ගුරු-මුල්ගුරු වැඩ වර්ජනය ශතකයක් වාර්තා කර නොනැවතී පෙරටම

 දින සියය ඉක්මවා වැඩ වර්ජනයක නිරතව සිටි ගුරුවරුන් හා විදුහල්පතිවරුන් සිසු දරු දැරියන් වෙනුවෙන් පාසල්වල අධ්‍යාපන කටයුතු ආරම්භ කළත් වැටුප් විෂමතා ඉවත් කර ගැනීම වෙනුවෙන් කරන සටන දිගටම

පවත්වාගෙන යාමට තීරණය කර ඇත.

 

කෝවිඞ් 19 තත්වය මත වසා දැමුණු පාසල් අදියර කිහිපයක් යටතේ ආරම්භ වන අතර, පළමු සහ දෙවන අදියර ඔක්තෝබර් 25 දින ආරම්භ වේ. 

 

එදින පෙරවරු. 7.30 සිට පස්වරු 1.30 දක්වා පමණක් ඉගැන්වීමේ කටයුතු වල නියැලීමෙන් අනතුරුව දිවයින පුරා විරෝධතා පවත්වන බව ගුරු-මුල්ගුරු සමිති නායකත්වය දැනුම් දෙයි.

 

 

 

 

 

“ආණ්ඩුව පාර්ශවයෙන් ගුරු විදුහල්පති වැටුප් විෂමතාවට පිළිගත හැකි විසඳුමක් ලබා දීමට මෙතෙක් කටයුතු කර නොමැති අතර, ගුරු විදුහල්පතිවරු දරුවන්ගේ අධ්‍යාපන කටයුතු කරගෙන යාමේ අවශ්‍යතාවය සලකා පාසල් ගොස් ඉගැන්වීම් කටයුතු පමණක් සිදු කරමින් වැටුප් අරගලය නව මානයකින් පෙරට ගෙන යාමට තීරණය කර ඇත,” යි සන්ධානය විසින් නිකුත් කළ නිවේදනයක දැක්වේ.

 

“ඒ අනුව 25 දින විදුහල්පතිවරු සහ ප්‍රාථමික ශ්‍රේණිවල ගුරුවරු සේවයට වාර්තා කළ ද ගුරු විදුහල්පති වැටුප් ගැටලූවට විසඳුම් ලැබෙන තුරු පෙ.ව. 7.30 සිට ප.ව. 1.30 ක්වා කාලයේ ඉගැන්වීම් කටයුතු පමණක් සිදු කිරීමට තීරණය කර ඇත,” යි ජෝසප් ස්ටාලින්, මහින්ද ජයසිංහ, සහ යල්වෙල පඤ්ඥාසේකර හිමි අත්සන් කළ නිවේදනයේ සඳහන් වේ.

 

 

ඒ අනුව,

 

#  7.30 ට පෙර හෝ 1.30 පසු හා සෙනසුරාදා ඉරිදා ඇතුළු නිවාඩු දිනවල සිදු කරන කටයුතු, පෞද්ගලික දුරකතන රාජකාරි සඳහා භාවිතා නොකිරීම, 

 

# මාර්ගගත ඉගැන්වීම් දරුවන්ට සහ ගුරුවරුන්ට පහසුකම් ලබාදෙනතෙක් නොකිරීම, 

 

# බාහිර ආයතන වලින් එන රාජකාරි, පාසැලේ විවිධ ව්‍යාපෘති, හැදුනුම්පත් සැකසීමේ වැඩ, සෞඛ්‍ය අංශ වල කටයුතු, වැඩ මුළු උත්සව සංවිධානය, කලාප හා කොට්ඨාස කාර්යාල වලට තොරතුරු ලබාදීම, ප්‍රමිති ලිපිගොණු සැකසීම, වාර්ෂික හා පස් අවුරුදු සැලසුම් සැකසීම, භාණ්ඩ සමීක්ෂණ, පාසැල් පින්තාරු කිරීම්, පාසැල් අධ්‍යාපන චාරිකා හා වැඩමුළු සදහා සිසුන් රැගෙන යාම, පාසැල් සංවර්ධන කමිටු රැස්වීම් පැවැත්වීම ඇතුළු කටයුතුවලින් ඉවත් වීමට... 

 

ගුරුවරු සහ විදුහල්පතිවරු තීරණය කර ඇති බව ගුරු විදුහල්පති වෘත්තීය සමිති සන්ධානය පවසයි.

 

 

“මේ ආකාරයෙන් පාසල්වල ඉගැන්වීම් කටයුතු සිදු කරමින් වැටුප් ගැටලූවට විසඳුම් ලබාදෙන තුරු ගුරු විදුහල්පති වෘත්තීය ක්‍රියාමාර්ග පෙරට ගෙන යාමට ගුරු විදුහල්පති වෘත්තීය සමිති සන්ධානය කටයුතු යොදා ඇති අතර, නොවැම්බර් 12 දින අයවැය මගින් වැටුප් ගැටලූවට විසඳුම් ලෙස අමාත්‍ය මණ්ඩල අනු කමිටුව යෝජනා කළ වැටුප සුභෝධනී වැටුප් යෝජනාවේ පළමු කොටස ලෙස ලබාදීමට කටයුතු නොකළහොත් දැඩි වෘත්තීය ක්‍රිරයාමාර්ගවල නියැලීමට කටයුතු කරන බව ද වැඩිදුරටත් ප්‍රකාශ කර සිටිමු,” යි සන්ධාන නායකත්වය ආණ්ඩුවට අනතුරු අඟවා සිටී.