දීර්ඝ කාලයක් තිස්සේ ශ්‍රී ලංකාවේ පොලිසියට දෙන ලද ස්කොට්ලන්ත පොලිස් පුහුණු කිරීම්
මුළුමනින්ම නවතා දමන ලෙස යෝජනා වී තිබියදී අත්හිටුවා ඇති පුහුණුවේ පසු විපරම පිළිබඳ විස්තර ප්‍රසිද්ධියට පත් කරන ලෙස ජාත්‍යන්තර මානව හිමිකම් සංවිධාන සමූහයක් ඉල්ලා සිටී.
මෑත කාලය තුල ඉහළ ගොස් ඇති අත්අඩංගුවේ මරණ, වධබන්ධන සහ හිතුමතේ රඳවා තබාගැනීම් පිළිබඳව වාර්තා වෙමින් පැවතියදී ශ්‍රී ලංකාවේ පොලිසියට ස්කොට්ලන්ත පොලිස් බලකාය විසින් දෙනු ලබන පුහුණු කිරීම් නවතා දමන්නට තීරණය කර ඇත්තේ මැයි මාසයේදීය.
2007 පමණ සිට ශ්‍රී ලංකාවට දෙන පොලිස් පුහුණුව අත්හිටුවා ඇති බ්‍රිතාන්‍යය ප්‍රකාශ කර තිබුණු පරිදි නැවත එම වැඩ සටහන ආරම්භ කිරීමට පෙර පසු විපරමක් කළ යුතුව ඇත.
Keith Brownස්කොට්ලන්ත අධිකරණ අමාත්‍ය කීත් බ්‍රවුන් වෙත ලිපියක් යවන මානව හිමිකම් සංවිධාන හතරක් පවසා ඇත්තේ එරට පොලිසිය විසින් දිගටම දෙනු ලබන පුහුණුව නිසා ශ්‍රී ලංකා පොලිසියේ මානව හිමිකම් උල්ලංඝන අනුමත කරන ආකාරයක් දිස්වීමේ අවදානමක් පවතින බවයි.
“ගෝඨාභය රාජපක්ෂ පාලනය යටතේ ශ්‍රී ලංකා පොලිසියේ මානව හිමිකම් ක්‍රියාකාරිත්වය කිසිදු දියුණුවක් අත් කරගෙන ඇති බවට කිසිදු සාක්ෂියක් නැත,” යි හියුමන් රයිට්ස් වොච්, ෆ්රීඩම් ෆ්‍රොම් ටෝචර්, ශ්‍රී ලංකා කැම්පේන් ෆෝ පීස් ඇන්ඩ් ජස්ටිස් සහ පැක්ස් ක්‍රිස්ටි ස්කොට්ලන්ඩ් යන සංවිධාන විසින් ලියන ලද ලිපියේ සඳහන් වේ.
“ශ්‍රී ලංකාවේත් අනිකුත් තැන්වලත් අපේ අත්දැකීම නම්, පොලිසියේ දූෂිත ක්‍රියාකාරකම් නවතා දැමීමට ආණ්ඩුවේ දේශපාලන අභිප්‍රායක් නැති තැන, කෙතරම් ‘පුහුණු’ ලබා දුන්නත් එමගින් සැලකියයුතු දියුණුවක් අත් කරගත නොහැකි බවයි. ඒ වෙනුවට සිදුවනු ඇත්තේ දිගටම පුහුණු කිරීම සඳහා උත්සාහ දැරීම මගින් දූෂිත පොලිස් බලකායක ක්‍රියා හුදෙක් අනුමත කරන විලාසයක් දිස්වීමයි.”
දැනට අත්හිටුවා ඇති පුහුණුව සම්බන්ධයෙන් කෙරෙන පුනරීක්ෂණය පිලිබඳ විස්තර හා ඒ සඳහා වන නිර්ණායක එළිදක්වාන ලෙස ඉල්ලා සිටින සංවිධාන හතර ශ්‍රී ලංකාවේ ආණ්ඩුවත්, පොලිසියත් “ප්‍රතිසංස්කරණය සඳහා අවංක උවමනාවක් විදහා දක්වන තුරු” වර්තමාන පුහුණු කටයුතු නවත්වන ලෙස ස්කොට්ලන්ත අධිකරණ අමාත්‍යවරයාගෙන් ඉල්ලා සිටී.
ස්කොට්ලන්ත පොලිසියට ශ්‍රී ලංකා පොලිසිය පුහුණු කරන්නට මුදල් ලබා දෙන්නේ බ්‍රිතාන්‍ය විදේශ කටයුතු අමාත්‍යාංශය විසිනි.
බ්‍රිතාන්‍ය පසු විපරමින් කළ යුත්තේ ශ්‍රී ලංකා පොලිසියට දෙන පුහුණුව අවලංගු කිරීම බව නීතිවේදිනී යැස්මින් සූකාගේ ප්‍රධානත්වයෙන් යුත් සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP) පසුගිය සතියේ නිකුත් කළ නිවේදනයකින් අවධාරණය කර තිබුණි.
“වධහිංසා කිරීම සම්බන්ධයෙන් වගකිව යුතු බවට චෝදනා ලබන ඒකක තුනක් භාරව සිටි ශ්‍රී ලංකා පොලිසියේ නිලධාරීන් අඩුම වශයෙන් තුන් දෙනකුවත් බ්‍රිතාන්‍යය විසින් මීට ඉහතදී පුහුණු කරන ලද බව වාර්තා වේ” යනුවෙන් Redress සංවිධානය හා එක්ව ITJP විසින් 2019 දී එක්සත් ජාතීන්ගේ සංවිධානයට ලියා දන්වා තිබුණි.
කෙසේ වෙතත්, ශ්‍රී ලංකාවට පුහුණුව ලබා දීම සඳහා 2012 සිට බ්‍රිතාන්‍ය පොලිස් නිලධාරීන් හෝ පොලිස් කාර්ය මණ්ඩල සාමාජිකයන් හෝ යවන ලද වාර ගණන 90 කි.
ස්කොට්ලන්ත පුහුණුව අහිමි වීම සම්බන්ධයෙන් ශ්‍රී ලංකාවේ පොලිසිය හෝ ආණ්ඩුව මේතාක් ප්‍රතිචාර දක්වා නැත.
සබැඳි පුවත් :
THE LEADER TV
වසංගත සමයේ හෘද රෝගීන්ට උපදෙසක්!
මහින්ද දොලවත්ත ලවා ස'ගෙන් කළ ඉල්ලීම!
