පසුගිය සතියේ එනම් අගෝස්තු 2 වැනිදා, ඩුබායිහිදී ගෝඨාභය රාජපක්ෂ ජනාධිපති කරවීම සඳහා තිබෙන 'එළිය' සංවිධානයේ රැස්වීමක් පැවැත්විණි. ඊට අමතරව මැදගොඩ අභයතිස්ස භික්ෂුවද, හිටපු මහබැංකු අධිපති අජිත් නිවාඩ් කබ්රාල් ද ලංකාවෙන් ගොස් සිටියෝය. රැස්වීමේදී මේ දෙදෙනාට තවත් අමුත්තකු එහිදී මුණගැසී තිබිණ. 



abyathisaඉහත ඡායාරූපයේ මැදගොඩ අභයතිස්ස භික්ෂුවට එහා පුටුවේ වාඩිවී සිටින හේ උදයංග වීරතුංගය. මේ අමුත්තා රුසියාවේ හිටපු ලංකා තානාපතිවරයෙකි.

තවදුරටත් හැඳින්වුවහොත්, ලංකාවේ ගුවන් හමුදාවට 2006 වසරේදී, මිග් 27 වර්ගයේ ප්‍රහාරක ජෙට් යානා හතරක්, රුසියානු සමාගමක් වන යුක්රින් මාෂ් වෙතින් මිලදී ගැනීම සඳහා අතරමැදියෙකු හැටියට කටයුතු කරමින්, ඇමෙරිකානු ඩොලර් මිලියන 7ක වංචාවක් කිරීම සම්බන්ධයෙන් ලංකාවේ මුදල් විශුද්ධිකරණ පනත යටතේ චෝදනා ලබා තිබෙන ප්‍රධාන පෙළේ වංචනිකයෙකි. ඔහු ඒවාගේම රාජපක්ෂ පවුලේ සමීප ඥාතියෙකි.

පසුගිය පෙබරවාරි 4 වැනිදා ඔහු ඩුබායි ගුවන්තොටුපොළේදී එරට පොලිසිය විසින් අත්අඩංගුට ගෙන මුදාහරිනු ලැබ තිබේ. ඒ ඔහු අත්අඩංගුවට ගන්නා ලෙස නිකුත්කර තිබුණු ජාත්‍යන්තර වරෙන්තුවක් අනුව යමිනි. ඔහු ලංකාවට ගෙන්වා ගැනීමට විවිධාකාර උත්සාහයන් ලංකාවේ නීතිය ක්‍රියාත්මක කරන ආයතන වෙතින් ගැනුණත් මේ වෙනතුරු ඒ කිසිවක් සාර්ථක වී නැත. 

වරින් වර ඊමේල් හරහා ඔහු 'තමා නිර්දෝෂී බවත් ලංකාවට පැමිණ නඩු විභාගයට මුහුණ දෙන්නට කිසිම බයක් නැති බවත්' නිවේදනය කළත් මේ වනතුරුත් පිටරටක සැඟවී සිටිනවා විනා නීතියට මුහුණ දීමට ලංකාවට ආවේ නැත.

මහාචාර්ය මැදගොඩ අභයතිස්ස භික්ෂුවට එහා පැත්තේ ඉඳගන්නේ එවැනි මහා පරිමාණ වංචාවක චූදිතයෙකි. උදයංග වීරතුංග එම ඩුබායි රැස්වීම සංවිධානය කිරීමෙහි ලාද මූලිකත්වය ගෙන ක්‍රියාකළෙකි. මැදගොඩ අභයතිස්ස වනාහි පසුගිය කාලය පුරාම වර්තමාන ආණ්ඩුවේ හොරකම්, වංචා දූෂණ ගැන මහත් ආවේගයෙන් කතා කළ, විශේෂයෙන් මහබැංකු බැඳුම්කර වංචාවේ ප්‍රධාන චූදිත අර්ජුන් මහේන්ද්‍රන් පිටරටක සැඟවී සිටීම Madagoda1ගැන ආවේගයෙන් කතා කළ, අනාගතයේ ගෝඨාභය රාජපක්ෂ මහතා රටේ ජනාධිපතිවරයා වන එකම හීනයක් දකින භික්ෂුවකි.

