1200 x 80 DMirror
 
 

පාලමක් නැතිකමින් පාරුවෙන් පාසල් යාමට සිදුවූ සිසු දරුවන් හතර දෙනකු ඇතුළු හයකට මරු කැදවමින්

අවම වශයෙන් තවත් විස්සකට වැඩි ප්‍රමාණයකගේ ජීවිත අවදානමක හෙලූ අනතුරකින් කෝප වු ගම්වැසියන් දැඩි විරෝධතාවයක් පවත්වා ත්‍රිකුණාමල දිස්ත්‍රික්කයේ මන්ත්‍රීවරයකුගේ නිවසකට පහර දී තිබේ.

විරෝධතාකරුවන් චෝදනා කරන්නේ සංවර්ධනයේ නාමයෙන් විවිධාකාර ඉදිකිරීම් සඳහා කෝටි ගණනින් වියදම් කරන බලධාරීන් කලපුවෙන් එතෙර වීමට අත්‍යාවශ්‍ය පාලම සාදා නොදී වලකාගත හැකිව තිබූ මරණ වලට මග පෑදූ බවටයි.

නොවැම්බර් 23 වැනි අඟහරුවාදා පෙරවරුවේ ත්‍රිකුණාමලය, කින්නියා, කුරිඤ්ඤන්කර්නි කලපුවේ  පාලම් පාරුවක් පෙරළීමෙන් එහි ගමන් ගත් හය දෙනකුට ජීවිතය අහිමි වු අතර දිවි ගලවාගැනීමට හැකි වු විසි දෙනෙක් රෝහල් ගත කර තිබේ. පළාත් බද වාර්තාකරුවන් පවසන්නේ ඔවුන් අතරින් සිව් දෙනකුගේ තත්වය බරපතල බවයි.

මිය ගිය පිරිස අතර එකම පවුලේ මව සහ  දරුවන් දෙදෙනාත්, තවත් පවුලක වැඩිමහල් දරුවන් දෙදෙනාත් සිටින බවට තහවුරු වී ඇතැයි  පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි නීතිඥ නිහාල් තල්දූව ජනමාධ්‍ය වෙත පවසා තිබේ.

ප්‍රදේශවාසීන් පවසන පරිදි ත්‍රිකුණාමලයේ කින්නියා සහ කුරිඤ්ඤන්කර්නි යා කරමින් කළපුව හරහා ගමන්කිරීමට නව පාලමක් ඉදිකිරීම පසුගිය යහපාලන ආණ්ඩු සමයේදී ආරම්භ කර ඇතත් තවමත් එහි කටයුතු නිමවී නැත.

එම කලපුව තරණය කිරීමට කිලෝමීටර් 3.5 ක පමණ දුරක් ප්‍රදේශවාසීන්ට ගමන් කිරීමට සිදුවීම නිසා කින්නියා නගර සභාවේ අනුමැතිය යටතේ පාළම් පාරුවක් යොදා තිබේ.

පාළම ඉදිකරන අතරතුර ප්‍රදේශවාසීන් විසින් කළපුව තරණය කිරීම සඳහා පාරුවක් යොදාගත් නමුත් එය නිසි ප්‍රමිතියකින් යුතුව ක්‍රියාත්මක නොවූ බව කින්නියාවේ සමාජ ක්‍රියාධාරියකු වන නාසික් මජීඩ් පැවසීය.

අනතුරෙන් පසු ප්‍රදේශවාසීන් කින්නියා බුහාරි හන්දිය අසලින් මාර්ගය හරස් කරමින් ටයර් පුළුස්සමින් කළහකාරි ලෙස විරෝධතාවක නිරත වූයේ අදාළ සංවර්ධන ව්‍යාපෘතියේ නිලධාරීන්ට විරෝධය දක්වමිනි.


ඉන් පසුව විරෝධතාකරුවන් පිරිසක්  ශ්‍රී ලංකා මුස්ලිම් කොංග්‍රසයේ ත්‍රිකුණාමලය දිස්ත්‍රික් පාර්ලිමේන්තු මන්ත්‍රී එම්.එස්.තවුෆික්ගේ කින්නියා හි පිහිටි නිවසට ගල් මුල් ප්‍රහාරයක් එල්ල කර දැඩි හානි සිදු කර තිබේ.

 

ඒ අදාළ පාළම් ව්‍යාපෘතිය ආරම්භකිරීමට මුල් වූ පාර්ලිමේන්තු මන්ත්‍රීවරයා එහි සංවර්ධන කටයුතු අතරතුර ඇතිවිය හැකි මෙවැනි අනතුරු වැළැක්වීමට නිසි වැඩපිළිවෙළක් ක්‍රියාත්මක කර නොමැති බවට චෝදනා කරමිනි.

පළාත් බද වාර්තාකරුවන් වැඩි දුරටත් පවසන්නේ කළහකාරී ලෙස හැසිරුණු ප්‍රදේශවාසීන් කින්නියා ප්‍රාදේශීය ලේකම් කාර්යාලය අසළට පැමිණ විරෝධතාවයේ නිරත වීමත් සමඟ එම ස්ථානයේ ගැටුම්කාරී තත්වයක්ද උද්ගත වු බවයි.

මියගිය පිරිසගේ  දේහයන් පිළිබඳ පශ්චාත් මරණ පරීක්ෂණ කටයුතු ඊයේ  පස්වරුවේ සිදුකිරීමට නියමිතව තිබූ අතර ඊට ප්‍රදේශවාසීන්ගෙන් විරෝධය එල්ලවීමත් සමඟ කින්නියා රෝහල ඉදිරිටද ඇති වුණේ කළහකාරී තත්වයකි.

පාළම්පාරු අනතුර සම්බ්න්ධයෙන් වහාම පරීක්ෂණයක් පවත්වන්නැයි නැගෙනහිර පළාත් ආණ්ඩුකාර අනුරාධා යහම්පත් විසින් පළාත් පාලන කොමසාරිස්වරයා වෙත නියෝග කර ඇත.

පරීක්ෂණය පැවැත්වීම සඳහා දැනටමත් පළාත් මහාමාර්ග අමාත්‍යංශයේ ලේකම්වරයාගෙන් ප්‍රධානත්වයෙන් විශේෂ කමිටුවක් පත් කර ඇති බව ජනමාධ්‍ය වාර්තා කර තිබේ.

 

 


 

THE  LEADER  TV
 

ඇගෙන් වැඩ මොළේ වැඩ නෑ! | මොණරවිලගේ ලියමන
 

 
 
ඇමති නොනලටත් මහින්ද බයිට්!

.
  

subscribeYT

subscribeYT

WhatsApp Image 2021 09 13 at 13.49.58