1200 x 80 DMirror
 
 

බදු නොගෙවා යුරෝපා වෙළඳපොලේ භාණ්ඩ අලෙවියට GSP+ සහනය හරහා ශ්‍රී ලංකාවට ලබාදී තිබූ වාසිදායක තත්වය
මෙන්ම ත්‍රස්ත විරෝධි කටයුතු සඳහා ලබාදෙන ආධාරද අහිමිවීමේ අනතුරක් මතුවීමත් සමග ත්‍රස්තවාදය වැළැක්විමේ පනත යටතේ අත්අඩංගුවට ගෙන දීර්ඝ කාලිනව රදවාගෙන සිටි  සැකකරුවන් පිරිසක් නිදහස් කිරීමට රජය පියවර ගෙන තිබේ.
 
බන්ධනාගාර බලධාරීන් පවසා තිබුනේ පොසොන් පොහොය දිනය නිමිති කරගෙන ජනාධිපති විශේෂ සමාව ය‍ටතේ රැඳවියන් 93 දෙනකුට නිදහස ලබා දුන් බවයි.
 
ඒ අතර ත්‍රස්තවාදය වැලැක්විමේ පනත යටතේ දීර්ඝ කාලයක්  රඳවාගෙන සිට දඬුවම් විඳ ලබන අවුරුද්දේ නිදහස් වී යාමට නියමිත LTTE සැකකරුවන් 16 දෙනකු ද ඉන්නා බව බන්ධනාගාර ප්‍රකාශක චන්දන ඒකනායක මාධ්‍යවේදීන්ට පැවසීය. 
 
සෙස්සන් අතරින් වැඩි දෙනකු  සුළු වැරදි සම්බන්ධයෙන් බන්ධනාගාරගත වුවන්ය.
  
 
ඇමති නාමල්ගේ ප්‍රකාශය 
 
 
නඩු හෝ චෝදනා ගොනු කිරීමකින් තොරව ත්‍රස්තවාදය වැලැක්වීමේ පනත යටතේ දීර්ඝ කාලයක් තිස්සේ රදවාගෙන සිටින සැකකරුවන්ට නිදහස ලබා දිය යුතු බව අගමැති මහින්ද රාජපක්ෂගේ පුත් අමාත්‍ය නාමල් රාජපක්ෂ පසුගියදා පාර්ලිමේන්තුවේදී සදහන් කර තිබුනි.
 
ඔහු එහිදී වැඩි දුරටත් සදහන් කර තිබුනේ තමාගේ වයසටත් වඩා වැඩි කාලයක් රදවාගෙන සිටින සැකකරුවන්ද වන බවයි. අමාත්‍ය නාමල් රාජපක්ෂ මේ වන විට වයස අවුරුදු තිස්පහ ඉක්මවු අයෙකි.
 
 
 
 
 
අද දිනයේ ජනාධිපති විශේෂ සමාව ලැබුවන් අතර මරණ දඬුවම ලබා සිටි  හිටපු පාර්ලිමේන්තු මන්ත්‍රී ආර්. දුමින්ද සිල්වා ද වේ.
 
GSP+ සහනය හරහා ශ්‍රී ලංකාවට ලබාදී තිබූ වාසිදායක තත්වය අහිමි වීමේ අනතුරක් මතුවීමත් සමග ත්‍රස්තවාදය වැලැක්වීමේ පනත සංශෝධනයට ඇති සුදානම රජය විසින් මීට ඉහතදී  ප්‍රකාශයට පත් කර තිබුනි.
 
