1200 x 80 DMirror
 
 

අගනගරයේ පිහිටි ඉපැරණි ගොඩනැගිලි සමූහයක් විදේශිකයන්ට පවරා දීමට එරෙහිව පොදු විරෝධයක් පෙළ ගස්වන
බවට දිවයිනේ ප්‍රමුඛතම බැංකු සේවක සංගමයක් ආණ්ඩුවට අනතුරු අගවා තිබේ.
 
 දැනට විදේශිකයන්ට විකුණා ඇති රාජ්‍ය දේපල නැවත රජයට පවරා ගැනීමට කටයුතු කරන බවට ප්‍රතිඥා දෙමින් බලයට පැමිණි වත්මන් ආණ්ඩුවද මුදල් අමාත්‍යාංශය යටතේ සෙලන්දිවා නැමැති ආයතනයත් ගොඩනඟා එම ආයතනය යටතට කොළඹ කොටුවේ පිහිටි ඓතිහාසික මෙන්ම පුරාවිද්‍යාත්මක අති විශාල වටිනාකමක් සහිත ගොඩනැගිලි රාශියක් පවරා ගැනීමට පසුගිය කැබිනට් මණ්ඩල රැස්වීමකදී තීරණය කර ඇති බවයි ලංකා බැංකු සේවක සංගමය පවසන්නේ.
 
 "එහිදී කොළඹ මහ තැපැල් කාර්යාලය, විදේශීය අමාත්‍යාංශ ගොඩනැගිල්ල, ලංකා බැංකුව යෝර්ක් වීදිය ගොඩනැගිල්ල (GOH Building), හිල්ටන් හෝටලය, හයිට් (Hytt) ගොඩනැගිල්ල, ගෆූර් ගොඩනැගිල්ල ආදී ගොඩනැගිලි සමූහයක් පළමු අදියරේදී පවරා ගැනීමට කැබිනට් මණ්ඩලය අනුමැතිය ලබාදී ඇත."
 
postel colombo
 
1955 අගෝස්තු මස 01 වන දින ලංකා බැංකුව විසින් මිලදී ගනු ලැබූ යෝර්ක් වීදිය ගොඩනැගිල්ල වසර 30 කට අධික කාලයක් ලංකා බැංකුවේ ප්‍රධාන කාර්යාලය ලෙස භාවිතා කරන ලද ගොඩනැගිල්ලක් බව පෙන්වා දෙන ලංකා බැංකු සේවක සංගමයේ ප්‍රධාන ලේකම් රන්ජන් සේනානායක අවධාරණය කරන්නේ, පෞරාණික හා සංස්කෘතිමය වටිනාකමින් අනූන මෙම ගොඩනැගිල්ල ලංකා බැංකුව අයත් වුවද එය පුරාවිද්‍යාත්මක වටිනාකමක්ද සහිත “සමස්ත ජාතියේම අභිමානය විදහා දක්වන සංකේතයක්” බවයි.
 
මෙම ගොඩනැගිලි වලින් බහුතරයක් යටත් විජිත සමයේ ඉදිකරන ලද පුරාවස්තු ලෙස සැලකෙන ඒවාය.
 
වෘත්තිය සමිති නායකයා පෙන්වා දෙන පරිදි මෙම සෙලන්දිවා ආයතනයේ හිමිකාරිත්වයෙන් 34% ක් ආයෝජකයන් සඳහා විවෘත වන අතර, සෙල්න්දිවා ආයතනය විසින් පිහිටුවන උප සමාගම් පූර්ණ පෞද්ගලික ව්‍යාපාර වන බැවින්, රාජ්‍ය විගණනයෙන් හා කෝප් කමිටුවට ඇති වගකීමෙන් නිදහස් වේ.
  
මෙම ක්‍රමයද රාජ්‍ය දේපලවල සාරය  උරාබිම සඳහා ගොඩනගන ලද උපායශීලී සැලැස්මක් බව ඔහු වැඩි දුරටත්  පෙන්වා දෙයි.
 