මීට පෙර ගෝඨාභය රාජපක්ෂ ආරක්ෂක අමාත්‍යංශ ලේකම්වරයා හැටියට සිටි කාලයේ, මේ හිමියන්ගේ පන්සල වන කොළඹ, පැපිලියාන සුනේත්‍රාදේවි විහාරයේ සියලු ගොඩනැගිලි ඉදිකිරීම් කටයුතු මෙන්ම, පන්සලට අයත් බොරලැස්ගමුව මංසන්ධියේ ඉඩමක දෙමහල් සුපර් මාකට් සංකීර්ණයක් ඉදිකිරීම සඳහා සම්පූර්ණයෙන්ම නාවික හමුදාවේ ශ්‍රමය යොදවා ගත්තේය. ඒ ගෝඨාභය රාජපක්ෂ හරහා ඔහුගේ ඇණවුම මතය. 

මනුවර්ණ දන්නා තරමට, ත්‍රිවිධ හමුදාවට මෙසේ රජයේ හා පෞද්ගික ගොඩනැගිලි ඉදිරිකිරීම් සඳහා ශ්‍රමය සැපයෙන කාර්යය පැවරෙයි. එය සිදුවන්නේ ආරක්ෂක ඇමතිවරයා හෝ ආරක්ෂක අමාත්‍යංශයේ ප්‍රධානියෙකු හරහාය. ආරක්ෂක හමුදාවලින් සැපයෙන මේ ශ්‍රමය හා වෙනත් ඉංජිනේරුමය සේවාවන් සඳහා සතපහක්වත්  ඒ හමුදාවලට රජයෙන් හෝ එම සේවය ලබා ගන්නා පුද්ගලික ආයතනයෙන් හෝ ගෙවනු නොලැබේ.

 රජය හැරුණුවිට පුද්ගලික අංශයෙන් මෙම සේවා ලබා ගන්නේ පන්සල්, පල්ලි වැනි ආගමික ස්ථාන විසිනි. වෙන විදිහකට කිවහොත්, රජයේ ‌හෝ වේවා පන්සලක් පල්ලියක් හෝ වේවා හමුදාවෙන් මේ සේවය ලබා ගන්නේ නොමිලයේය. පසුගිය රාජපක්ෂ ආණ්ඩුව මේ ආකාරයෙන් හමුදාව නිමක් නැති ඉදිකිරීමේ කාර්යයන් සඳහා යෙදවීය. 


Madagoda2මේ ආණ්ඩුව ඒ තරම් හමුදාව ඒ සඳහා යොදවා ගන්නේ නැති වුණත්, ජනාධිපතිවරයාගේ 'පිබිදෙන පොළොන්නරුව' සංවර්ධන ව්‍යාපෘතිවල ශ්‍රමය සම්පූර්ණයෙන්ම පාහේ සැපයෙන්නේ හමුදාවෙනි. පොළොන්නරුව දිස්ත්‍රික්කයේ පන්සල්වල, ජනාධිපතිගේ අනුග්‍රහයෙන් ඉදිවෙන දාන ශාලා හා වෙනත් ගොඩනැගිලි සඳහා ශ්‍රම දායකත්වය දෙන්නේද මෙලෙස හමුදාවයි.

මැදගොඩ අභයතිස්ස හිමි සිය පන්සලට අයිති සුපර් මාකට්ටුව ගොඩනැගීම සඳහා මෙලෙස පසුගිය ආණ්ඩුව කාලයේ නාවික හමුදාව නොමිලයේම යොදාගත් අතර, එම හමුදා ශ්‍රමිකයන්ට ආහාරපාන සැපයීමේ 'පින්කම' ද පන්සලේ දායක දායිකාවන්ට බෙදා දී නොමිලේම කරවා ගත්තේය. පුදුමය නම් අදත් ඒ පන්ස‌ලේ විහාර මන්දිරය ඉදිකෙරෙන්නේ හමුදා සෙබළුන් විසින් වීමය.

හැම අතින්ම නොඅඩුව මිල මුදල් ආධාර ලැබෙන පැපිලියානේ ප්‍රකට විහාරස්ථානය ගොඩනැගීම සඳහා මහජන බදු මුදලින් නඩත්තු වන රජයේ හමුදා නොමිලේ යොදා ගැනීම වූ කලී ඒ මහජන මුදල් මහ දවාලේ කොල්ලකෑමකි, අවභාවිතයකි. ඒ අතර මේ භික්ෂුව මේ ආණ්ඩුවේ වංචා දූෂණ ගැන වැදි බණ කියයි.

මිග් යානා මගඩිය : ඩොලර් මිලියන 7 ක් ලෙස වංචාවක් !

