1200 x 80 DMirror
 
 

දිනෙන් දින ඉහළ යන වසංගත මරණ හමුවේ මළ සිරුරු ආදාහනය කරගැනීමේ අර්බුදයකට මුහුණ දී සිටින රජය  අගනගරයේ රෝහල් මෘත ශරීරාගාර තුළ
වසර ගණනාවක් තිස්සේ පැවැති මළ සිරුරු පවා භූමදානය සදහා නැගෙනහිර පළාතට යැවීමට තීරණය කර තිබේ.
 
අගෝස්තු 11 බදාදා පැවැති මාධ්‍ය හමුවකට එක්වෙමින් කොළඹ දිස්ත්‍රික් ලේකම් ප්‍රදීප් යසරත්න සදහන් කළේ වසංගත තත්වයත් සමග  මෘත ශරීරාගාර තැම්පත් කරන ස්ථානවල විශේෂයෙන්ම තදබදයක් වීම වැළැක්වීම සඳහා රෝහල් ශිතාගාර තුළ පැවැති සිරුරු අවසන් කටයුතු කිරීමට තිරණය කර ඇති බවයි.
 
"ගරු අධිකරණය ක්‍රියාමර්ග ගෙන මේ දේහයන් ගෞරවාන්විතව ඒ ආදාහනය හෝ භූමදානය සිදු කිරීමට කටයුතු කරලා තියෙනවා. ඒ අනුව හෙට දිනය වනවිට කොළඹ මහ රෝහලේ මෘත ශරීරාගාරයේ තැම්පත් කර ඇති ස්ථානයේ තිබෙන මෘත දේහයන් 40ක් ද ඒ කළුබෝවිල 14ක්ද හඳුනා නොගත් මළ සිරුරු එම දේහයන් භූමිදානය කරන්න හෝ අදාහනය කරනවා."
 
 
 
 
2017 වර්ෂයේ සිට කොළඹ ජාතික රෝහලේ තබා ඇති හඳුනානොගත් මළ සිරුරු 40ක් නිසි නෛතික ක්‍රමවේද අනුගමනය කර මඩකලපුව ඔට්ටමාවඩි ප්‍රදේශයේ භූමදානය කරන ලෙස අධිකරණය නියෝග කළ බව ජනමාධ්‍ය වාර්තා කර තිබේ.
 
ආදාහනාගාර වල ඇතිව තිබෙන තදබදයක් නිසා රෝහල්වල දින දෙක තුනක් තිස්සේ මළ සිරුරු ගොඩ ගැසුනු බව පිලිගත් සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන පසුගියදා සදහන් කර තිබුනේ, මෘතදේහ ආදාහනය කිරීමට එම ප්‍රදේශයන්හි ආදාහනාගාර අවශ්‍ය අතර එම ආහානාගාරවල කොරෝනා මෘතදේහ මෙන්ම සාමාන්‍ය ලෙස මියයන අයගේද මෘත ශරීරය ගෙන එන නිසා යම් තදබදයක් ඇති වී තිබුණ බවයි.
 
 
PHIලාගේ දුක
 
 
ඒ හේතුවෙන් රෝහල්වල දින දෙක තුනක් තිස්සේ මෘත ශරීර තබා ගැනීමට සිදුවූ බවද ඔහු පසුගියදා පිළිගෙන තිබුනි.
 
දිනෙන් දින  කොරෝනාබාධිත මරණ ප්‍රමාණය  ඉහල යෑම නිසා සිරුරු ආදාහනය කිරීමේ ගැටලුවකට මුහුණ දී සිටින බව මහජන සෞඛ්‍ය පරීක්ෂකවරුන්ගේ සංගමය ද පසුගියදා පිළිගෙන තිබුනි.
 
මළ සිරුරු ආදාහනයේදී ඇති වී තිබෙන ගැටළු සහගත තත්වය හමුවේ තම සගයන්  මහත් අපහසුතාවයට පත්ව සිටින අයුරු එම සංගමයේ සභාපති උපුල් රෝහණ පසුගියදා  ජනමාධ්‍ය වෙත හෙලි කර තිබුනි.
 