සෙලෙන්දිවා ඉන්වෙස්ට්මන්ට්ස් සමාගම අගමැතිවරයා යටතේ ඇති නාගරික සංවර්ධන කටයුතු අමාත්‍යංශයේ රාජ්‍ය අමාත්‍යවරයාගේ විෂය පථයට අයත් වෙයි.
 
එමෙන්ම කොළඹ කොටස් වෙළඳපොලෙහි ලැයිස්තුගත සමාගමක් බවට Selendiva Leisure සමාගම  මෙම මසදී කොළඹ කොටස් හුවමාරු වෙළඳපළෙහි ලියාපදිංචියට සුදානම් වන බවටද තොරතුරුද ලැබී ඇති බවයි රන්ජන් සේනානායක පවසන්නේ.
 
 වෘත්තිය සමිති නායකයා අවධාරණය කරන පරිදි කොළඹ කොටුව ප්‍රදේශයේ ඇති ආර්ථික මර්මස්ථානයන් මෙන්ම ඓතිහාසික, සංස්කෘතික මෙන්ම පුරාවිද්‍යාත්මක අති විශාල වටිනාකමකින් යුතු ගොඩනැගිලි මේ ආකාරයට පෞද්ගලික අංශයට හෝ ජාත්‍යන්තර ආයෝජකයන්ට පැවරිමට ගන්නා ලද තීරණය නතර කරන මෙන් 2021 ජූනි මස 03 දින අග්‍රාමාත්‍යවරයා වෙත දැනුම් දීමට සංගමය කටයුතු කර ඇත.
 
 ඊට අමතරව 2021 ජූනි මස 11 දින මේ සම්බන්ධයෙන් ආගමික නායකයන්, දේශපාලන පක්‍ෂ නායකයන්, දේශපාලඥයන් හා සිවිල් ක්‍රියාධරයන් දැනුවත් කිරීමට ලංකා බැංකු සේවක සංගමය කටයුතු කර ඇත.
 
  
"ඉදිරියේදී ඔවුන් හා එක්ව මේ පිළිබඳ සාකච්ඡා කර පොදු විරෝධයක් පෙළ ගැස්වීමට අපේක්‍ෂා කරමු. තවද අප සංගමය ඇතුළු ස්වාධීන වෘත්තීය සමිති රාශියක් එක්ව පිහිටුවාගෙන ඇති පොදු දේපල හා මානව හිමිකම් සුරැකීමේ සංවිධානය මෙම අපරාධයට එරෙහිව කටයුතු කිරීමට තීරණය කර ඇත. ඊට අමතරව අප සංගමය ඇතුළු විවිධ වෘත්තිකයන්ගෙන් සැදුම්ලත් වෘත්තිකයන්ගේ ජාතික පෙරමුණ මගින්ද මීට එරෙහිව පියවර ගැනීමට මේ වනවිට සාකච්ඡා කර ඇත."
 
රට තුළ මතු වී තිබෙන වසංගත තත්වය ප්‍රයෝජනයට ගනිමින් ආණ්ඩුව විසින් ප්‍රජාතන්ත්‍ර විරෝධීව අතිශය වටිනාකමකින් යුතු රටේ මහජනතාවට අයිති පොදු දේපල මේ ආකාරයට අපහරණයට ලක්කරමින් විකුණා දැමීමට ගෙන ඇති තීරණයට එරෙහිව සියලූ බලවේග පෙළ ගැස්වීමට අපේක්‍ෂා කරන බව ලංකා බැංකු සේවක සංගමය මාධ්‍ය නිවේදනයක් මගින් වැඩි දුරටත් අවධාරණය කර තිබේ.
 

 

 


 

THE LEADER TV 
 
 
 
වැඩිකළ තෙල් මිලේ සැඟවූ කොමිස් කතාව?
 
 
 
ලන්සා 'ස' ට ටොකු දෙද්දී : බැසිල්ටත් කොක්කක්...!
 
logo

subscribeYT

subscribeYT

නවතම පුවත්