රිමාන්ඩ් කර සිටින අහ්නාෆ් ජසීම්ට සමාන පහසුකම් දීමට උසාවි නියෝගයක්

ත්‍රස්ත මර්දන හා විමර්ශන කොට්ඨාශයේ වසරකට වැඩි කාලයක් රඳවා තබාගෙන මේ වන විට රිමාන්ඩ් කර සිටින මුස්ලිම් තරුණ කවියකුට

අනෙකුත් රිමාන්ඩ් රැදවියන්ට ලබාදෙන සියලුම හිමිකම් ලබා දිය යුතු බවට අධිකරණය නියෝග කර තිබේ.

 

අහ්නාෆ් ජසීම් කවියාගේ නීතිඥයන්  මෝසමක් මඟින් කළ ඉල්ලීමක් අනුව ජුනි 22 අගහරුවාදා කොළඹ ප්‍රධාන මහේස්ත්‍රාත් අධිකරණයේ නඩුව කැදවු අවස්ථාවේ කවියාගේ නීතිඥයන්ට තම සේවාදායකයා හමුවීමට පහසුකම් සලසන ලෙස බන්ධනාගාර දෙපාර්තමේන්තුවට නියම කළ කොළඹ අතිරේක මහේස්ත්‍රාත් චන්දිම ලියනගේ වැඩි දුරටත් නියෝග කර ඇත්තේ, කවියාට ඔහුගේ දෙමව්පියන් හමුවීම ඇතුළුව සෙසු රිමාන්ඩ් රැදවියන්ට  ලබා දෙන සියලුම හිමිකම් ලබා දීමට කටයුතු කරන ලෙසයි.

 

 

 

 

 

යුරෝපා පාර්ලිමේන්තුව විසින් ශ්‍රී ලංකාවට එරෙහිව වඩාත් දැඩි පියවර අනුමත කරන යෝජනාවක් සම්මත කර සතියක් ගත වීමටත් මත්තෙන්, ත්‍රස්ත මර්දන හා විමර්ශන කොට්ඨාශය (CTID) මගින් වසරකට වැඩි  කාලයක් රඳවාගෙන සිටි අහ්නාෆ් ජසීම් කවියා ඥාතීන්ට හෝ නීතිඥයන්ට නොදන්වාම අධිකරණයට ඉදිරිපත් කර රිමාන්ඩ් කර තිබුනි.

 

 කවියා වෙනුවෙන් පෙනී සිටින නීතිඥ සංජය විල්සන් ජයසේකර අඟහරුවාදා අධිකරණයට දැනුම් දී ඇත්තේ අහ්නාෆ් කවියාට එරෙහිව එල්ල කර ඇති අන්තවාදයට සම්බන්ධ බවට ඇති චෝදනා පිළිගනිමින්, පාපොච්චාරණයක් බලහත්කාරයෙන් ලබා ගැනීමේ අරමුණින්, වසරකට අධික දීර්ඝ කාලයක් ත්‍රස්ත විමර්ශන කොට්ඨාශය භාරයේ රදවා ගනිමින් ඔහු මානසික වධයට ලක් කර ඇති බවයි.

 

 මේ හේතුවෙන්, අහ්නාෆ් ගේ මානසික සහ ශාරීරික සෞඛ්‍ය තත්වය සම්බන්ධයෙන් වෛද්‍ය වාර්තා කැදවන ලෙසට අධිකරණ නියෝග ලබා ගැනීම වෙනුවෙන් වූ තීරණාත්මක ඉල්ලීම් අධිකරණයට ඉදිරිපත් කිරීම වැළැක්වීමේ අරමුණින්, ත්‍රස්ත විමර්ශන කොට්ඨාශය විසින් ද්වේශසහගත ලෙස හිතාමතාම මෙසේ රහසිගත ලෙස ඔහුව අධිකරණයට රැගෙන එමින්, ඒ බව දෙමව්පියන්ට හෝ ඔහුගේ නීතිඥයන්ට දැනුම් නොදුන් බවත් විත්තියේ නීතිඥයා අධිකරණය හමුවේ  ප්‍රකාශ කර තිබේ.

 

 

 

 

නීතිඥයා වැඩි දුරටත්  අධිකරණය හමුවේ පෙන්වා දී ඇත්තේ, අධිකරණය නොමග යවමින් කවියාගේ නිදහසට මග ඇවිරීමට පොලිසිය කටයුතු කර ඇති බවයි

 

ත්‍රස්තවාදය වැළැක්වීමේ පනතේ 7 (2) වගන්තිය යටතේ ත්‍රස්ත විමර්ශන කොට්ඨාශය විසින් අහ්නාෆ් කවියා අධිකරණය වෙත ඉදිරිපත් කර ඇතත්,  එහි 7 (1) වගන්තිය යටතේ ඔහු ඉදිරිපත් කළ යුතුව තිබූ බව පවසන නීතිඥ සංජය විල්සන් ජයසේකර, එසේ වූයේ නම් නඩුව විභාග වෙමින් පවතින අතරතුර සැකකරු නිදහස් කිරීම සඳහා නීතිපතිවරයාට අභිමතයක් ලැබෙන බව නීතිඥයාගේ තර්කයයි.

 

 

එයට අමතරව, අහ්නාෆ් නිදහස් වන අවස්ථාවේදී ලබාගත හැකිවන පරිදි, රැඳවුම් භාරයේ සිටියදී කවියා ලියා ඇති කවි සහ ඔහුගේ කුරානය සුරක්ෂිතව තබා ගන්නා ලෙස ත්‍රස්ත විමර්ශන කොට්ඨාශය හෝ බන්ධනාගාර දෙපාර්තමේන්තුවට නියෝග කරන ලෙස ද, අපරාධ නඩු විධාන සංග්‍රහයේ 120 (3) වගන්තිය යටතේ, අහ්නාෆ්ට එරෙහිව ඇති සාක්ෂි වල සාරාංශයක් අධිකරණයට ඉදිරිපත් කරන ලෙස ත්‍රස්ත විමර්ශන කොට්ඨාශය වෙත නියෝග කරන ලෙස, අහ්නාෆ් වෙනුවෙන් ඔහුගේ නීතිඥයා අධිකරණයෙන් ඉල්ලා තිබේ.

 

ත්‍රස්ත විමර්ශන කොට්ඨාශයේ නිලධාරීන් එදින අධිකරණය හමුවේ පෙනී නොසිටි බැවින්, විත්තියේ ඉල්ලීම අනුව ආසන්න දිනයක් ඊලඟ නඩු දිනය ලෙස නියම කරන ලද මහේස්ත්‍රාත්වරයා, ජුනි 29 වන දින අධිකරණය ඉදිරියේ පෙනී සිටීමට ත්‍රස්ත විමර්ශන කොට්ඨාශය වෙත දන්වමින් නොතීසි නිකුත් කර ඇත.

 

නීතිඥ සංජය විල්සන්,  නීතිඥ ස්වස්තිකා අරුලිංගම් සමඟ ජනාධිපති නීතිඥ ඒ.එම්. ඉලියාස් යන නීතිඥයෝ  අහ්නාෆ් ජසීම් කවියා  කවියා වෙනුවෙන් අධිකරණය හමුවේ  පෙනී සිටියහ.

 

 

 

අහ්නාෆ් නිදහස් කරන ලෙස ඉල්ලීමට යුරෝපා ආණ්ඩු එක්වේ