"ඊයේ දින සන්ධ්‍යාවේ මට මහජන සෞඛ්‍ය පරීක්ෂකවරයෙක් දුරකථන ඇමතුමක් දීලා ඔහුගේ දුක කිව්වා. රෑ එළිවෙනකල් දැන් මෘත දේහ දහනය කරනවා. ඊයේ ඒ වෙනකොට 22ක් කොවිඩ් -19 යැයි සැක සහිත මෘත දේහ දහනය කරලා තියෙනවා. වාද්දුවේ සෞඛ්‍ය අමාත්‍යාංශයේ හිටපු ඉහළ පෙළේ නිලධාරියෙකුගේ ඥාතියෙකුගේ මෘත දේහයක් ආදාහනය කර ගැනීමට මමත් කතා කරා. ඒ වෙනවිටත් ඔහුට මෘත දේහ පොරොත්තු ලේඛනයක් තියෙනවා ආදාහනය කිරීම සඳහා. මේ තත්ත්වය තවදුරටත් පවත්වාගෙන ගියොත් රෝහල් හෝ අතරමැදි ප්‍රතිකාර මධ්‍යස්ථානවත් හදලා වැඩක් නෑ. තවත් ආදාහනාගාර තමයි හදන්න වෙන්නේ කියන එක පැහැදිලියි." උපුල් රෝහණ පවසා තිබුනි.
 
කොවිඩ් වෛරසය හේතුවෙන් බහුතරයක් මියයෑම ඉතා බරපතළ තත්වයක්  බවට පත්ව ඇති බව ජනමාධ්‍ය හමුවේ පැවසු කොළඹ ජාතික රෝහලේ පුහුණු කිරීමේ හෙද නිලධාරිනි පුෂ්පා රම්‍යානිද සොයිසා පසුගියදා අවධාරණය කර තිබුනේ මේ වන විට කොළඹ ජාතික රෝහලේ මෘත ශරීරාගාරයේ ධාරිතාවය ඉක්මාව ගොස් ඇති බවයි.
 
Pushpa ss  
 
දිනකදී වැඩිම මරණ
 
ශ්‍රී ලංකාවේ දිනකදී  කොරෝනාබාධිතව මිය ගිය වැඩිම සංඛ්‍යාව අගෝස්තු 11 වැනිදා රජය නිවේදනය කර තිබේ.
 
සෞඛ්‍ය සේවා අධ්‍යක්ෂ ජනරාල්වරයා තහවුරු කර තිබුනේ අගෝස්තු 10 වැනි අගහරුවාදා දිනයේ පමණක් මෙරටින් කොවිඩ් මරණ 124 ක් වාර්තා වී ඇති බවයි.
 
සෞඛ්‍ය අමාත්‍යාංශයේ වාර්තාවලට අනුව වසංගතය ආසාදනය වීමෙන්  මෙරට තුළ මේ වන  විට සිදුව ඇති සමස්ත  මරණ ගණන 5464 කි.
 
 
සිරුරු පිලිස්සීමට පාන් පෝරණු
 
වසංගතය පාලනය සදහා ආණ්ඩුව දැන්වත් නිසි ක්‍රියාමාර්ග නොගතහොත් සිදු වන මරණ සංඛ්‍යාව ඉහළ ගොස් මළ සිරුරු පිළිස්සීමට රටේ පවතින පාන් පෝරණු ද භාවිත කිරීමට සිදු විය හැකි බවට වත්මන් ආණ්ඩුව පිහිටුවීමට පෙරමුණ ගත් රාජ්‍ය සේවා එක්සත් හෙද සංගමයේ සභාපති මුරුත්තෙට්ටුවේ ආනන්ද නාහිමියෝ පසුගියදා  රජයට අනතුරු අගවා තිබුනි. 
 
ශ්‍රී ලංකාව තුළ වසංගත ව්‍යාප්තිය වේගයෙන් සිදු වෙන මේ මොහොතේ වහා රට තුළ ඇඳිරි නීතිය ක්‍රියාත්මක නොකලහොත් ඉදිරි දින 20 ඇතුලත අමතර මරණ 1,200 ක පමණ සිදු විය හැකි බවට  ප්‍රජා සෞඛ්‍ය විශේෂඥයෝ අනතුරු අගවා තිබේ.
 
ප්‍රාථමික සෞඛ්‍ය සේවා, වසංගත රෝග හා කොවිඩ් රෝග පාලන කටයුතු රාජ්‍ය අමාත්‍ය වෛද්‍ය සුදර්ශනී ප්‍රනාන්දුපුල්ලේ ඊයේ මාධ්‍යවේදීන් සමග පවසා තිබුනේ රජය ගැන පමණක් විශ්වාසය නොතබා  තමන්ගේ ආරක්ෂාව තමන්ම සපයා ගන්නා ලෙසයි.
 