2006 වසරේදී ගුවන් හමුදාවට මිග් 27 යානා හතරක් මිලදී ගන්නා විට එක් ප්‍රහාරක යානාවක මිල ඇමෙරිකානු ඩොලර් 2,462,000ක් විය. මිග් 27 වර්ගයේ යානා හතරක් මිලදී ගැනීම සඳහාත්, ඒ වන විට (2000දී මිලට ගෙන) ගුවන් හමුදාව සතුව තිබූ මිග් 27 යානා හතරක් අලුත්වැඩියා කිරීම සඳහාත් ගෙවනු ලැබූ මුදල, එහි සැපයුම්කරු වන යුක්‍රේනයේ රජය සතු 'යුක්‍රීන් මාෂ්' සමාගමට නොගෙවා, 'බෙලිමිස්සා හෝලිඩිංස් සමාගම' නමැති තුන්වැනි පාර්ශවයට ගෙවා තිබුණි. 

ලංකාවේ ගුවන් හමුදාව හා යුක්රින් මාෂ් අතර ඇති වූ ගිවිසුමෙහි, මුදල් ගෙවිය යුතු පාර්ශවය හැටියට දක්වා තිබුණේ බෙලිමිස්සා සමාගමයි.

එම බෙලිමිස්සා සමාගම සබෑ ව්‍යාපාරික සමාගමක් නොව හොර ගනුදෙනු සඳහා පවත්වාගෙන යන ලද, හොර සමාගමකි. ලන්ඩන් නගරයේ එම සමාගමට අදාළ නිල ලිපිනයේ තිබුණේ දුරකථන කුටියක් පමණි. 

එවකට ආරක්ෂක අමාත්‍යංශයේ ලේකම් ගෝඨාභය රාජපක්ෂගේ අනුමැතිය මත සිදුවූ මෙම ගනුදෙනුවෙන් ඩොලර් මිලියන 7 ක් ලෙස වංචාකර ඇත්තේ මේ රටේ මහජනතාව බදු හැටියට ගෙවන මුදල්ය. ඒ නිසා ඒ වංචාව පොදු දේපළ මංකොල්ල කෑමකි. අවභාවිතයකි.

PHOTO 2019 08 09 20 55 26මේ ගනුදෙනුව ගැන සන්ඩේ ලීඩර් පුවත්පතෙන් කරුණු හෙළිකළ එහි කතෘ ලසන්ත වික්‍රමතුංගට ඒ වරද සඳහා මහ දවාලේ හමුදා ඝාතකයන්ගෙන් පහර කා මිය යන්නට සිදුවිය. අගෝස්තු 2 වැනිදා ඩුබායිහිදී පැවැති 'එළිය' රැස්වීමේදී මැදගොඩ අභයතිස්ස හිමි සමග ඉදිරිපෙළ අසුන්ගෙන සිටියේ ඩොලර් මිලියන 7ක වංචාවක් කළ බවට චෝදනා ලැබ, ඊට අදාළ නඩු විභාගයට මුහුණ නොදී රටින් පලාගොස් සැඟවී සිටින්නෙකි. 

අභයතිස්ස හිමිට මෙවැනි පුද්ගලයෙකු සමග එකට වාඩිවී සිටින්නට කිසිම හිරිකිතයක්, ලැජ්ජාවක් නැති බව අලුතෙන් කිවයුතු නැත. චීවරයක් දැරුවද අභයතිස්ස හිමිද, මහජන මුදල් අවභාවිතයේ යෙදුනු, තවමත් යෙදෙන කෙනෙකු නිසාය.

ප්‍රශ්නය ඇත්තේ එතැන නොවේ. මේ පිරිස රටේ ඊළඟ ජනාධිපතිවරයා ලෙස පත්කර ගැනීමට ගෝඨාභය රාජපක්ෂ කර මත තබාගෙන යෑමයි. යම් හෙයකින් ගෝඨාභය රාජපක්ෂ රටේ ජනාධිපති වුවහොත්, රාජ්‍ය බලයත් තමන්ගේ පැත්තේ නිසා, මැදගොඩ අභයතිස්ස හිමිගේ මේ මහජන මුදල් අවභාවිතය වැඩිවනු මිස අඩුවනු ඇත්ද? උදයංග විරතුංග වැනි මහා පරිමාණ වංචා ගැන චූදිත රාජපක්ෂ පවුලේ ඥාතීන් නිරුපද්‍රැතව ලංකාවට පැමිණ ඔච්චම් කරමින් කිසිදු දඬුවමක් නැතිව නිදහසේ සිටිනු ඇද්ද?



ගෝඨාගේ 'ගෙස්ටාපෝ' පැරා මිලිටරි හමුදාව !

