1200 x 80 DMirror
 
 

 අධිකරණය විසින් නිදහස් කළ ලොව ප්‍රකට ජ්‍යෙෂ්ඨ වෘත්තීය සමිති නායකයකු බලහත්කාරයෙන් ගුවන් හමුදා කදවුරක් තුළ රඳවාගෙන සිටීම ශ්‍රී ලංකාවට ජී.එස්.පී ප්ලස් බදු සහනය නොලැබී යෑමට හේතුවක් විය හැකි
බවට හිටපු අගමැතිවරයා අභිනව මුදල් අමාත්‍යවරයාට අනතුරු අඟවා තිබේ.
 
හිටපු අග්‍රාමාත්‍ය රනිල් වික්‍රමසිංහ ජුලි 09 සිකුරාදා පාර්ලිමේන්තුවේදී මුදල් අමාත්‍ය බැසිල් රාජපක්ෂට  අවධාරණය කළේ  ලංකා ගුරු සංමයේ ප්‍රධාන ලේකම් ජෝසප් ස්ටාලින් යුරෝපීය සංගමය දන්නා පුද්ගලයකු බැවින් ඔහුගේ නිදහස වෙනුවෙන් කඩිනම් පියවර ගන්නා ලෙසයි.
 
 
 අධ්‍යාපනය හමුදාකරණය සහ පුද්ගලීකරණයට එරෙහිව විරෝධතා පැවැත්වූ ජ්‍යෙෂ්ඨ වෘත්තීය සමිති නායකයා ඇතුළු පිරිසක් පොලිසිය විසින් මුලතිව්හි ගුවන් හමුදා කඳවුරක රඳවා තැබීමට ගෙනයනු ලැබුවේ අලුත් මුදල් අමාත්‍යවරයා පදවියේ දිවුරුම් දුන් දවසේමය.
 
 
" වෘත්තීය සමිති නායකයෙක් වන ජෝසප් ස්ටාලින් යුරෝපීය සංගමය දන්න පුද්ගලයෙක්,” යයි රනිල් වික්‍රමසිංහ පාර්ලිමේන්තුවට මතක් කර දුන්නේය.
 
“ඉතින් මම කැමතියි අහන්න විශේෂයෙන්ම මුදල්  ඇමතිතුමාට මේ පිළිබදව වෘත්තිය සමිති එක්ක විගහට සාකච්ඡා කරලා පොලීසිය පිළිබදත් කොමිටියක් පත් කරන්න. නැත්නම් මෙතනින් කරලා තියන හොද වැඩ ටික එක සැරේම හේදිලා යන්න පුළුවන්."
 
 
 
“හොඳ වැඩ” 
 
 
“හොඳ වැඩ” යනුවෙන් හිටපු අගමැති විසින් සඳහන් කරනු ලැබුවේ ශ්‍රී ලංකාවේ අපනයන සඳහා දෙනු ලබන බදු සහන අහෝසි කිරීම සඳහා වන යෝජනාවක්  යුරෝපා පාර්ලිමේන්තුව විසින් සම්මත කරගත් වහාම රජය දෙමළ දේශපාලන සිරකරුවන් පිරිසක් නිදහස් කර යැවීමයි.
 
 GSP+ සහනය ලබාගැනීම සඳහා පසුගිය රජය රකින්නට පොරොන්දුවූ මානව හිමිකම් අතර වෘත්තීය සමිති අයිතිවාසිකම් සහ මහජන උද්ඝෝෂණ පැවැත්වීමේ අයිතියද ඇතුලත් වේ.
 
 
 
sarath
 
කෙසේවෙතත්, පොලිසිය භාර අමාත්‍ය රියර් අද්මිරාල් සරත් වීරසේකර තරයේ කියා සිටියේ උද්ඝෝෂණ සහ රැස්වීම් පවත්වන්නන් අත්අඩංගුවට ගැනීම නවත්වන්නේ නැති බවයි.  
 