"යුරෝපා සංගමය වෙත සන්නිවේදනය කොට ඇති පරිදි, රජය සිය බැඳීම්වලට අනුකූලව ත්‍රස්තවාදය වැළැක්වීමේ පනතේ විධිවිධාන නැවත සලකා බැලීමේ ක්‍රියාවලියක යෙදී සිටී. මෙම ප්‍රයත්නය සම්බන්ධයෙන්, රජය විසින් අවශ්‍ය සංශෝධන යෝජනා කිරීම සඳහා දැනට පවත්නා නීති අධ්‍යයනය කරමින් සිටින අතර, වෙනත් අධිකරණ බලයන් විසින් අනුගමනය කරනු ලබන ජාත්‍යන්තර විශිෂ්ඨ පරිචයන් පිළිබඳව ද අවධානය යොමු කරනු ඇත."
 
ශ්‍රී ලංකා රජය සිය නිවේදනය නිකුත් කර තිබුනේ යුරෝපා සංගම් පාර්ලිමේන්තුව තුළ සම්මත කරගත් යෝජනාව පිළිබඳ  ප්‍රකාශයක් නිකුත් කරමිනි.
 
 
shani sugath 2021.06.13 
ශානි අබේසේකර සහ සුගත් මෙන්ඩිස්
 
 
වසරකට ආසන්න කාලයක් ත්‍රස්තවාදය වැළක්වීමේ පනත යටතේ නඩු නැතිව රඳවා සිටි හිටපු රහස් පොලිස් අධ්‍යක්ෂ ශානි අබේසේකර සහ උප පොලිස් පරීක්ෂක සුගත් මෙන්ඩිස් විදේශ අමාත්‍යංශ ප්‍රකාශයට පසුදින අධිකරණය විසින් ඇප පිට මුදා හැර තිබිණි.
 
යුරෝපා හවුලේ වෙළඳපොළට පහසුවෙන් ඇතුළුවීමට වරණීය බදු සහනය (GSP+)  හරහා ශ්‍රී ලංකාවට ලබාදී ඇති අවස්ථාව මෙන්ම ත්‍රස්ත විරෝධි කටයුතු සඳහා ලබාදෙන ආධාරද අහිමිවීමේ අනතුරක් මතු වුයේ යුරෝපා පාර්ලිමේන්තුව විසින් ශ්‍රී ලංකාවට එරෙහිව වඩාත් දැඩි පියවර අනුමත කරන යෝජනාවක් සම්මත කරගැනීමත් සමගයි.
 
බෙල්ජියමේ බ්‍රසල්ස් නුවර පිහිටා ඇති යුරෝපා පාර්ලිමේන්තුවේදී ජූනි 10 බ්‍රහස්පතින්දා සම්මත කරගන්නා ලද මෙම යෝජනාව ත්‍රස්තවාදය වැළැක්වීමේ බියකරු පනත යටතේ සිදුවෙමින් පවතින අත්තනෝමතික අත්අඩංගුවට ගැනීම් කෙරේ විශේෂ අවධානයක් යොමුකර තිබුනි.
 
ජ්‍යෙෂ්ඨ පොලිස් අධිකාරි අබේසේකර මෙන්ම, දීර්ඝ කාලයක් සිරකොට තබාගෙන සිටින මානව හිමිකම් නීතිඥ හෙජාස් හිස්බුල්ලා සහ තරුණ කවීයකු වන අහ්නාෆ් ජසීම් ද ඇතුළු සිවිල් සංවිධාන ක්‍රියාකාරීන්, නීතිඥයන් සහ ලේඛකයන් නිසි නීතිමය ක්‍රියාවලි අනුගමනය කිරීමකින් තොරව මෙන්ම යුක්තිය ලබාගැනීමට හැකියාවක් නොලැබෙන ආකාරයෙන් ත්‍රස්තවාදය වැළැක්වීමේ පනත යටතේ අත්අඩංගුවට ගැනීම සහ රඳවා තබාගැනීමද සම්බන්ධයෙන් යුරෝපා පාර්ලිමේන්තුව දැඩි කනස්සල්ල පළකර තිබුනි.
 
