නීති විරෝධී ඉන්දීය ට්‍රෝලර් යාත්‍රා මෙරට මුහුදේ මසුන් මැරීම නවතාලීමට ආණ්ඩුව කටයුතු නොකරන බවට උතුරේ ධිවරයන් දිගින් දිගටම චෝදනා කරද්දී, ධීවර බෝට්ටු වර්ණ ගැන්විම කෙරෙහි රාජ්‍ය අමාත්‍යවරයාගේ
අවධානය යොමුව තිබේ.
ධීවර කටයුතුවල නිරත වන බෝට්ටු වර්ග හදුනාගැනීමේ පහසුව සදහා විවිධ වර්ණයන් ලබා දීම කෙරෙහි ද මේ වන විට අවධානය යොමු කොට ඇති බවයි රාජ්‍ය අමාත්‍ය කංචන විජේසේකර පවසන්නේ.
ඔහු ඒ බව පවසා ඇත්තේ ධීවර අමාත්‍ය ඩග්ලස් දේවානන්ද ගේ ප්‍රධානත්වයෙන් නොවැම්බර් 16 වැනිදා පාර්ලිමේන්තුවේදී පැවති ධීවර කටයුතු පිළිබද අමාත්‍යාංශයීය උපදේශක කාරක සභාවේදී ය.
ශ්‍රී ලංකා පාර්ලිමේන්තුවේ සන්නිවේදන දෙපාර්තමේන්තුව නිවේදනය කර ඇත්තේ මසුන් ඇල්ලීමේ හානිකර ක්‍රම වැළැක්වීම සඳහා නව නීති ළඟදීම පාර්ලිමේන්තුවට ඉදිරිපත් කරන බව ධීවර කටයුතු පිළිබද අමාත්‍යාංශයීය උපදේශක කාරක සභාවේදී අනාවරණය වු බවයි.
"හානිකර මසුන් ඇල්ලීමේ ක්‍රම රටේ බොහෝ ප්‍රදේශවල ක්‍රියාත්මක වන බවත් නිසිලෙස මෙම තත්ත්වය කළමනාකරණය නොකළහොත් මත්ස්ය සම්පත ශීඝ්‍රයෙන් අඩුවන බවත් මෙහිදී අදහස් දක්වමින් රාජ්‍ය අමාත්‍ය කංචන විජේසේකර මහතා පෙන්වා දුන්නේය."
ඉතා කුඩා මසුන් පමණක් නොව මත්ස්ය බිත්තර පවා හසුවන ඇතැම් හානිදායක පන්න ක්‍රම ධීවර කර්මාන්තයට විශාල තර්ජනයක් බැවින් මෙම තත්වය නතර කිරීමට ඉතා කඩිනමින් නව නීති හදුන්වා දෙමින් විශේෂ වැඩපිළිවෙලක් ක්‍රියාත්මක කරන බවද ධීවර රාජ්‍ය අමාත්‍ය කංචන විජේසේකරපැවසු බව ශ්‍රී ලංකා පාර්ලිමේන්තුවේ සන්නිවේදන දෙපාර්තමේන්තුව වැඩි දුරටත් සදහන් කරයි.
අමාත්‍ය ඩග්ලස් දේවානන්ද එහිදි පවසා ඇත්තේ මේ වන විට නැවතී ඇති පේදුරුතුඩුව ධීවර වරායේ සංවර්ධන ව්‍යාපෘතිය කඩිනම් කිරීමට පියවර ගන්නා බවයි.
එම ව්‍යාපෘතිය සඳහා මුල්‍ය ප්‍රතිපාදන ලබාදීමට නියමිතව තිබූ ආසියානු සංවර්ධන බැංකුව (ADB) ආධාර ලබා දීම නතර කොට ඇති බැවින් වෙනත් පාර්ශවයන්ගෙන් හෝ සහය ලබා ගැනීම කෙරෙහි අවධානය යොමු කර ඇති බව අමාත්‍යවරයා එහිදි පවසා තිබේ.
පේදුරුතුඩුව ඇතුළු ධීවර වරායන් 5ක් උතුරු පළාතේ ස්ථාපිත කරන අතර පේදුරුතුඩුව වරාය රාජ්‍ය පෞද්ගලික හවුල්කාරිත්වය යටතේ කඩිනමින් සංවර්ධනය කිරීමට පියවර ගන්නා බවත් රාජ්‍ය අමාත්‍ය කංචන විජේසේකර එහිදි පවසා තිබේ.
