චීනය විසින් මහජන බැංකුව අසාදු ලේඛණගත කළ බවට පලවන වාර්තා සම්බන්ධයෙන් තමන් වෙත දැනුම් දී නොමැති බව මුදල් අමාත්ය බැසිල් රාජපක්ෂ පවසයි.
ඔහු එබව සඳහන් කළේ, අයවැය ඉදිරිපත් කිරීමට පෙර ආශිර්වාද ලබා ගැනීම සඳහා මහනුවර ශ්රී දළදා මාළිගාව වෙත අද (30) පැමිණි අවස්ථාවේදී මාධ්යවේදීන් කල විමසීමකදීය.
රටටත් ජනතාවටත් හොද අයවැයක් ලබන වසර සදහා ඉදිරිපත් කිරීමට තමන්ට වාසනාව ලැබෙනු ඇතැයි බලාපොරොත්තු වන බව මුදල් අමාත්ය බැසිල් රාජපක්ෂ මෙහිදී පැවසිය.
මහජන බැංකුව කියන කතාව
චීනය විසින් මහජන බැංකුව අසාදු ලේඛණගත කළ බව නොදන්නේ යයි මුදල් අමාත්යවරයා පැවසුවද ඔහු යටතේ ඇති මහජන බැංකුව, කොළඹ පිහිටි චීන තානාපති කාර්යාලයේ, ආර්ථික සහ වාණිජ කාර්යාලය විසින් මහජන බැංකුව අසාදු ලේඛනගත කිරීම සම්බන්ධයෙන් ප්රතිචාර දක්වා තිබේ.
ඒ අනුව මහජන බැංකුව පවසන්නේ අධිකරණය විසින් නිකුත් කරන ලද අතුරු තහනම් නියෝගයක් හේතුවෙන් ගෙවීම් නතර වූ බවය.
අධිකරණයේ ඉදිරි තීන්දු මත ගෙවීම් සම්බන්ධයෙන් ක්රියාමාර්ග ගන්නා බවත් මහජන බැංකුව දැනුම් දී තිබේ.
මෑතකදී මහජන බැංකුව විසින් නිකුත් කළ ණයවර ලිපියට අදාළ ගෙවීම් පැහැර හැරීම සම්බන්ධයෙන් චීන තානාපති කාර්යාලය අදාළ තීරණය ගෙන තිබුණි.
දැනට මතභේදයකට ලක්වී ඇති චීනයේ චින්දාඕ සීවින් බයෝටෙක් සමාගමෙන් ගෙන්වීමට සැලසුම් කළ කාබනික පොහොර සඳහා ණයවර ලිපි නිකුත් කර තිබුණේ, මහජන බැංකුව හරහාය.
නමුත් ශ්රී ලංකා ශාක නිරෝධායන සේවය එම පොහොර සාම්පල පරීක්ෂාවෙන් පසුව පවසා තිබුණේ, එම පොහොර සාම්පලවල අර්වීනියා නම් බැක්ටීරියාව අඩංගු බැවින් එම පොහොර භාරනොගත යුතු බවටය.
සීමාසහිත ලංකා පොහොර සමාගම විසින් චින්දාඕ චීන සමාගමට, එහි දේශීය නියෝජිතයාට සහ මහජන බැංකුවට එරෙහිව වාණිජ මහාධිකරණයෙන් ඉකුත් 22වනදා වාරණ නියෝගයක් ගෙන තිබුණි.
ලංකා පොහොර සමාගම වෙනුවෙන් පෙනී සිටි නීතිඥයින්, ගිවිසුම යටතේ චීන සමාගම විසින් ජීවානුහරණය කළ කාබනික පොහොර ලංකාවට නැව්ගත කිරීමට අවශ්ය වුවද එම තොගයේ ක්ෂුද්ර ජීවීන් අඩංගු වියහැකි බව සිය නැව් උපදෙස් (shipping advice) වලදී සමාගම පිළිගෙන ඇති බව අධිකරණය වෙත එහිදී දන්වා සිටියේය.
ජාතික ශාක නිරෝධායන සේවය (National Plant Quarantine Service) විසින් ඔවුන් වෙත යවන ලද නියැදිය පරීක්ෂා කර ඇති අතර ඇතැම් හානිකර බැක්ටීරියා ඇතුළු ජීවීන් එහි සිටින බවට තහවුරු කර තිබුණි.
මෙම තොගය, කෘෂිකර්ම අමාත්යාංශය විසින් ආරම්භ කරන ලද රුපියල් බිලියනයකට වඩා වැඩි වටිනාකමකින් යුත් ටෙන්ඩර් ක්රියාවලියකින් ලබාගත් නැව්ගත කිරීමක (shipment) කොටසකි.
ඒ අනුව මෙම වාරණ නියෝගය මගින් චීන සමාගම වන චින්දාඕ සීවින් බයෝටෙක් ගෘප් කම්පනි (Qingdao Seawin Biotech Group Co.) වෙනුවෙන් විවෘත කරන ලද ණයවර ලිපියක් (Letter of Credit) යටතේ මහජන බැංකුව විසින් කිසිදු ගෙවීමක් සිදු කිරීමට නොහැකි විය.
එම චීන සමාගමට සහ එහි දේශීය නියෝජිතයාට ණයවර ලිපිය යටතේ කිසිඳු ගෙවීමක් ලබාගැනීමද අවහිර වනපරිදි වාණිජ මහාධිකරණය විසින් වාරණ නියෝගය නිකුත් කර තිබුණි.
පසුව ඉකුත් 26 වනදා ද චින්දාඕ චීන සමාගමට, එහි දේශීය නියෝජිතයාට සහ මහජන බැංකුවට එරෙහිව කොළඹ වාණිජ අධිකරණයෙන් තවත් වාරණ නියෝගයක් නිකුත් කෙරිණි.
චින්දාඕ සීවින් බයෝටෙක් ගෘප් කම්පැනිය වෙනුවෙන් විවෘත කරන ලද ණයවර ලිපියක් යටතේ මහජන බැංකුව විසින් කිසිදු ගෙවීමක් කළ නොහැකි වන ලෙස අදාළ වාරණ නියෝගයේ ද සඳහන් වී තිබේ.
THE LEADER TV
තවත් දොලවත්තලා ඉන්නවද ? බැසිල් හොල්මන් !! | Gossip
කෙරවලපිටියෙන් කෙළවෙන තැනට ? | මොණරවිලගේ ලියමන