ස්කොට්ලන්ත පොලිසිය විසින් දශක එකහමාරකට ආසන්න කාලයක් ශ්‍රී ලංකාවේ පොලිස් බලකායට දෙන ලද පුහුනුව නතර කිරීමට ගෙන ඇති තීන්දුව
සම්බන්ධයෙන් ජාත්‍යන්තර මානව හිමිකම් සංවිධානයක ප්‍රසාදය පලවී තිබේ.
ඒ ගැන සතුට පළකරමින් ජාත්‍යන්තර නීතිවේදිනී යැස්මින් සූකාගේ ප්‍රධානත්වයෙන් යුත් සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP) ශ්‍රී ලංකාවේ භාෂා තුනෙන්ම නිවේදනයක් නිකුත් කර ඇත.
මානව හිමිකම් පිලිබඳ ගැටළු නිසා ශ්‍රී ලංකාවේ පොලිසියට දෙන පුහුණුව තව දුරටත් පවත්වාගෙන නොයාමට තීන්දු කළ බව ස්කොට්ලන්ත පොලිස් ප්‍රධානී ඉයේන් ලිවින්ග්ස්ටන් එරට පොලිස් අධිකාරියේ ඉහළ බලධාරීන්ගේ සමුළුවට ඊයේ (24) දැනුම් දුන්නේය.
මෑත කාලය තුල ඉහළ ගොස් ඇති අත්අඩංගුවේ මරණ, වධබන්ධන සහ හිතුමතේ රඳවා තබාගැනීම් පිළිබඳව වාර්තා වෙමින් පැවතියදී ශ්‍රී ලංකාවේ පොලිසියට ස්කොට්ලන්ත පොලිස් බලකාය විසින් දෙනු ලබන පුහුණු කිරීම් අත් හිටුවා කරන ලද පුනරීක්ෂණයකින් අනතුරුව එම තීන්දුව ගෙන තිබේ.
ඒ වෙනුවෙන් දිගටම උද්ඝෝෂණයේ යෙදුනු සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP) විසින් එය හඳුන්වා ඇත්තේ පොලිසියේ වධබන්ධනවලට ගොදුරු වූවන්ගේ මහත් ජයග්‍රහණයක් ලෙසිනි.
“ශ්‍රී ලංකාවේ පොලිසියට දෙන පුහුණුව නවතා ලීමට ස්කොට්ලන්ත පොලිසිය තීන්දු කිරීම අපේ ඉමහත් සතුටට හේතුවේ. එය දිගින් දිගටම සිදුවන වධබන්ධන පිළිබඳ විශ්වසනීය චෝදනා හමුවේ එම පුහුණුව නැවත සලකා බලන ලෙස 2016 සිට ඉල්ලා සිටි අප හැමගේ මහත් ජයග්‍රහණයකි,” යි සත්‍යය හා යුක්තිය සඳහා වන ජාත්‍යන්තර ව්‍යාපෘතියේ (ITJP) විධායක අධ්‍යක්ෂිකා යැස්මින් සූකා පැවසුවාය.
“වධහිංසාව ශ්‍රී ලංකාවේ දශක ගණනාවක් තිස්සේ නිර්බාධිතව කරගෙන යන්නකි. මෙය පීඩිතයන්ටද මහත් ජවයක් සපයන්නකි. ඉන් ඇතැමකු ස්කොට්ලන්තයේ ජීවත් වන්නවුන්ය. කුප්‍රකට වධකාගාරයක් භාරව සිටි පොලිස් නිලධාරියකු වධහිංසාවට එරෙහි එක්සත් ජාතීන්ගේ කමිටුවට සිය නියෝජිතයා ලෙස යවන්නට තරම් විලිබිය නැති කමක් 2016 දී ශ්‍රී ලංකාවේ රජයට තිබුණි. වධහිංසා සිදුකෙරෙන බව එම රැස්වීමේදී ප්‍රතික්ෂේප කළ ශ්‍රී ලංකාවේ නිලධාරීන්, තම විශ්වසනීයත්වය තහවුරු කරන්නට ගෙනහැර පෑවේ බ්‍රිතාන්‍ය පුහුණුවයි.”
