන්නේ.
 
  
"ඒ තත්වය තුළ පැහැදිලි වන්නේ හදිසියේ මෙලෙස සෞඛ්‍ය සේවය අත්‍යවශ්‍ය සේවා කිරීම ඔවුන්ගේ වෘත්තීය ක්‍රියාමාර්ගය මර්දනය සඳහාම කරන ලද්දක් බවයි."
 
වෘත්තීය ක්‍රියාමාර්ග මර්දනය සඳහා යොදා ගත හැකි ප්‍රබලතම ක්‍රිරයාමාර්ගය වී ඇත්තේ එම සේවාවන් අත්‍යවශ්‍ය සේවා බවට පත් කිරීම යැයි සදහන් කරන වෘත්තිය සමිති නායකයන් තව දුරටත් අවධාරණය කරන්නේ තම සේවාවන්ගේ කටයුතු ක්‍රියාත්මක කිරීම වෙනුවෙන් අවශ්‍ය පහසුකම් සෞඛ්‍ය සේවකයන් විසින් ඉල්ලා සිටින විට එම ක්‍රමවේදය භාවිතා කරමින් ඔවුන්ගේ වෘත්තීය ක්‍රිමාර්ග මර්දනය කිරීම බරපතල කනගටුදායක තත්වයක් බවයි.
 
සෞඛ්‍ය සේවකයන්ට කෝවිඩ්  19 වසංගතයෙන් ආරක්ෂා වීමට අවශ්‍ය පහසුකම් ලබා නොදී මේ ආකාරයෙන් ඔවුන්ගේ වෘත්තීය අරගලය මර්දනය කිරීම ජොස්ප් ස්ටාලින්, රවී කුමුදේශ්, ජගත් ගුරුසිංහ සහ  චින්තක බණ්ඩාර යන වෘත්තිය සමිති නායකයන්ගේ අත්සනින් නිකුත් කර තිබෙන මාධ්‍ය නිවේදනය මගින්  දැඩි විරෝධය පළ කර තිබේ.
 
Health Workers 1
 Health Workers 2
 
Health Workers 3
 
 
 
සුවවිරු සටන
 
වසංගත මර්දනයේ යෙදී සිටින සුව විරුවන්ගේ  ඉල්ලීම දිනා ගැනීම වෙනුවෙන්  යාපනය, මඩකලපුව, අනුරාධපුර, පේරාදෙනිය, කළුබෝවිල, කරාපිටිය සහ රත්නපුර යන ශික්ෂණ රෝහල් හා මහනුවර ජාතික රෝහල මෙන්ම  ශ්‍රී ලංකා ජාතික රෝහලේ ජුනි 03 වැනිදා  උදෑසන හතේ සිට දහවල් 12 දක්වා සේවයෙන් ඉවත් වීමටත්,  මුළු දිවයිනම ආවරණය වන පරිදි සියලු එදින  රෝහල් ඉදිරිපිට දහවල් 1200 සිට 12.30 දක්වා නිහඬ විරෝධතාවයක් පැවැත්වීමටත් වෘත්තිය සමිති විස්සකට අධික සංඛ්‍යාවකින් සැදුම්ලත්  සෞඛ්‍ය වෘත්තිය සමිති එකමුතුව කටයුතු කර තිබුනි.
 
ඒ පහත ඉල්ලීම් 15 දිනා ගැනීම වෙනුවෙනි.
 
01.Covid-19 මර්දන ක්‍රියාවලිය ශක්තිමත් කිරීම සදහා සෞඛ්‍ය සේවා අධ්‍යක්ෂ ජෙනරාල්තුමාගේ මුලිකත්වයෙන් වෘත්තිය සමිති කමිටුවක් පත් කිරීම සහ තීන්දු ගැනීමට අත්‍යවශ්‍ය වු විට ඊට සෞඛ්‍ය ලේකම්තුමාගේ සහභාගීත්වය ලබා දීම,
 
02.වසංගතයෙන් ආරක්ෂා වීම සදහා N95 මුව වැසුම්, ආරක්ෂිත ඇදුම් ආදී පහසුකම් සියලු සෞඛ්‍ය කාර්ය මණ්ඩල සදහා අඛණ්ඩව ලබා දීම,
 
03.රෝහල් Covid කමිටු සදහා වෘත්තිය සමිති නියෝජිතයන් පත් කිරීම සහ වෘත්තිය සමිති සහභාගීත්වයෙන් යුතු රෝහල් උපදේශන කමිටු නැවත ක්‍රියාත්මක කිරීම,
 
04.රාජ්‍ය පරිපාලන චක්‍රලේඛ මගින් ලබා  දී ඇති පරිදි ගර්භනී සෞඛ්‍ය කාර්ය මණ්ඩලයට විශේෂ නිවාඩු ලබාදීම,
 
05.රාජ්‍ය පරිපාලන චක්‍රලේඛ ප්‍රකාරව සියලු සෞඛ්‍ය කාර්ය මණ්ඩලයට විශේෂ නිවාඩු ලබා දීම,
 
