කැනඩාවේ පොදු ස්ථාන කරා ඇතුළු වීමේදී පූර්ණ එන්නත්කරණ කාඩ්පත අනිවාර්ය කර ඇතැයි
කැනේඩියානු මහ කොමසාරිස් ඩේවිඩ් මැකිනන් (David Mckinnon) පවසයි.
මෙම අනිවාර්ය කිරීම හරහා ව්‍යසනයෙන් තමන් ආරක්ෂා වන අතරම අනෙක් පුද්ගලයන්ටද එය පැතිරීම වළක්වා ගැනීමට යහපත් පියවරක් වී ඇතැයි මහ කොමසාරිස්වරයා කියා සිටියේය.
කැනේඩියානු මහ කොමසාරිස්වරයා එබව කියා සිටියේ, පෙරේදා (4) සවස සෞඛ්‍ය අමාත්‍යාංශයේදී සෞඛ්‍ය අමාත්‍ය ආචාර්ය කෙහෙලිය රඹුක්වැල්ල හමුවූ අවස්ථාවේදීය.
මෙම හමුව සඳහා ලෝක සෞඛ්‍ය සංවිධානයේ මෙරට නියෝජිත ආචාර්ය අලාකා සිං මහත්මියද එක්ව සිටියාය.
මෙහිදී මෙරට සෞඛ්‍ය සේවාවට අවශ්‍ය සෞඛ්‍ය උපකරණ තොගයක්ද ලෝක සෞඛ්‍ය සංවිධානය හා කැනේඩියානු රජය එක්ව පරිත්‍යාග කිරීම සිදු විය.
“බූස්ටර්” එන්නත මෙරට ජනතාවට ලබාදීම ආරම්භ කිරීම ඉතා සාධනීය පියවරක් බවත් එය ඉදිරියේදී අනෙකතුත් කණ්ඩායම් වලටද ලබා දෙන්නේ නම් වඩා වැදගත් වනු ඇති බවත් කැනේඩියානු මහ කොමසාරිස්වරයා කීය. ශ්‍රී ලංකාව එන්නත්කරණ ක්‍රියාවලිය ඉතා යහපත් අයුරින් කළමණාකරණය කරමින් ඉතා සාර්ථක මට්ටමක පවත්වා ගෙන යාමට හැකි වී ඇතැයිද කැනේඩියානු මහ කොමසාරිස්වරයා වැඩිදුරටත් කීය.
මෙහිදී අදහස් දැක්වූ ලෝක සෞඛ්‍ය සංවිධානයේ මෙරට නියෝජිත ආචාර්ය අලාකා සිං මහත්මිය, ශ්‍රී ලංකාවේ ක්‍රියාත්මක කෙරුණු ගෘහස්ථ ප්‍රතිකාර වැඩපිළීවෙල අතිශය සාර්ථක බවත් එහි ආදර්ශය ලෝකයට ගෙන යා හැකි බවත් පෙන්වා දුන්නාය.
කොවිඩ් ව්‍යසනයට පමණක් නොව අනෙකුත් රෝගී තත්ත්වයන් සඳහාද මෙවැනි ප්‍රතිකාර වැඩපිළිවෙලක් ආරම්භ කිරීම ඉතා වැදගත් බවද එමගින් රෝහල්හි පවතින අනවශ්‍ය තදබදය අවම කිරීමට හැකි වනු බවද සිං මහත්මිය පෙන්වා දුන්නාය.
මෙම හමුවේදී අදහස් දැක්වූ සෞඛ්‍ය අමාත්‍ය කෙහෙලිය රඹුක්වැල්ල ද පැවසුයේ, කොවිඩ් වසංගතය තුළ රෝගයෙන් ආරක්ෂා වීම තමන් සතු වගකීමක් වන අතරම එය තවත් පුද්ගලයෙකු කරා පැතිරවීම වළක්වාලීමේ වගකීමද ඔහු සතු වන බවයි. එවැනි පසුබිමක් තුළ පොදු ස්ථානයන්හිදී එන්නත්කරණ කාඩ්පත අනිවාර්ය කිරීම ඉතා යහපත් තත්ත්වයක් බවත් ඇමතිවරයා කියා සිටියේය.
මේ වන විට යුරෝපානු රටවල් ක්‍රියාත්මක කරන මෙම වැඩපිළිවෙල ඉතා යහපත් තත්ත්වයක පවතින බවත් ශ්‍රී ලංකාවේද එය ක්‍රියාත්මක කිරීම පිළිබඳව දැඩි අධ්‍යයනයක යෙදෙන බවත් රඹුක්වැල්ල අමාත්‍යවරයා කීය.
විශේෂයෙන් මෙරට ක්‍රියාත්මක කෙරෙන ගෘහස්ථ ප්‍රතිකාර වැඩපිළීවෙල ලැබූ ඉහළ සාර්ථකත්වයට ලෝක සෞඛ්‍ය සංවිධානයටද ප්‍රණාමය හිමිවිය යුතු යැයිද ඒ සඳහා ශ්‍රී ලංකා රජයේ මෙන්ම සෞඛ්‍ය සේවාවේ බොහෝ පිරිස් දැඩි කැපකිරීමකින් ක්‍රියා කළේ යැයිද සෞඛ්‍ය අමාත්‍ය රඹුක්වැල්ල මෙහිදී කියා සිටියේය.
THE LEADER TV
රාජපක්ෂ දේශපාලන ඉරණමේ තීන්දුව ! | Gossip
සාටකේ නාටකේ ! | මොණරවිලගේ ලියමන