කොළඹ බ්‍රිතාන්‍ය මහ කොමසාරිස් කාර්යාලයේ මූල්‍යාධාරයෙන් ශ්‍රී ලංකාවේ පවත්වාගෙන යනු ලැබු පොලිස් පුහුණුව ලබන මාර්තුවේ නිමාවන්නට නියමිතය. එය තවත් දිගු කළ යුතුද යන්න පිළිබඳ පසු විපරමක් බ්‍රිතාන්‍යය විසින් ආරම්භ කර ඇත්තේ ඉකුත් මැයි මාසයේය.
ප්‍රජා පොලිස් සේවා හා ලිංගික සහ ලිංගික සමාජභාවී ප්‍රචණ්ඩතා වලක්වා ලීමත්, පොලිස් සේවයේ ලිංගික සමානතාව සඳහා දිරි දීමත් පුහුණුවට ඇතුලත් වන බව ස්කොට්ලන්ත පොලිසිය පවසයි.
ශ්‍රී ලංකාවේත්, බ්‍රිතාන්‍යයේත් පොලිසි විසින් ශ්‍රී ලංකාවේ කරන ලද මානව හිමිකම් උල්ලංඝන වසර ගණනාවක පර්යේෂණ ඔස්සේ හෙළිකොට ඇති ගවේෂණාත්මක මාධ්‍යවේදී ෆිල් මිලර් ශ්‍රී ලංකාවේ ප්‍රජා පොලිස් සේවය සඳහා බ්‍රිතාන්‍ය මුදල් යෙදවීම දැඩි දෝෂ දර්ශනයට ලක් කර තිබුණි.
කොතෙක් පුහුණු කළත් මානව හිමිකම් උල්ලංඝන නවතින්නේ නැති බව පවසන ITJP විධායක අධ්‍යක්ෂිකා යැස්මින් සූකා ඉල්ලා සිටින්නේ වධහිංසාව සම්බන්ධයෙන් යුක්තිය ඉෂ්ට කිරීම වෙනුවෙන් ජාත්‍යන්තර ප්‍රජාව කටයුතු කළ යුතු බවයි.
“සියලු ආකාරයේ පුහුණු කිරීම් තිබියදීත්, ශ්‍රී ලංකාවේ පොලිසිය හා හමුදාව වධහිංසා පැමිණවීම නොනවත්වාම කරගෙන යයි. ජාත්‍යන්තර ප්‍රජාව විසින් කළ යුත්තේ සංස්ථාපිත උල්ලංඝන නැවැත්වීම සඳහා හුදෙක්ම ප්‍රමාණවත් නොවන පුහුණුව සහ ශක්‍යතා වර්ධනය සඳහා ආධාර හා සහාය දීම වෙනුවට වධහිංසාව සඳහා වගඋත්තරදායකත්වය කරා යොමු වීමයි.”
ශ්‍රී ලංකාවේ පොලිසියට ලැබුණු ඉහළම ජාත්‍යන්තර සහයෝගයක් මානව හිමිකම් උල්ලංඝන චෝදනා හේතුකොටගෙන අහිමි වීම පිළිබඳව ආණ්ඩුව තවම ප්‍රතිචාරයක් දක්වා නැත.
සබැඳි පුවත :
ශ්‍රී ලංකාවේ පොලිසියට තවදුරටත් ස්කොට්ලන්ත පුහුණුව නෑ
ශ්‍රී ලංකා පොලිසියේ පිටරට පුහුණු වලක්වන්නට තවත් සංවිධාන එක්වෙයි
බ්‍රිතාන්‍ය පොලිස් ආධාර මුළුමනින්ම නැවත්වීමට යැස්මින් සූකා ඉල්ලයි
මානව හිමිකම් චෝදනා නිසා ශ්‍රී ලංකාවේ පොලිසියට දෙන බ්‍රිතාන්‍ය ආධාර නවතී
2024 දී පොහොට්ටුවේ කැරැට්ටුව ?
