ත්‍රිකුණාමලයේ අනවසර සංචාරක ඉදිකිරීම් ධීවරයන්ට හරස් වේ

 

ත්‍රිකුණාමලය ඩච් බේ වෙරළ තීරයේදී ජුලි 28 බදාදා හවස් යාමයේ ගිනි පන්දම් ද දල්වමින් දියත් කළ විරෝධතාවය සංවිධානය කර ඇත්තේ සමස්ත ලංකා පොදු ධීවර සම්මේලනය විසිනි.

 

සංචාරක කර්මාන්තය ප්‍රවර්ධනය සදහා බව පවසමින් සංචාරක හෝටල් හිමිකරුවන් විසින් ඩච් බේ වෙරළ තීරයේ අනවසර ඉදිකිරීම් සිදු කර තිබෙන බවට චෝදනා නගන වෙරළ ආශ්‍රිතව ධීවර කර්මාන්තයේ යෙදෙන ධීවරයන් චෝදනා කරන්නේ ඒ හේතුවෙන් තම වෘත්තියට දැඩි බලපෑමක් එල්ල වී ඇති බවයි.

 

වසර හැත්තෑපහකට අධික කාලයක් තිස්සේ පරම්පරාවෙන් කරගෙන ආ වැල්ලබඩ ධීවර කර්මාන්තය හෝටල් කරුවන්ගේ අනවසර ඉදිකිරීම් නිසා දැඩි තර්ජනයකට ලක්ව  තිබෙන බව ඔවුහු වැඩිදුරටත් අවධාරණය කර ඇත.

 

ධීවරයන් තව දුරටත් චෝදනා කරන්නේ  අනවසර ඉදිකිරීම් සම්බන්ධයෙන් බලධාරීන් දැනුවත් කළත් මේ වන තෙක් විසදුම් ලබාදීමට ඔවුන් අපොහොසත් වී ඇති බවයි.

 

රජය විසින් පසුගියදා ඉන්ධන මිල ඉහළ දැමීම නිසා සමස්ත ධීවර ප්‍රජාවම දැඩි අපහසුතාවයකට පත්ව සිටින  බව පෙන්වා දෙන උද්ඝෝෂකයන් එහිදි  රජයට බල කර ඇත්තේ තෙල් මිල වහාම අඩු කරන ලෙසයි.

 

"නාඩගම් එපා.  තෙල් මිල වහා අඩු කරනු" විරෝධතාකරුවන් අත ඇති ප්‍රධාන බැනරයක සදහන්ව තිබේ.