 
“තරාතිරම කුමක් වුණත් නීතිය කඩනවා නම් ඒකට පොලීසිය ඉඩදෙන්නේ නෑ. මේ වැඩ වර්ජන සහ රැස්වීම් තහනම් කරලා තියෙන්නේ දේශපාලඥයෝ නෙමෙයි සෞඛ්‍ය සේවා අධ්‍යක්ෂ ජනරාල්වරයායි. ඔහු තමා පොලිස්පතිට ඉතා පැහැදිලි නියෝගයක් දීලා තියෙනවා රෝග ව්‍යාප්ත වෙන නිසා රැස්වීම් හා උද්ඝෝෂණ වහාම නැවැත්විය යුතුයි කියලා. නිරෝධායන පනත යටතේ ඔහුට ඒ නියෝගය දෙන්න පුළුවන්. ඒ නිසා පොලීසිය කළේ ඒ කර්තව්‍ය ඉටුකරන එක විතරයි. තරාතිරම කුමක් වුණත් ඉදිරියේ දී වුණත් උද්ඝෝෂණ කරනවා නම් රැස්වීම් කරනවා නම් අපි අත්අඩංගුවට අරගෙන උසාවියට ඉදිරිපත් කරනවා."
 
පාර්ලිමේන්තුවේ සිටින ජ්‍යෙෂ්ඨතම ජනතා නියෝජිතයෙක් වන රනිල් වික්‍රමසිංහ එහිදී වැඩි දුරටත් අවධාරණය කළේ   රැස්වීම සදහා මුලික අයිතිවාසිකමක් පවතින අතර නිරෝධායන පනත යටතේ කිසිවෙකු  බලෙන් නිරෝධායනය සදහා පිටත් කිරීමේ බලයක් නොමැති බවයි.
 
උසස් අධ්‍යාපනය හමුදාකරණය කිරීමට එරෙහිව අගනුවර දියත් කළ විරෝධතාවයකදී අත්අඩංගුවට ගෙන අධිකරණය විසින් ඇප නියම කළ ජ්‍යෙෂ්ඨ වෘත්තීය සමිති නායක ජෝසප් ස්ටාලින් ඇතුළු පිරිසක් පොලීසිය විසින් බලහත්කාරයෙන් නිරෝධායනය සදහා මුලතිව් ගුවන් හමුදා කදවුරේ පිහිටි නිරෝධායන මධ්‍යස්ථානයක් වෙත යොමු කර තිබුනි.
 
 
WhatsApp Image 2021 07 10 at 9.10.48 AM
            ස්ටාලින් ඇතුළු පිරිස මුලතිව් නිරෝධායන මධ්‍යස්ථානයේ
 
 
අමාත්‍ය සරත් වීරසේකර ඊයේ පාර්ලිමේන්තුවේදී වැඩි දුරටත් සදහන් කර තිබුනේ එම පිරිසට අවශ්‍ය සියලු පහසුකම් සපයා දී ඇති බවයි.
 
"කොහොම වුණත් අපි මීගමුවේදිත් ඒ අයට අවශ්‍ය කරන බෙහෙත් අරන් දුන්නා. මධ්‍යස්ථානයේ සියලුදෙයක් ම අරන් දීලා ඔවුන් ඉතා සතුටින් ඒකේ ඉන්නවා."
 
මුලතිව් ගුවන් හමුදා කදවුරේ සිට මාධ්‍ය වෙත වීඩියෝවක් මුදා හරිමින් ජ්‍යෙෂ්ඨ වෘත්තීය සමිති නායක ජෝසප් ස්ටාලින් අමාත්‍යවරයා ලබා දුන් බව පවසන කිසිවක් නොලැබුන බව අවධාරණය  කරමින්  ඔහුගේ  ප්‍රකාශය හෙලා දැක තිබුනේ " අපිට දුන්නේ හිඟන කෑම " යනුවෙන් පවසමිනි.
 
 
 

 
උද්ඝෝෂණ පවත්වන්නන් තරාතිරම නොබලා අත්අඩංගුවට ගන්නා බව අමාත්‍ය සරත් වීරසේකර ඊයේ පාර්ලිමේන්තුවේදී  සදහන් කළත් සමගි ජන බලවේගය ඊයේ දියත් කළ විරෝධතාවයේදී කිසිවෙකුත් අත්අඩංගුවට ගෙන නොමැති අතර උසස් පොලිස් නිලධාරීන් දෙදෙනකු එහිදි පාර්ලිමේන්තු මන්ත්‍රී  ෆීල්ඩ් මාර්ෂල් සරත් ‌ෆොන්සේකාට ආචාර දක්වන ආකාරය අගනගරයේ ඡායාරූප ශිල්පියකු කැමරා කාචයට හසුකරගෙන තිබුනි.
 
 
 
 
ජෝසප් සහ GSP
 
 
යුරෝපා වෙළෙඳපොළට පහසුවෙන් ඇතුළුවීමට ශ්‍රී ලංකාවට ලබාදී තිබු අවස්ථාව අහිමි වීමේ අනතුර මතුව තිබුනේ බෙල්ජියමේ බ්‍රසල්ස් නුවර පිහිටා ඇති යුරෝපා පාර්ලිමේන්තුවේදී පසුගිය මාසයේ සම්මත කරගන්නා ලද යෝජනාවක් හේතුවෙනි.
 
