1200 x 80 DMirror
 
 

රාජ්‍ය නිලධාරීන්ට පහර දීම හා මරණ තර්ජනය කිරීමට කුප්‍රකට බෞද්ධ හිමිනමක් රජයේ කාර්යාලයකට ඇතුල්වී දෙමළ පරිපාලන නිලධාරිනියකගේ ආගම

සහ ජාතිය හෙලා දකිමින් වෛරී සහගත ලෙස පොලිස් නිලධාරීන් ඉදිරියේ පරිභව කරන ආකාරය වීඩියෝ ගත වී ති‌බේ.

ඉඩම් ආරවුලක් සම්බන්ධයෙන් පැන නැගී ඇති  ප්‍රශ්නයක් විසදා ගැනීම සදහා පට්ටිපලෙයි ප්‍රදේශිය ලේකම් කාර්යාලය ගිය මංගලාරාම විහාරාධිපති අම්පිටියේ සුමන හිමියන් මෙලෙස ජාතිවාදය උළුප්පමින් චෝදනා කර ඇත්තේ පට්ටිපොළ ප්‍රදේශිය ලේකම්වරියටයි.

තමන්ට එරෙහිව ලේකම්වරිය අධිකරණ ක්‍රියාමාර්ග පවා ගෙන ඇති බව පවසන අම්පිටියේ සුමන හිමියන් එහිදී චෝදනා කළේ ඇය හින්දු වීම හේතුවෙන් තමන්ට මෙලෙස සලකන බවයි.

"බෞද්ධ නිලධාරි නම් මේවා කරන්නේ නෑ. මේ හින්දු හරිද මේ හින්දු, " යනුවෙන් නිල ඇදුම් ඇගලා සිටි පොලිස් නිලධාරීන් ඉදිරියේම මංගලාරාම විහාරාධිපති අම්පිටියේ සුමන හිමියන් ප්‍රදේශිය ලේකම්වරියගේ නිල කාමරයේ දොර අහුරාගෙන සිටිමින් බැන වදින ආකාරය ඒ හිමියන් විසින්ම සිය මුහුණ පොත ඔස්සේ විකාශය කර තිබේ.

අම්පිටියේ සුමන හිමියන් පවසන පරිදි කෙවිලියාමඩුව පන්සල්ගල අභිනවාරාම විහාරස්ථානය සදහා නව මාර්ගයක් සකස් කර ගැනීම වෙනුවෙන් පන්සලට යාබද  වන සංරක්ෂණ දෙපාර්තමේන්තුවට අයිති ඉඩමකින් නැගෙනහිර පළාත් භාර ඉඩම් කොමසාරිස් වරයා පන්සලට හෙක්ටයාර පහක ඉඩමක් ලබා දී තිබේ.

එම ඉඩමේ සිවිල් ආරක්ෂක දෙපාර්තමේන්තුවේ නියාමකවරයෙක් වන සුමනරත්න නමැත්තා බලහත්කාරයෙන් පදිංචිව සිටින බව පවසන අම්පිටියේ සුමන හිමියන් ප්‍රදේශිය ලේකම්වරියගෙන් ඉල්ලා සිටින්නේ ඔහු එම ස්ථානයෙන් ඉවත් කරන ලෙසයි.

සුමනරත්න නැමැත්තා එම ස්ථානයෙන් ඉවත් කිරීමට කටයුතු කරන ලෙස නැගෙනහිර පළාත් භාර ඉඩම් කොමසාරිස් වරයා පට්ටිපලෙයි ප්‍රදේශිය ලේකම්ට ලිඛිතව දන්වා ඇතත් ඇය ඒ වෙනුවෙන් ක්‍රියාමාර්ග නොගන්නා බවට චෝදනා කරන අම්පිටියේ සුමන හිමියන් ලේකම්වරියගෙන් ඉල්ලා සිටින්නේ සිවිල් ආරක්ෂක දෙපාර්තමේන්තුවේ නියාමකවරයෙක් වන  සුමනරත්න නැමැත්තා එම ඉඩමේ බලහත්කාරයෙන් සිටින බවට අධිකරණයට ඉදිරිපත් කිරීම සදහා ලිඛිත ලියවිල්ලක් ලබා දෙන ලෙසයි.

එම ලියවිල්ල ලබා දීම සඳහා කරන ලද බල කිරීම නොතකා සිටින ප්‍රාදේශිය ලේකම්වරියට අම්පිටියේ සුමන හිමියන් දිගින් දිගටම අශෝභන ලෙස බැන වදින ආකාරය එම වීඩියෝවේ තව දුරටත් සටහන්ව තිබේ.