 
අහ්නාෆ් රිමාන්ඩ්
 
 Jasim 2021.06.07
 
අහ්නාෆ් ජසීම්
 
 
යුරෝපා පාර්ලිමේන්තුව විසින් ශ්‍රී ලංකාවට එරෙහිව වඩාත් දැඩි පියවර අනුමත කරන යෝජනාවක් සම්මත කර සතියක් ගත වීමටත් මත්තෙන්, ත්‍රස්ත මර්දන හා විමර්ශන කොට්ඨාශය (CTID) මගින් වසරකට වැඩි  කාලයක් රඳවාගෙන සිටි අහ්නාෆ් ජසීම් කවියා ද  අධිකරණයට ඉදිරිපත් කර  රිමාන්ඩ් කර තිබේ.
 
ඔහු අධිකරණයට ඉදිරිපත් කරන බවක් පවුලේ ඥාතීන්ට හෝ ඔහුගේ නීතිඥයා වන තමන්ට හෝ දැනුම් නොදුන් බැවින්  ඔහු වෙනුවෙන් අධිකරණයේ කරුණු දැක්වීමට තිබූ අවස්ථාව අහිමිවී ගිය බව නීතිඥ සංජය විල්සන් ජයසේකර  ප්‍රකාශ කර තිබේ.
 
  
ශ්‍රී ලංකාව එකඟ වී ඇති මානව හිමිකම් පිලිබඳ වගකීම් ඉටුකර නැති බව ඔප්පු වුවහොත්, දැනට ලබාදී ඇති GSP+ සහනය හෙවත් වරණීය බදු ක්‍රමය යටත් ලබාදී ඇති සහන අත්හිටුවන ලෙස යුරෝපා පාර්ලිමේන්තුව විසින් යුරෝපා කොමිසමෙන් දැඩි ලෙස ඉල්ලා තිබුනි.
 
 
වගවීම පිළිබඳ ගැටළු විසඳීම සහ ප්‍රතිසන්ධානයෙහි අඛණ්ඩ ප්‍රගතියක් අත්කර ගැනීම සඳහා ගෙන ඇති ක්‍රියාමාර්ග පිළිබඳව රජය මානව හිමිකම් කවුන්සිලය මෙන්ම යුරෝපා සංගම් මැදිහත්කරුවන් ද නිරන්තරයෙන් යාවත්කාලීන කර ඇති බවයි විදේශ අමාත්‍යාංශය පවසන්නේ.
 
GSP+ සහනය නැවත සලකා බැලීමේ යෙදී ඇති මේ වසරේ නොවැම්බරයේදී යුරෝපා හවුල විසින් ශ්‍රී ලංකාවේ මානව හිමිකම් වාර්තා දැඩි ලෙස ඇගයීමට ලක්වනු ඇති අතර, එහිදී ජාත්‍යන්තර මානව හිමිකම් වගකීම් ක්‍රියාවට නංවා ඇති ආකාරයද සැලකිල්ලට ගනු ඇත.
 
මානව හා කම්කරු අයිතිවාසිකම්, පරිසරය සහ යහපාලනය සුරැකීම සඳහා වන ජාත්‍යන්තර සම්මුති මහින්ද රාජපක්ෂ පාලනය විසින් ක්‍රියාත්මක නොකිරීම නිසා 2010 පෙබරවාරියේදී අත් හිටුවන ලද වරණීය බදු සහනය (GSP+) 2017 මැයි මාසයේදී නැවත ප්‍රදානය කෙරුනේ යහපාලන රජය විසින්   මානව හිමිකම් සම්බන්ධ ජාත්‍යන්තර සම්මුති 27ක් ශ්‍රී ලංකාව විසින් ක්‍රියාත්මක කරනු ඇතැයි යන  විශ්වාසයෙනි.
 
 
 

 
 
THE LEADER TV 
සබ්‍රි අප්සට් දුමින්ද නිදහස්! 
 
 
 
චීන හමුදා හම්බන්තොට?- ඉන්දිය ඩ්‍රෝන හමුදා වට කරයි ?
 
 
logo

subscribeYT

subscribeYT

නවතම පුවත්