අධ්‍යාපනය හමුදාකරණයට එරෙහිව විරෝධතා දැක්වු ප්‍රධාන පෙලේ ක්‍රියාධරයන් වසංගතයට ගොදුරු කර ඝාතනය කිරීමේ උත්සාහයක් සම්බන්ධයෙන්
දිවයිනේ ප්‍රමුඛතම විශ්වවිද්‍යාල ශිෂ්‍ය සංගමයක් සැක මතු කර තිබේ.
බන්ධනාගාර කොමසාරිස් වෙත යොමු කළ ලිපියක් මගින් අන්තර් විශ්වවිද්‍යාල ශිෂ්‍ය බල මණ්ඩලය චෝදනා කර ඇත්තේ බන්ධනාගාර ගත කිරීමෙන් පසු මාරාන්තික වෛරසය ආසාදනය වු තම සටන් සගයන්ගේ ජීවිත ආරක්ෂාව සම්බන්ධයෙන් බලධාරීන් නිසි කලට නිසි පියවර ගෙන නොමැති බවයි.
" මෙම සිව් දෙනාට බන්ධනාගාර තුලදී කෝවිඩ් ආසාදනය වීම හා එම අවස්ථාවන් වලදී බන්ධනාගාර බලධාරීන් කටයුතු කර ඇති ආකාරය හා අධිකරණයෙන් ඇප ලබා නොදීම යන කරුණු අනුව මොවුන් වසංගතයට ගොදුරු කර ඝාතනය කිරීමේ උත්සාහයක් පවතින බවට සාධාරණ සැකයක් මතුවේ. "
අන්තර් විශ්වවිද්‍යාල ශිෂ්‍ය බල මණ්ඩලයේ වැඩ බලන කැදවුම්කරු උදාර සදරුවන්ගේ අත්සනින් යුතුව සැප්තැම්බර් 13 වැනි සදුදා බන්ධනාගාර කොමසාරිස් වෙත යොමු කළ ලිපිය මගින් තවදුරටත් අවධාරණය කර ඇත්තේ, කොතලාවල පනතට එරෙහිව අගෝස්තු 03 වැනිදා පාර්ලිමේන්තු පිවිසුම ඉදිරිපිට විරෝධතාවට සහභාගී වීම හේතුවෙන් අත්අඩංගුවට ගත් පස්දෙනාගෙන් මේ වන විට බන්ධනාගාරය තුළදී සිව් දෙනෙකුටම කොවිඩ් වෛරසය අසාදනය වී ඇති බවයි.
ඒ අන්තර් විශ්වවිද්‍යාලයීය ශිෂ්‍ය බලමණ්ඩලයේ කැඳවුම්කරු වසන්ත මුදලිගේ, ජයවර්ධනපුර විශ්වවිද්‍යාලයේ මහා ශිෂ්‍ය සංගමයේ සභාපති අමිල සංදීප, කම්කරු අරගල මධ්‍යස්ථානයේ චමීර කොස්වත්ත හා කෝෂිලා හංසමාලි යන අයයි."
අන්තර් විශ්වවිද්‍යාල ශිෂ්‍ය බල මණ්ඩලය පවසන පරිදි ඔවුන් අතුරින් මෑතකාලිනව කොරෝනාබාධිත වී ඇතතේ කෝෂිලා හංසමාලිට ය.
"සැප්තැම්බර් 12 වනදා නිකුත් වූ එහි ප්‍රතිඵල අනුව කෝෂිලා හංසමාලි සහෝදරියට කොවිඩ් 19 අසාදනය වී ඇති බව හෙළි විය. කෝෂිලා අත්අඩංගුවට පත් වන මොහොතේ කොවිඩ් අසාදිතව නොසිටි බව තහවුරු වූයේ බන්ධනාගාරය මගින්ම සිදු කළ පරීක්ෂණවලිනි. ඒ අනුව බන්ධනාගාරගත වී දින 40 කට ආසන්න වෙද්දී සිදු කළ පරීක්ෂණවලින් කොවිඩ් අසාදනය වී ඇත්නම් එසේ අසාදනය වී ඇත්තේ අනිවාර්යෙන්ම බන්ධාගාරය තුළදීය.
කොරෝනාබාධිත වු ක්‍රියාධරයන්ට නිසි වේලාවට ඖෂධ ලබා දී නොමැති බවටත් විශ්වවිද්‍යාල බල මණ්ඩලය චෝදනා කර සිටි.
" මීට පෙර මොවුනට අවශ්‍ය, අත්‍යවශ්‍ය ඖෂධ හෝ ද්‍රව්‍ය ලබාදීම පමණක් නොව නීතිඥ මහත්වරුන්ට හමුවීමට හෝ අවස්ථාව ලබා දී නොතිබිණ. කොවිඩ් ආසාදනය වු පසු ඔවුනට හෝ ඥාතීන් වෙත හෝ දැනුම්දීමට තරම් බන්ධනාගාර බලධාරීන් කටයුතු නොකෙරිණ. "
ඇදුම රෝගයෙන් ද පීඩා විඳින කෝෂිලා හංසමාලිගේ ජීවිතය ආරක්ෂා කරනු පිණිස අවශ්‍ය නිසි වෛද්‍ය ප්‍රතිකාර සඳහා ඇය නොපමාව යොමුකරන මෙන් ඇයගේ පවුලේ පිරිස් ද බන්ධනාගාර බලධාරීන්ගෙන් ඉල්ලා සිටිති.
අන්තර් විශ්වවිද්‍යාල ශිෂ්‍ය බල මණ්ඩලය සිය ලිපිය මගින් තව දුරටත් බලධාරීන්ට දැඩිව අවධාරණය කර ඇත්තේ මොවුන් සියලු දෙනාගේ ජීවිත සම්බන්ධයෙන් වගකීම ආණ්ඩුව සහ වගකිව යුතු රාජ්‍ය ආයතන මගින් බාරගත යුතු බවයි.
අන්තර් විශ්වවිද්‍යාල ශිෂ්‍ය බල මණ්ඩලය බන්ධනාගාර කොමසාරිස් වෙත යොමු කළ ලිපියේ පිටපත් ජනාධිපති, අගමැති, සියලු මානව හිමිකම් සංවිධාන, සියලු තානාපති කාර්යාල, බන්ධනාගාර ඇමැති, අධිකරණ ඇමැති, සියලු මාධ්‍ය ආයතන වෙතත් යොමු කර තිබේ.
එම සම්පුර්ණ ලිපිය පහතින් ,
සබැඳි පුවත් :
THE LEADER TV
රූප සුන්දරිය සමග හිරේට පැන්න ඇමති ?
හම්බන්තොට ස්පේෂල්?