 

"ඒ මිනිහා අයින් කරන්න. ඒකට කටක් හොල්ලන් නෑ. මේ ගෑණි. හරි සාදු මං ඒක කරන්නං කියන් නෑ මේ ගැණි. මේකිගේ හොර මිනිහද ?තොගේ හොර මිනිහද? " අම්පිටියේ සුමන හිමියන් අසන ආකාරය  එම වීඩියෝවේ සටහන්ව තිබේ.

 

රාජ්‍ය නිලධාරිනියකට එරෙහිව ජාතිවාදී වෛරී ප්‍රකාශ කිරීම සම්බන්ධයෙන් සුමන හිමියන්ට එරෙහිව පොලිසිය පියවර ගත බවක් දැනගන්නට නැතැයි ප්‍රදේශයේ මාධ්‍යවේදීහු පවසති.


පුරා විද්‍යා නිලධාරියාට මරණ තර්ජන:


නැගෙනහිර පුරාවිද්‍යා උරුමයන් කළමනාකරණය කිරීම සඳහා ජනාධිපතිවරයා විසින් කාර්ය සාධක බලකායක් පත් කර තිබෙන මොහොතක පසුගිය වසරේ අම්පිටියේ සුමන හිමියන් පුරා විද්‍යා නිලධාරියකුටත් මරණ තර්ජනය කර තිබුනි.

මඩකලපුව චෙන්කලාඩි විහාරස්ථාන භූමියේ පුරාවිද්‍යාත්මක ස්ථාන වගා කටයුතු සදහා ඩෝසර් කර ඇති බවට චෝදනා නගන මංගලාරාම විහාරාධිපති අම්පිටියේ සුමන හිමියෝ එහි සිටි පුරා විද්‍යා නිලධාරියකුට 2020 වසරේ සැප්තැම්බර් 21 සඳුදා  මරණ තර්ජන කරන අයුරු පළාත් බද  මාධ්‍යවේදීන්ගේ කැමරා කාචයට හසුව තිබුනි.

මඩකලපුව චෙන්කලාඩි විහාරස්ථාන භූමියේ පුරාවිද්‍යාත්මක ස්ථානයේ ගල් බැමි ඉවත් කරමින් ගොවීන් වගා කටයුතු සදහා බිම් සකස් කර ඇති බවට චෝදනා නගන අම්පිටියේ සුමන හිමියෝ එහි සිටි පුරා විද්‍යා නිලධාරියකුට පහර දීමට තැත් කරන අයුරුත් මාධ්‍යවේදීන්ගේ කැමරා කාචයට හසුව ඇත.

අනතුරුව එම ස්ථානයේ සිටි පුරා විද්‍යා නිලධාරීන් කිහිපදෙනකු තාවකාලික ඉදිකර ඇති කාර්යාලය තුළ රදවා සිය ග්‍රහනයට ගත් අම්පිටියේ සුමන හිමියෝ  වග කිව යුතු නිලධාරීන් එම ස්ථානයට කැදවන ලෙස ඔවුන්ට  බලකරමින් තර්ජනය කර තිබුනි.

"දැන් මේ ඊයේ හාලා තියෙන්නේ අපි ගියාට පස්සේ. හරිද දැන් එතකොට මේ පැත්තේ බැම්ම තියෙන්නේ මෙතන නෙමෙයිද තමුසෙලා මොනවද කරන්නේ පුරාවිද්‍යා එකෙන් කියලා. ගෙන්නනවා තමුසෙලාගේ ලොක්කා.  මිරිකනවා බෙල්ල මම යන හිරේක යන්න. හරිද එන්න කියපන් ලොක්කන්ට අපි යන් නෑ අද. උඹලගේ ලොක්කන්ට එන්න කියපන් නැත්තම් තෝ මරණවා මම අද මේ පොල්ලෙන් ගහලා හරි. මේක ඉවරයක් වෙන්න."

ප්‍රදේශයේ රාජ්‍ය නිලධාරීන් සිදු කර ඇති පැමිණිලි වලට අනුව මංගලාරාම විහාරාධිපති අම්පිටියේ සුමන හිමියන්ට එරෙහිව අධිකරනයේ නඩු කිහිපයක්ම විභාග වන බව පළාත් බද වාර්තාකරුවෝ පවසති.

 



THE LEADER TV


බැසිල්ගේ ජනපති හීනයට ගුරුවරු අහුවුනාද ?
 


ගැටුමට එක්වූ පස්වෙනි කැබිනට් ඇමති!


 
 

subscribeYT

subscribeYT

WhatsApp Image 2021 09 13 at 13.49.58