මාස 06 කට පසු පාසල්වල 10, 11, 12 සහ 13 ශ්‍රේණිවල අධ්‍යයන කටයුතු අද සිට ආරම්භ වේ.
අධ්‍යාපන අමාත්‍යාංශයේ ලේකම් මහාචාර්ය කපිල පෙරේරා එම ශ්‍රේණිවල සිසුන්ගේ මව්පියන්ගෙන් ඉල්ලා සිටියේ දරුවන් වෙනුවෙන් පාසල් සූදානම් කර ඇති බැවින් දරුවන් පාසැල් වෙත යොමු කරන ලෙසයි.
සිසුන් පාසල් නාවොත් කරන දේ අධ්‍යාපන අමාත්‍යංශය කියයි
සාමාන්‍ය පෙළ සහ උසස් පෙළ සිසුන්ගේ පැමිණීම අනුව දැනට නියම කර ඇති විභාග නියමිත දිනවලට පෙර පැවැත්වීමට ඉඩ ඇතැයි අධ්‍යාපන අමාත්‍යාංශය පවසයි.
මෙවර විභාගයට පෙනී සිටින එකොළහ ශ්‍රේණියේ සහ දහතුන ශ්‍රේණීයේ දරුවන්ගේ පාසල් පැමිණීමේ තොරතුරු අද සිට දින පතා ලබා ගැනීමට ද අමාත්‍යාංශය තීරණය කර තිබේ.
දරුවන් පාසල් නොපැමිණෙන්නේ නම් විභාග පැවැත්වීම සඳහා තවත් කල් ගත කිරීම අවශ්‍යතාවක් නැත යන්න අමාත්‍යාංශයේ අදහසවී තිබේ.
එම ශ්‍රේණිවලට අදාළ පන්ති පවිත්‍ර කිරීමේ කටයුතු පසුගිය දිනවල පැවැති අතර විශේෂයෙන් එම පවිත්‍ර කටයුතු සඳහා දහතුන ශ්‍රේණියේ දෙමව්පියන්ගේ සහ දරුවන්ගේ පැමිණීම සතුටුදායක තත්ත්වයක නොපැවැති බව වාර්තා වී තිබේ.
මේ වන විට කැබිනට් මණ්ඩලයේ අනුමැතිය ලැබී ඇත්තේ උසස් පෙළ විභාගය ලබන වසරේ (2022) පෙබරවාරි මාසයේ ද සාමාන්‍ය පෙළ විභාගය මැයි මාසයේද පැවැත්වීමය.
කෙසේ වුව ද මෙම විභාග දෙකම එකම කාලවකවානුවක පැවැත්වීම සම්බන්ධයෙන්ද අමාත්‍යාංශයේ අවධානය යොමුව තිබිණි.