ඒ අතර, ගෝඨාභය රාජපක්ෂගේ ආරක්ෂාවට ස්වේච්ඡා බල ඇණියක් තනන මුවාවෙන් හැම ඡන්ද කොට්ඨාසයකටම 50 ක පිරිසකගෙන් යුක්ත හිටපු හමුදා සාමාජිකයන්ගෙන් සමන්විත පැරා මිලිටරි හමුදාවක් නිර්මාණය කෙරෙමින් පවතින බව පොහොට්ටුවේ අයගේම ප්‍රසිද්ධ ප්‍රකාශවලින් පැහිදිළි වෙයි. එක් ඡන්ද කොට්ඨාශයකින් 50 ක් වන විට, ඡන්ද කොට්ඨාශ 160 කින් හැදෙන මේ හමුදාවේ ප්‍රමාණය 8000 කි. මේ ලේසි පහසු Madagoda3අවධානමක් නම්‌ නොවේ. 

මෙවැනි පැරා හමුදාවක් සමානවනු ඇත්තේ හිට්ලර්ගේ ගෙස්ටාපෝ මිනීමරු පොලිසියටය. ගෝඨාභය රාජපක්ෂගේ 'ආරක්ෂාවට සිටින' මේ පනස්දෙනා බැගින් වන සන්නද්ධ පුහුණුව ලත් පිරිස, ඊළඟ මොහොතේ ක්‍රියාත්මක වනු ඇත්තේ පැරා හමුදාවක් හැටියට නොවේද?

2015 පෙර ලංකාව මිලිටරි රාජ්‍යයක් කිරීමට ගෝඨාභය රාජපක්ෂ සැලසුම් කළ හැටි අප කිසිවෙකුට අමතක නැත. විශ්ව විද්‍යාල සිසුන්ට පවා හමුදා පුහුණුව ලබා දෙමින්, විදුහල්පතිවරුන්ට බ්‍රෙවේ කර්නල් පදවි ලබා දෙමින්, එළවළු විකිණීමටත් හමුදාව යොදවමින්, හෝටල් පවත්වාගෙන යෑම හමුදාවට පවරමින්, අකුරුගොඩ හමුදා රාජධානියක් ඉදිකරමින්, පළාත් ආණ්ඩුකාරවරුන් හා ප්‍රධාන සිවිල් තනතුරුවලට හිටපු හමුදා නිලධාරීන් යොදවමින් ආණ්ඩුවේ විවේචනයන් පැරා මිලිටරි කණ්ඩායම් හා සුදු වෑන් යොදවා පැහැරගෙන විත් අතුරුදන් හා ඝාතනය කරමින් රට තුළ මහා මිලිටරි රාජ්‍යක් බිහි කිරීමේ කාර්යයේ යෙදී සිටියේ ගෝඨාභය රාජපක්ෂය.

පොට්ට කාසි තත්වයට වැටෙන මහින්ද !

 යම් තරමකට හෝ ප්‍රජාතන්ත්‍රවාදය ගැන විශ්වාසය තබන ජනාධිපති රාජපක්ෂට පවා ඒ හමුදාකරණයට එරෙහිව කළ හැකි කිසිවක් තිබුණේ නැත. යම් හෙයකින් මේ මිලිටරි මනසැති හිතුවක්කාර තැනැත්තා රටේ ජනාධිපති වුවහොත් කුමක් විය හැකිද? ඔහුට බලපෑමක් කළ හැකි කිසිදු බලවේගයක් නොපවතින තැනට වැඩ සිදුවනු ඇත. රාජපක්ෂ පවුලේ මහින්ද වැනි අය පවා සම්පූර්ණයෙන් වැටෙනවා ඇත්තේ පොට්ට කාසි තත්වයටය.

එවැනි විටෙක පවතිනු ඇත්තේ එක පැත්තකින්, මිලිටරි අධිපත්‍යයයි. අනික් පැත්තෙන් උදයංග වීරතුංග වැනි මහා පරිමාණ අපරාධ චූදිතයන්ගේ හවුල්කාරීත්වයයි. තවත් පැත්තකින් ඔවුන්ගේ ආරයටම මහජන මුදල් සිය පන්සල්වල පරිහරණය සඳහා අවභාවිතා කරනා මෙන්ම සියලු අපරාධකරුවන් සමග හිරිකිතයක් නැතිව එකට සිටගන්නා මැදගොඩ අභයතිස්ස භික්ෂුව වැනියවුන්ගේ අවස්ථාවාදී ආගමික සංස්ථා දායකත්වයයි.  

මේ සියල්ල එකතුවුණ කළ බිහිවනු ඇත්තේ කුමන ශ්‍රී ලංකාවක්ද?

(අනිද්දා- මනුවර්ණගේ සතිය)

subscribeYT

Cyber Window

නවතම පුවත්