 
නැගෙනහිර අලුත් සුසාන සොයයි
 
 
02 1  
 
වසංගතය ආසාදිතව මිය යන පුද්ගලයන් ගණන දිනෙන් දින ඉහළ යද්දි  සිරුරු භූමදානය කිරීම සඳහා නැගෙනහිර පළාතේ තවත් ස්ථානයක් රජය විසින්  තෝරාගෙන තිබේ.
 
ඒ මේ වනවිට කොවිඩ් මෘතදේහ භූමදානය කරනු ලබන මඩකලපුව දිස්ත්‍රික්කයේ පිහිටි ඔට්ටමාවඩි සුසානභූමියේ ඉඩ ප්‍රමාණය අවසන් වෙමින් පවතින හෙයිනි.
 
කොවිඩ් මෘතදේහ භූමදානය කිරීම සඳහා නැගෙනහිර පළාතේ අම්පාර දිස්ත්‍රික්කයේ ඉරක්කාමම්හි නව භූමියක් තෝරාගෙන ඇති බව සෞඛ්‍ය බලධාරීන් සදහන් කරයි.
 
සෞඛ්‍ය අමාත්‍යාංශයේ වෛද්‍ය තාක්ෂණික අංශයේ අධ්‍යක්ෂ වෛද්‍ය අන්වර් හම්දානි ජන මාධ්‍ය වෙත ප්‍රකාශ කර ඇත්තේ ඉරක්කාමම්හි ඇති මෙම නව භූමිය අක්කර තුනක වපසරියකින් යුතු බවයි.
 
එම භූමියෙහි කොවිඩ් මෘතදේහ දෙදහස් හාරසීයක් (2400) පමණ භූමදානය කිරීමේ හැකියාව පවතින බවද ඔහු සඳහන් කර තිබේ.
 
අම්පාර දිස්ත්‍රික් ලේකම්වරයා එම භූමිය කොරෝනාබාධිත  මෘතදේහ භූමදානය කිරීමට සුදුසු ස්ථානයක් බවට දන්වා ඇති අතර, ඒ සඳහා තාක්ෂණික කමිටුව අවශ්‍ය නිර්දේශ ලබාදීමට කටයුතු කරමින් සිටින බව වෛද්‍ය අන්වර් හම්දානි වැඩි දුරටත් සදහන් කරයි.
 
මේ වනවිට කොවිඩ් මෘතදේහ භූමදානය කරනු ලබන මඩකලපුව දිස්ත්‍රික්කයේ පිහිටි ඔට්ටමාවඩි සුසානභූමියේ ඉඩ ප්‍රමාණය අවසන් වෙමින් පවතින අතර, තවත් එහි මෘතදේහ තුන්සීයක පමණ ප්‍රමාණයක් පමණක් භූමදානය කිරීමට හැකි බව ඔහු වැඩි දුරටත් සදහන් කර තිබුනි.
 
අගෝස්තු 10 අගහරුවාදා පෙරවරු වන විට  ඔට්ටමාවඩි සුසානභූමියේ  මෘතදේහ එක්දහස් හාරසිය හැත්තෑවක් (1470) භූමදානය කර තිබේ.
 
එම කොවිඩ් මෘතදේහ අතර ඉස්ලාම් භක්තිකයන්ගේ  මෘතදේහ එක්දහස් තුන්සිය අසූ තුනක් (1383), බෞද්ධාගමිකයන්ගේ මෘතදේහ විසි හතරක් (24) හින්දු ආගමිකයන්ගේ මෘතදේහ තිස් නවයක් (39) සහ කතෝලික භක්තිකයන්ගේ මෘතදේහ විසි හතරක් (24) ඇතුලත් බව ජනමාධ්‍ය වාර්තා කර ඇත.
 
 

 
THE LEADER TV 
 
කැබිනට් සංශෝධනයක්! ඩලස්ට කැපිල්ලක්? 
 
 
නොදන්නා පාස්කුවක් කියා : ඔසීගේ පුතා ඉල්ලං කයි 
 
 
 

subscribeYT

subscribeYT

WhatsApp Image 2021 09 13 at 13.49.58