1200 x 80 DMirror
 
 

යුද්ධය අවසන් වී අවුරුදු දොළහක් ගතවූ පසුවත්, පොලිසිය හා යුද හමුදාව යන දෙපාර්ශවය විසින්ම ශ්‍රී ලංකාවේ දෙමළ ජනයා සුදුවෑන්වලින් පැහැරගෙන
ගොස් ලේ පැල්ලම් සහිත වධකාගාර වල රඳවාගෙන ප්‍රශ්න කිරීම තවමත් සිදුවෙමින් පවතින බවට ජාත්‍යන්තර වශයෙන් චෝදනා නැගී තිබේ.
 
වද හිංසාවට ගොදුරු වන්නන්ට සහයෝගය දැක්වීමේ ජාත්‍යන්තර දිනය යෙදී තිබෙන ජූනි 26 වැනිදා නිමිත්තෙන් "මේ නම් ක්‍රිකට් නොවේ-ශ්‍රී ලංකාවේ වධබන්ධන" යනුවෙන් නිවේදනයක් නිකුත් කරමින් හෙළි කොට ඇත්තේ වද විඳ පලා ආ දහස් ගණනක් විදේශගතව සිටින බවයි.
 
 
Yasmin Sooka, Chairperson of the Commission on Human Rights in South Sudan present his report at a 40th Session of the Human Rights Council. 12 March 2019. UN Photo / Jean Marc Ferré  
 
ITJP විධායක අධ්‍යක්ෂිකා යැස්මින් සූකා
 
 
“ක්‍රිකට් විකට් පොලු වලට අමතරව මිරිස් කුඩු, ප්ලාස්ටික් කවර, පැට්‍රෝල්, පයිප්ප බට, වතුර බැරල්, වයර් කම්බි, දැල්වූ සිගරට්,  හන තබන යකඩ සහ බොලොක්කවලින් වධකයන්ගේ ආයුධ ගබඩාව සමන්විත වී  තිබේ,” යි ITJP විධායක අධ්‍යක්ෂිකා යැස්මින් සූකා ප්‍රකාශ කළාය.
 
 “යුද්ධය අවසන් වූවායින් පසු දහසකට වැඩි පීඩිතයන් පිරිසක් රට හැර පලාගොස්  තිබෙන ශ්‍රී ලංකාව වධහිංසාව අතින් ලෝක නායකත්වයට පත්ව සිටී. මෑතම පලායාම වාර්තා වී ඇත්තේ 2020 දීය,”  යි ඇය වැඩිදුරටත් පැවසුවාය. 
 
 
ගෝඨාභය රාජපක්ෂ ආණ්ඩුව යටතේ ශ්‍රී ලංකාවේ ආරක්ෂක හමුදා විසින් පැහැරගෙන ගොස් වධහිංසා පමුණුවන ලද දැනට බ්‍රිතාන්‍යයේ සිටින දෙමළ 10 දෙනකු සම්බන්ධ සිදුවීම් තම සංවිධානය විසින් විභාග කොට ඇතැයි ITJP පවසයි. ඒ දහදෙනාගෙන් හතර දෙනකු අල්ලාගැනීමට හේතුව ලෙස පෙනී යන්නේ ජනාධිපති ගෝඨාභය රාජපක්ෂ ට එරෙහිව ජනාධිපතිවරණය ව්‍යාපාරයේ නිරත වීම සහ අතුරුදහන් වුවන්ගේ ඥාතීන්ගේ විරෝධතා වලට සහභාගි වීම යයි නිවේදනයේ දැක්වේ.  
 
 
“විරෝධතාවලටයි, ආණ්ඩුවට විරුද්ධ වෙන වැඩවලටයි සහභාගි වෙච්ච තවත් අය කවුද කියලයි, මේ වගේ වැඩ කරන්න අතුරුදහන් වූ අයගේ ඥාතීන්ට උදව් කළේ කවුද කියලයි ඒගොල්ලො මගෙන් කැඩිච්චි දෙමළෙන් ඇහුවා. ඒවාට සම්බන්ධ අනික් කට්ටිය අඳුන්නලා දෙන්න කියලා මට කිව්වා,”  යි එක් වින්දිතයෙක් උපුටා දක්වමින් ITJP පවසයි.
 
සිරකොට තබාගෙන, වද දී කුරිරු ලෙස දූෂණය කරනු ලැබූ බාලම තැනැත්තාගේ එවක වයස අවුරුදු 19 ක් යයි පවසන ITJP නිවේදනයේ දැක්වෙන පරිදි බ්‍රිතාන්‍යයේ ආරක්ෂාවට පැමිණි පසු තුන්දෙනකුම සියදිවි හානි කරගන්නට උත්සාහ කර තිබේ. 
 