බෙල්ජියමේ බ්‍රසල්ස් නුවර පිහිටා ඇති යුරෝපා පාර්ලිමේන්තුවේදී පසුගිය මාසයේ සම්මත කරගන්නා ලද එම  යෝජනාවේ  ත්‍රස්තවාදය වැළැක්වීමේ පනත සුළු ජාතීන් මර්දනයට යොදා ගැනීම කෙරේ විශේෂ අවධානයක් යොමුකර තිබුණි.
 
එමෙන්ම, මාධ්‍ය මර්දනය, නීතියේ ආධිපත්‍යය නොමැතිවීම, අතුරුදහන් කිරීම්, අත් අඩංගුවේ ඝාතන, ළමා ශ්‍රමිකයන් සූරාකෑම සහ කම්කරු අයිතිවාසිකම් අහිමි කිරීම ඇතුළු විවිධාකාර මානව හිමිකම් උල්ලංඝනය වීම් ගැන ශ්‍රී ලංකාව දැඩි දෝෂ දර්ශනයට ලක් කර තිබුණි.
 
ත්‍රස්තවාදය වැළැක්වීමේ පනත ඉවත් කරගැනීම ඇතුළු මානව හිමිකම් ආරක්ෂා කිරීම සඳහා දී ඇති පොරොන්දු ඉටු නොකරන්නේ නම්  ශ්‍රී ලංකාවට GSP + බදු සහනය මෙන්ම ත්‍රස්ත විරෝධි කටයුතු සඳහා ලබාදෙන ආධාරද අහිමිවීමේ අවදානමක් යුරෝපා යෝජනාවෙන් මතුකර ඇත.
 
 
 
204213914 3646292048805100 8080245603569723445 n
 
 
ශ්‍රී ලංකාව එකඟ වී ඇති මානව හිමිකම් පිලිබඳ වගකීම් ඉටුකර නැති බව ඔප්පු වුවහොත්, දැනට ලබාදී ඇති GSP+ සහනය හෙවත් වරණීය බදු ක්‍රමය යටත් ලබාදී ඇති සහන අත්හිටුවීමේ අවදානමක්  මතුව පවතී.
 
GSP+ සහනය නැවත සලකා බැලීමට නියමිත මේ වසරේ නොවැම්බරයේදී යුරෝපා හවුල විසින් ශ්‍රී ලංකාවේ මානව හිමිකම් වාර්තා දැඩි ලෙස විමර්ශනය කරනු ඇති අතර, එහිදී සුළු ජාතීන්ගේත්, කම්කරුවන්ගේත් අයිතිවාසිකම් රැකීම ඇතුළු ජාත්‍යන්තර මානව හිමිකම් වගකීම් ක්‍රියාවට නංවා ඇති ආකාරයද සැලකිල්ලට ගනු ඇත.
 
මානව හා කම්කරු අයිතිවාසිකම්, පරිසරය සහ යහපාලනය සුරැකීම සඳහා වන ජාත්‍යන්තර සම්මුති මහින්ද රාජපක්ෂ පාලනය විසින් ක්‍රියාත්මක නොකිරීම නිසා 2010 පෙබරවාරියේදී අත් හිටුවන ලද වරණීය බදු සහනය (GSP+) 2017 මැයි මාසයේදී නැවත ප්‍රදානය කෙරුනේ රනිල් වික්‍රමසිංහ අගමැති ධුරය දැරු  යහපාලන රජය විසින්  පොරොන්දු වූ පරිදි මානව හිමිකම් සම්බන්ධ ජාත්‍යන්තර සම්මුති 27ක් ශ්‍රී ලංකාව විසින් ක්‍රියාත්මක කරනු ඇතැයි යන  විශ්වාසයෙනි.
 
චීනය ළඟට ශ්‍රී ලංකාවේ විශාලතම වෙළෙඳ හවුල්කරු වන්නේ යුරෝපයයි.
 
 
THE LEADER TV 
අගමැතිට විෂ් කරන්න ගිය තිස්ස මදිනොකියන්න අහගනි!
 
බැසිල් එක්ක බෑ : ශ්‍රීලනිපය ආණ්ඩුවෙන් දොට්ට...? 

subscribeYT

subscribeYT

නවතම පුවත්