06.රජය ප්‍රකාශයට පත් කරන විශේෂ රජයේ නිවාඩු දින සදහා රාජකාරියට වාර්තා කරන කාර්ය මණ්ඩලයට නිවාඩු දින දීමනා ගෙවීම,
 
07.සියලු සෞඛ්‍ය කාර්ය මණ්ඩලය සදහා ප්‍රවාහන පහසුකම් විධිමත්ව හා නොමිලේ ලබා දීම,
 
08.කාර්ය මණ්ඩලවලට Covid-19 ආසාදනය වු විට ප්‍රතිකාර ලබා දීම සහ නිරෝධායනය වීම සදහා විධිමත් ක්‍රමවේදයක් සැකසීම,
 
09.සේවයට වාර්තා කිරීමට විශේෂ අපහසුතා ඇති කාර්ය මණ්ඩල සදහා ආසන්නතම රෝහලක/සෞඛ්‍ය ආයතනයක සේවයට වාර්තා කිරීමට ඉඩ ලබා දීම,
 
10.ආදේශක/අනියම් සෞඛ්‍ය කාර්ය සහයකයන් සදහා විශේෂ නිවාඩු දින හා නිරෝධායන කාල සීමාවන්ගේදී දෛනික වැටුප් ලබා දීම,
 
11.සියලු කාර්ය මණ්ඩලවලට බදවා ගැනීම්, පුරප්පාඩු පිරවීම කඩිනමින් සිදු කිරීම,
 
12.අනියම් හා ආදේශක සෞඛ්‍ය කාර්ය  සහයකයන් ස්ථිර කිරීම,
 
13.සියලු කාර්ය මණ්ඩල වලට ගෙවන අතිකාල, නිවාඩු දින දීමනා, ඇමතුම් දීමනා, සීමාවන් ඉවත් කිරීම,
 
14.Covid-19 රාජකාරී සිදු කරන සියලු කාර්ය මණ්ඩල සදහා ක්‍රමවත් ලෙස ආහාර සැපයීම සහ සංචරණ සීමා පවතින දින වලදී, සියලු සෞඛ්‍ය කාර්ය මණ්ඩල වලට ආහාර සපයා ගැනීම සදහා විධිමත් සහනදායි වැඩපිළිවෙලක් ස්ථාපිත කිරීම,
 
15.Covid වසංගත තත්වය යටතේ අවදානම් හා දුෂ්කර සේවාවන් සැපයීම වෙනුවෙන් සියලු සෞඛ්‍ය කාර්ය මණ්ඩල සදහා විශේෂ දීමනාවක් ලබාදීම,
 
 
 
 
ඕස්ට්‍රේලියානු රජයෙන් කෝටි ගණනක සෞඛ්‍යාරක්ෂක ආම්පන්න 
 
fdsdf 
 
ඒ අතර සෞඛ්‍ය බලධාරීන් අබිබවා යමින් ජනාධිපති ගෝඨාභය රාජපක්ෂ විසින් පත් කර ඇති කෝවිඩ් මර්දන අධිකාරියේ ප්‍රධානී යුද හමුදාපති ශවේන්ද්‍ර සිල්වාට ඕස්ට්‍රේලියානු රජය විසින් ඊයේ දිනයේ කෝටි ගණනක සෞඛ්‍යාරක්ෂක ආම්පන්න තෑගි දී තිබේ. 
 
එහිදී, ශ්‍රී ලංකාවේ ඔස්ට්‍රේලියානු මහකොමසාරිස් ඩේවිඩ් හොලී සහ ඔස්ට්‍රේලියානු ආරක්ෂක උපදේශක කපිතාන් ඉයන් කේන් යුධ හමුදාධිපති ජෙනරල් ශවේන්ද්‍ර සිල්වා ට කිලෝග්‍රෑම් 6300ක් බරැති සෞඛ්‍යාරක්ෂක මෙවලම් ප්‍රදානය කර ඇත.
 
බත්තරමුල්ල යුද්ධ හමුදා මූලස්ථානයේ දී භාරගත් එම උපකරණ අතර පුද්ගලික ආරක්ෂක ඇඳුම් 16,500ක්, මුව ආවරණ 25,000ක්, අත් වැසුම් කට්ටල 100,000ක්, ඇස් ආවරණ 175ක් සහ සායනික කටයුතු සඳහා භාවිත කළ හැකි ලීටර් 25ක ධාරිතාවෙන් යුතු කුඩා සිසිලන බහාලුම් 15ක් ද ඇති බව යුද හමුදාව පවසයි.
 
කෝවිඩ් මර්දන කටයුතු සඳහා මේ වනවිට ශ්‍රී ලංකාවට ඕස්ට්‍රේලියානු ඩොලර් මිලියන 11.7ක් (රුපියල් කෝටි 18ක් පමණ) ආධාර ලබා දී ඇති බව කොළඹ ඕස්ට්‍රේලියානු මහ කොමසාරිස් කාර්යාලය දැනුම් දී තිබේ. 
 
 

 


 

THE LEADER TV 

 

පොලිස් ඇමති පියුමිට අමතලා!

 

 

සාපය | The Leader TV

  

logo

subscribeYT

subscribeYT

නවතම පුවත්