පාර්ලිමේන්තු මන්ත්‍රීවරුන් වන මායාදුන්න චින්තක අමල්, කරුණාදාස කොඩිතුවක්කු, සිවනේසතුරෙයි චන්ද්‍රකාන්තන්, ආචාර්ය සුරේන් රාඝවන්, සුදත් මංජුල, අසංක නවරත්න, අජිත් රාජපක්ෂ හා ධීවර අමාත්‍යාංශ ලේකම්වරයා ඇතුළු රාජ්‍ය නිලධාරීහු ද මෙම අවස්ථාවට එක්ව තිබේ.
නීති විරෝධී ඉන්දීය ට්‍රෝලර් යාත්‍රා මෙරට මුහුදේ මසුන් මැරීම නවතාලීමට ආණ්ඩුව ගන්නා ක්‍රියාමාර්ග පිළිබදව ධීවර කටයුතු පිළිබද අමාත්‍යාංශයීය උපදේශක කාරක සභාවේදී සාකච්ඡාවට ලක් වු බවක් දැනගන්නට නැත.
ට්‍රෝලර් බෝට්ටු යොදා ගනිමින් මෙරට මුහුදට ඇතුල් වන ඉන්දීය ධීවරයන් මුහුදු සම්පත් විනාශ කරමින්, තමන්ට එල්ල කරන තර්ජනයට එරෙහිව ආණ්ඩුව කිසිදු පියවරක් නොගැනීමට විරෝධය පාමින් ඔක්තෝබර් 17 වැනිදා උතුරේ ධීවර සංගම් එක්ව විරෝධය දියත් කර තිබුනි. මුලතිව් සිට පේදුරු තුඩුව දක්වා බෝට්ටු පෙළපාලියකින් ගිය ධීවරයෝ අවසානයේදී ජන හමුවක් පැවැත්වූහ.
දෙමළ ජාතික සන්ධානයේ පාර්ලිමේන්තු මන්ත්‍රී එම්.ඒ. සුමන්දිරන් එම ජන හමුව අමතමින් සදහන් කර තිබුනේ පාර්ලිමේන්තු පනතක් මගින් තහනම් කර තිබියදීත්, ඉන්දීය ට්‍රෝලර් යාත්‍රා යොදා ගනිමින් ලංකා මුහුදේ මසුන් ඇල්ලීම සිදුවන්නේ මුදල් අල්ලස් මත බවයි.
පසුගිය කාලය පුරාම ඉන්දීය ධීවරයන්ගෙන් එල්ල වන තර්ජන ගැන ධීවර ඇමැතිවරයා දැනුවත් කළ ද ඊට එරෙහිව පියවර ගැනීමට කටයුතු නොකළ බවට උතුරු නැගෙනහිර ධීවරයෝ චෝදනා කරති.
''ලංකාවේ ආණ්ඩුවේ ධීවර ඇමතිවරයා මේ ට්‍රෝලර් තහනම් කරන්න පියවර ගන්නේ නැහැ. අපිට ආරංචි විදිහට මේ නීති විරෝධී ට්‍රෝලර් යාත්‍රා වලින් දවසකට රුපියල් 5000ක් ගන්නවා කියලා, මේ වගේ හොර වැඩ කරන්න එපා. අපේ ධීවරයන් වෙනුවෙන් පනත ක්‍රියාත්මක කරන්න,'' යැයි ද පාර්ලිමේන්තු මන්ත්‍රී එම්.ඒ. සුමන්දිරන් සදහන් කර තිබුනි.
ශ්‍රී ලංකාවේ උතුරු මුහුදේ දී නාවික හමුදාවට අයත් යාත්‍රාවක ඉන්දියානු යාත්‍රාවක් ගැටීමෙන් සිදු වූ අනතුරකින් මුහුදට වැටී මිය ගිය දකුණු ඉන්දීය ධීවරයකුගේ සිරුර ගොඩගෙන යළි පශ්චාත් මරණ පරීක්ෂණයක් පවත්වන ලෙස මදුරාසි මහාධිකරණයේ මදුරෙයි විනිසුරු මණ්ඩලය මේ වන විට නියෝග කර තිබේ.
මසකට ඉහතදී මරණයට පත්වූ පුදුක්කෝට්ටෙයිහි ආර්. රාජ් කිරාන්ගේ පශ්චාත් මරණ පරික්ෂණ වාර්තාව නොවැම්බර් 24 වැනිදා අධිකරණයට භාර දීමට නියමිතය.
සබැඳි පුවත් :
උතුරු මුහුදේ මියගිය ධීවරයකු සම්බන්ධයෙන් දකුණු ඉන්දියාවේ මරණ පරීක්ෂණයක්
'සඳහිරුසෑ' යුද ස්මාරකය අගමැතිට අපලයක් වෙයි ?