ශ්‍රී ලංකා යුද හමුදාවත් ත්‍රස්ත මර්දන පොලිසියත් අපරාධ කරුවන් අතර ඉන්නා බවට චෝදනා ලබයි. කැලෑ ඇඳුම් හැඳගත් මිනිසුන් විසින් කොළ පාට හමුදා වෑන් රියකට පටවාගෙන ඉන් පසුව වධහිංසා කොට කිහිප වාරයක් දූෂණය කළ ආකාරය විස්තර කළ එක් දෙමළ යෞවනයකු ඔහු රඳවාගෙන සිටි ස්ථානයේ හමුදාවේ උසස් නිලධාරියකු සිටි අයුරු විස්තර කළ ආකාරය ITJP නිවේදනයේ දැක්වේ. 
 
 
“ඒගොල්ලෝ මගේ ඇස් බැඳලා තිබුණු එක ගැලෙව්වා. මාව පොළොවේ දණ ගස්සලයි තිබුනේ. සොල්දාදුවකුයි, මාව ගෙයින් අරං ගිය මිනිස්සු දෙන්නයි නිලධාරියකු වගේ කෙනෙකුයි මං ඉස්සරහ හිටියා. එයා ඔෆිසර් කෙනෙක් කියලා කියන්නේ පපුවේ පදක්කම් වගයකුයි උරිස්සේ තරුයි ගහලා තිබුණු නිසායි. එයා හිටියේ තනි කොළ පාට ආමි යුනිෆෝම් එකක් ඇඳලා.
 
 
හමුදා සෙබළුන් විසින් 2019 අග භාගයේදී වධහිංසා කොට දූෂණය කරනු ලැබූ තවත් දෙමළ තරුණයකු විස්තර කොට ඇති පරිදි ඔහු පැහැරගත් තුන්දෙනාගෙන් එක් අයකු හැඳ සිටියේ හමුදා නිල ඇඳුමකි:
 
“ඒගොල්ලෝ මාව හිර කරලා අල්ලගෙන, මගේ අත් දෙක පස්සට කරලා බැඳලා මාව වෑන් එක ඇතුලට තල්ලු කරලා ඇස් බැන්දා.”
 
ත්‍රස්ත මර්දන හා විමර්ශන කොට්ඨාශය විසින් තමන් රඳවාගෙන සිටි ස්ථානය හඳුනාගැනීමට සමත්වූ මෑතදී වධහිංසාවට ගොදුරු වූවෙක් ඔහු රඳවාගෙන සිටි පොලිස් ස්ථානය සහ ඔහුට හංවඩු ගැසීම ඇතුළු වධහිංසා  දිගින් දිගටම පමුණුවන ලද ගොඩනැගිල්ල හරියාකාර පිහිටි ස්ථානය දක්වමින් රූප සටහනක් ඇඳ දුන් බව ITJP පවසයි.
 
 
“මිනිහා මගේ පිටයි, කකුලේ පහල කොටසයි යකඩ පොල්ලකින් පිච්චුවා. එයා හිටියේ ග්ලවුස් දාලා. යකඩ පොල්ල කොහෙන් ගත්තද, ඒක කොහොම ගිනියම් කළාද කියලා මම දැක්කේ නෑ. මම වේදනාවෙන් කෑ ගැහුවා. ඒ පිච්චුනු එකේ දැවිල්ල සුමාන ගානක් යනකල් තිබුණා.”
 
 
Not Cricket
 
 
“ශ්‍රී ලංකාව ක්‍රිකට් ක්‍රීඩාවට මෙන්ම වධහිංසාවටත් නම් දැරූ රටකි. දශක ගණනාවක් තිස්සේ ආයතනගතව උල්ලංඝන සිදුකෙරෙන බව මුළු රටම පිළිගෙන ආරක්ෂක හමුදාවලට ඔල්වරසන් දීම නවත්වන්නට කාලය පැමිණ ඇත. පීඩිතයන්ට දැන්ම යුක්තිය සලසා දිය යුතුය,”  යි යැස්මින් සූකා වැඩිදුරටත් පවසා තිබේ.
 
දෙමළ හා මුස්ලිම් ජාතිකයන් පීඩාවට පත් කිරීමට ත්‍රස්ත මර්දන නීති යොදාගන්නා බවට ශ්‍රී ලංකාවට එරෙහිව චෝදනා නගන යුරෝපා සංගමය ඒ නිසා රටට ලබා දී ඇති GSP + බදු සහනය ඉවත් කරගැනීමට ගිය සතියේ යෝජනා සම්මත කරගැනීමෙන් අනතුරුව එම නීති වෙනස් කරන බවට ආණ්ඩුව කොළඹ සිටින යුරෝපීය තානාපතිවරුන්ට සහතික වී තිබේ.
 
 
 
 
 
 
 
##########
THE LEADER TV 
 
වෙරළට ගොඩගසන කැස්බෑ, තල්මස් ගැන ආණ්ඩුවෙන් හතර බීරී ටෝක්ස් !
 
 
ස' දුමින්ද නිදහස් කළේ අලි සබ්රි නොදැන ද?
 
 

subscribeYT

subscribeYT

නවතම පුවත්