යුද්ධයෙන් මියගිය තම ස්නේහවන්තයන් වෙනුවෙන් දෙමළ ජනතාවගේ ශෝකය පලකිරීම වැලැක්වීමට ආණ්ඩුව උතුරේ මෙහෙයුමක් දියත් කර තිබේ.
සෑම අවුරුද්දකම නොවැම්බර් 21 දායින් ආරම්භ කොට උතුරු නැගෙනහිර පුරා සතියක් තිස්සේ පවත්වනු ලබන දෙමළ මහවිරු සතිය මෙවරත් තහනම් කිරීම සඳහා උසාවිය යොදා ගැනීම එහි ප්‍රධාන පියවරක් බව දිස් වෙයි.
ඉකුත් වසරේදීත් මුලතිව් දිස්ත්‍රික්කයේ 'මහවිරු සමරු' පැවැත්වීමට එරෙහිව පොලිසිය විසින් අධිකරණයෙන් තහනම් නියෝග ලබා ගෙන තිබුණි.
ආරක්ෂක අංශ විසින් වාර්තා කර ඇති පරිදි සමරුවේ ක්‍රියාකාරකම් අවිහිංසාවාදීය.
පොලිසිය කර ඇති ඉල්ලීමට අනුමැතිය දෙමින් මුලතිව් මහේස්ත්‍රාත් ආර් සරවනරාජා විසින් නොවැම්බර් 17 දා පළමු වාරණ නියෝගය පනවා ඇත්තේ මුලතිව් දිසාවේ වෙසෙන දෙමළ දේශපාලන නායකයන් හා යුද අපරාධ විරෝධීන් ඇතුළු සමාජ ක්‍රියාධරයන් 12 දෙනකුට එරෙහිවය.
ඊට අමතරව, 'මහවිරු සමරුව' පුදුකුඩියිරුප්පු පොලිස් බල ප්‍රදේශයේ පැවැත්වීම තහනම් කරන මෙන් පොලිසිය තවත් ඉල්ලීමක්ද කර තිබේ. එම ඉල්ලීම රැගත් ලිපියේ විස්තර කෙරෙන ආකාරයට ත්‍රිවිධ හමුදා හා බුද්ධි අංශ විසින් වාර්තා කර ඇති පරිදි සමරුවේ ක්‍රියාකාරකම් අවිහිංසාවාදීය.
පුදුකුඩියිරුප්පු පොලිසියේ ස්ථානාධිපති විසින් මුලතිව් මහේස්ත්‍රාත් වරයාට ලියා ඇති ලිපියේ දැක්වෙන පරිදි නොවැම්බර් 21 සිට 27 දක්වා මහවිරු සතිය ලෙස නම් කර සෑම අවුරුද්දකම සැමරුම් පවත්වන ලෙස මුලතිව් දිස්ත්‍රික්කයේ මනලාරු රක්ෂිතය තුල පවත්වන ලද පළමු මහවිරු සැමරුමේදී ප්‍රකාශයට පත් කර ඇත්තේ එල්ටීටීඊ නායකයා විසිනි.
“එම නියෝගය පරිදි මෙවරද එම තහනම් සංවිධානයේ සාමාජිකයන් හා එයට සහාය දක්වන කණ්ඩායම් වල සාමාජිකයන් මගින් එම සංවිදානයේ නිර්මාතෘ වේලුපිල්ලේ ප්‍රභාකරන් සහ මියගිය සාමාජිකයින් සිහි කර එම සංවිධානයට අයත් කොඩි එසවීමට, මියගිය අයගේ ඡායාරූප ප්‍රදදර්ශනය කිරීම, එම සංවිධානයේ ගීත ගායනා කිරීම හා එම සංවිධානයට අයත් වර්ණ සහිත කොඩි එසවීම හා තහනම් කරන ලද සංවිධානයේ ජාතික පුෂ්පය වන නියඟලා මල ප්‍රදර්ශනය කිරීමට කටයුතු යොදා ඇති බවටත් ඉහත තොරතුරු මගින් වැඩි දුරටත් අනාවරණය වී ඇත,” යි ප්‍රධාන පොලිස් පරීක්ෂක අමරසිංහගේ අත්සනින් යුත් ලිපියේ දැක්වේ.
ආණ්ඩුව හා රජයේ ආරක්ෂක අංශ විසින් ප්‍රකාශයට පත් කර ඇති පරිදි එල්ටීටීඊ සංවිධානය දැනට ශ්‍රී ලංකාවෙන් මුලිනුපුටා දමා ඇත.
මුලතිව් මහේස්ත්‍රාත්වරයා විසින් පළමු තහනම් නියෝගය පනවා ඇත්තේ පහත දැක්වෙන පිරිසට විරුද්ධවය.
පාර්ලිමේන්තු මන්ත්‍රී ගජේන්ද්‍රකුමාර් පොන්නම්බලම්, පාර්ලිමේන්තු මන්ත්‍රී සෙල්වරාසා ගජේන්ද්‍රන්, හිටපු පාර්ලිමේන්තු මන්ත්‍රී සිවප්‍රකාසම් සිවමෝහන්, මුලතිව් දිස්ත්‍රික්කයේ අතුරුදහන් කරන ලද්දවුන්ගේ ඥාතීන්ගේ සංගමයේ සභාපතිනි මරියසුරේෂ් ඊශ්වරී, හිටපු උතුරු පලාත් සභා මන්ත්‍රී එම් කේ සිවාජිලිංගම්, හිටපු උතුරු පලාත් සභා මන්ත්‍රී තුරෙයිරාජා රවිහරන්, දෙමළ ජාතික සන්ධානයේ ක්‍රියාධාරී පීටර් ඉලන්චේලියන්, සමාජ ක්‍රියාධාරීන් වන මුත්තුරාසා සිවනේසරාසා, පේදුරුපිල්ලේ ජෙරාඩ් සහ කනගසභාපති විශ්වලිගම් විග්නේශ්වරන්.
උතුරු නැගෙනහිර මාධ්‍යවේදීන් පවසන්නේ මුලතිව් පොලිසිය මෙන්ම පළාතේ අනෙකුත් පොලිසි ද මෙසේ වාරණ නියෝග ලබා ගැනීමේ වෑයමක් පවතින බවය.
බැසිල් Hit wicket වුණා !
ගැටුමට එක්වූ පස්වෙනි කැබිනට් ඇමති!
