මුතුරාජවෙල පවරා ගැනීමට එරෙහි විරෝධය වීදියේ හා උසාවියේ 

අගමැති යටතේ ඇති අධිකාරියකට ජාත්‍යන්තර පිළිගැනීමක් සහිත අගනා පාරිසරික කලාපයක් ද ඇතුළු

බටහිර වෙරළ තීරය පවරා ගැනීමට එරෙහිව ජනතා උද්ඝෝෂණ වලට අමතරව අධිකරණය වෙත මුලික අයිතිවාසිකම් පෙත්සමක් ද ඉදිරිපත්ව තිබේ.

 

 ගැසට් නිවේදනයක් මාර්ගයෙන් මුතුරාජවෙල පාරිසරික සංවේදී කලාපයේ ඉඩම් නීතිවිරෝධී ලෙස නාගරික සංවර්ධන අධිකාරිය වෙත පවරා ගැනීමට ගෙන තිබෙන තීරණය හරහා ආණ්ඩුක්‍රම ව්‍යවස්ථාව තුළින් ස්ථාපිත කර තිබෙන මූලික මිනිස් අයිතිවාසිකම් උල්ලංඝනය වීමක් සිදුවන බවට තීන්දුවක් ලබාදෙන ලෙස, සමගි ජන බලවේගයේ ගම්පහ දිස්ත්‍රික් පාර්ලිමේන්තු මන්ත්‍රී කාවින්ද ජයවර්ධන සහ මිගමුව ප්‍රදේශයේ පදිංචි ධීවරයකු වන කේ. එස්. එන්. ප්‍රනාන්දු පෙත්සම ගොනු කරමින් ශ්‍රේෂ්ඨාධිකරණයෙන් ඉල්ලයි

 

 මෙම අධිකරණ ක්‍රියා මාර්ගයට අමතරව, සංවර්ධනයේ මුවාවෙන් පෞද්ගලික ඉඩම් අත්පත් කරගෙන විදේශ සමාගම්වලට විකිණීමේ ගැසට් පත්‍රය හකුලා ගන්නා ලෙස ආණ්ඩුවට බලකෙරෙන උද්ඝෝෂණයක් ඊයේ කඳාන නගරයේදී පැවැත්විණි. එය කැඳවා  තිබුනේ 'මුහුදුබඩ බිම් තීරය සුරැකීමේ සංවිධානය'යි.

 

 

''ඉකුත් ඔක්තෝබර් මස 07 වනදා ජනාධිපතිවරයා විසින් නිකුත් කළ ගැසට් නිවේදනයක් මගින් මුතුරාජවෙල පාරිසරික සංවේදී කලාපයේ පිහිටි ඉඩම් නාගරික සංවර්ධන අධිකාරිය යටතට පවරාගෙන ඒවා "රැම්සා" තෙත් බිමක් ලෙස සංවර්ධනය කිරීමට අවසර ලබාදී ඇති බවත්, රැම්සා තෙත්බිම සංවර්ධනය කිරීමේ කාර්යය නාගරික සංවර්ධන අධිකාරියට ඉටු කළ නොහැකි බවත්, එය සිදු කළ යුත්තේ වන සංරක්ෂණ දෙපාර්තමේන්තුව යටතේ බව,'' පෙත්සම්කරුවෝ පෙන්වා දෙති.

 

 “රැම්සා තෙත්බිමක්` නම් කළ පසු ඊට මහජනතාව ඇතුළුවීම තහනම් කෙරෙන අතර මේ හරහා අදාළ ප්‍රදේශයේ   ලක්ෂ තුනක් වන පදිංචිකරුවන්ටත්, එයින් පන්දහසක් වූ තෙත් බිම ආශ්‍රිතව ධිවර රැකියාවේ හා වගාවේ නිරතවුවනටත් අසාධාරණයක් වන බව මෙම මුලික අයිතිවාසිකම් පෙත්සමේ සඳහන්වේ.

 

  

අගමැති මහින්ද රාජපක්ෂ, රාජ්‍ය ඇමති නාලක ගොඩහේවා, නාගරික සංවර්ධන සහ නිවාස අමාත්‍යාංශ ලේකම්වරයා, වනජීවී අධ්‍යක්ෂ ජනරාල් චන්දන සූරියබණ්ඩාර, වත්තල, මීගමුව, ජා-ඇළ  ප්‍රාදේශීය ලේකම්වරු, නීතිපති සංජය රාජරත්නම්  ඇතුළු 14 දෙනෙකු මෙහි වගඋත්තරකරුවන් ලෙස නම් කර තිබේ.

 

''යූ.ඩී.ඒ එකට පවරා ගෙන දැනටමත් මේක විකුනලා සල්ලිත් අරගෙන ඉවරයැ,''යි හරීන් ප්‍රනාන්දු මන්ත්‍රීවරයා පෙරේදා [4]  කොළඹදී මාධ්‍ය හමුවකට එක් වෙමින් පැවසීය. මන්ත්‍රීවරයා වැඩි දුරටත් පෙන්වා දුන්නේ ආණ්ඩුවේ මේ ව්‍යාපෘතියෙන්, 'පෑලියගොඩ සිට මිගමුව කොච්චිකඩේ දක්වා වූ බටහිර වෙරළ' තිරයේ මුතුරාජවෙල තෙත් බිම ඇතුළු නිල්සිරිගම, ජනෝදය ගම ඇතුළු ගම් රැසක ජනයාට සිය නිවාස හා ඉඩම් අහිමිවන බවයි.