එක්ස්ප්‍රස් පර්ල් නෞකාවෙන් සිදුවු හානිය වෙනුවෙන් ධිවරයන්ට වෙන් කළ වන්දි මුදල් බෙදාදීමේදී
ධීවර ජනතාව අතර ගැටුම් ඇතිකරන ආකාරයෙන් කටයුතු කරන බවට දිවයිනේ ප්‍රමුඛතම ධීවර සංගම් නායකයෙක් ආණ්ඩුවට චෝදනා එල්ල කර තිබේ.
එම බේදකාරී කටයුත්තට රටේ ඉහලම කතෝලික නායකත්වයද හවුල් වී සිටින බව ධීවර නායකයා පවසයි.
"ඉතාම අසාධාරණ, ඒ වගේම ධීවර ජනතාව අතර ගැටුම් ඇති කරන, බෙදීම් ඇති කරන ධිවර ජනතාවගේ කොඳු කඩන විදිහේ වැඩ පිළිවෙලක් ආණ්ඩුව ක්‍රියාත්මක කරගෙන යනවා."
සමස්ත ලංකා ධිවර ජනතා වෘත්තීය සංගමයේ සභාපති අරුණ රොෂාන්ත එම චෝදනාව එල්ල කලේ ශ්‍රී ලංකා මානව හිමිකම් කොමිෂන් සභාවට ජුලි 28 බදාදා පැමිණිල්ලක් ඉදිරිපත් කිරීමෙන් පසු මාධ්‍ය වෙත අදහස් දක්වමිනි.
ධීවර වෘත්තිය සමිති නායකයා පවසන පරිදි එක්ස්ප්‍රස් පර්ල් නෞකාවෙන් සිදුවු හානිය වෙනුවෙන් මේ වන විට ලක් රජයට ලැබී තිබෙන ලක්ෂ හත්දාස් දෙසීයක මුදලින් ලක්ෂ හාරදාස් දෙසීයක මුදලක් ධීවර ජනතාව වෙනුවෙන් වෙන් කර තිබේ.
ධිවරයන්ට වන්දි මුදල් ගෙවීම සම්බන්ධයෙන් තීරණ ගන්නා කමිටුවට ධිවරයන් ඇතුලත් නොවීම සම්බන්ධයෙන්ද කනස්සල්ල පළ කරන අරුණ රොෂාන්ත එහිදී පෙන්වා දුන්නේ, ධීවරයන් මසුන් මැරීමේ කටයුත්තේ නියැලුන ක්‍රමවේදයට අනුව වන්දි මුදල් ගෙවීමේ අසාධාරණ තීරණයකට රජය එළැඹ සිටින බවයි.
"තෙප්පම් වලට පහලොස් දාහයි දවස් දහයට. ඒ වගේම මඩේ අදින දැල් බෝට්ටු වලට අසු දාහයි. එතකොට අපි අහන්නේ ඒ ධිවරයගේයි, මේ ධීවරයගේයි වෙනස මොකක්ද ?"
ධීවරයන්ට වන්දි ගෙවීම සිදු කරනු ලබන්නේ වෘත්තිය අහිමිවීම නිසා බව පෙන්වා දෙන අරුණ රොෂාන්ත එහිදී වැඩි දුරටත් අවධාරණය කළේ ලොකු පොඩි වශයෙන් ධීවරයන් නොමැති බවයි.
"මේ ගොල්ලෝ කොහොමද මේ විදිහට වන්දි බෙදන්නේ. මොකක්ද මේ ගොල්ලන්ට තියන අයිතිය අපේ ජීවිත ගැන මේ විදිහට තීරණ ගන්න. ඒ නිසා අපි කියනවා මේ වෙලාවේ ආණ්ඩුවට වහාම මේ වැරුද්ද නිවැරදි කරන්න ඕනේ. "
පාලකයා සහ පූජකයා
අරුණ රොෂාන්ත ධීවර සංගම් නායකයා පෙන්වා දෙන පරිදි මෙසේ වන්දි ලබා දෙන්නේ ආණ්ඩුවේ හා කාදිනල්වරයාගේ නියෝජිතයන්ගෙන් සැදුම්ලත් කමිටුවක් විසිනි.
"මීගමුව දිස්ත්‍රික් ධීවර සංවිධානය. මේක ඇවිල්ලා ආණ්ඩුවේ සංවිධානයක්. මේකේ ගම්පහ දිස්ත්‍රික්කයේ සභාපති ධීවරයෙක් නෙමෙයි. ඒ වගේම මේකේ ප්‍රධාන සභාපති ධීවර ඇමැති."
සිංගප්පුරු සමාගමකට අයත් එක්ස්ප්‍රස් පර්ල් නෞකාව කොළඹ වරායට ඇතුල්වීම සඳහා ආසන්න මුහුදේ නැංගුරම් ලා තිබියදී ඉකුත් ජූනි මාසයේ දිනෙක ගිණි බත් විය.
ඒ ආසන්න දිනෙක 'මීගමුව පුරවැසි එකමුතුව' නිවේදනයක් මගින් කියා තිබුනේ, නැවේ ප්‍රවාහනය කරමින් තිබු බහලුම් වල පරිසරයට මිනිස් ජිවිතයට මෙන්ම සාගර ජීවීන්ට මත්ස්‍යන්ට හා ජලජ ශාක වලට අතිශයින්ම අහිතකර අම්ල, රසායනික ද්‍රව්‍ය සහ ගින්නෙන් දැවී ගිය විවිධ කොටස් මුහුදට එක්වීම නිසා වචනයෙන් විස්තර කළ නොහැකි තරම් පාරසරික විනාශයක් සිදුවෙමින් පවතින බවට සිය සංවිධානය තහවුරු කරන ඇති බවයි.
නෞකාව ගිණි බත් වීමේ ස්ථානයේ සිට කිලෝ මීටර් 16 ක වට ප්‍රමාණයක් ද මීගමුවේ සිට කොච්චිකඩේ දක්වා කිලෝමීටර් 6 ක් ද පානදුර දක්වා කිලෝ මීටර් 2 ක දුරක් මුහුද තහනම් කළාපයක් ලෙස ප්‍රකාශයට පත් කිරීම තවමත් ක්‍රියාත්මක බව පෙන්වා දෙන අරුණ රොෂාන්ත ධීවර සංගම් නායකයා, පසුගිය සතියේ ප්‍රසිද්ධ මාධ්‍ය හමුවකදී කියා තිබුනේ “බොහෝ අවස්ථා වල ඇතැම් තැන් වලදී නාවික හමුදාව ධීවරයන් පන්නා දමනවා,'' යනුවෙනි.
THE LEADER TV
යසට හිටිය ගීතාට වෙච්ච දෙයක් !
ෆයිසර් වගේ දෙගුණයක් මිලට සයිනොෆාම් ගන්නේ ඇයි?
