කම්කරුවන්ගේ අයිතීන් කප්පාදු කරමින් වතු සමාගම් ගෙන යන මර්දනකාරී පිළිවෙතට එරෙහිව ආණ්ඩුවේ හවුලකාර පාර්ශවයක් විරෝධතා සංවිධානය
කර තිබේ.
''වතු කොම්පැනිකාරයෝ කම්කරුවන්ට සලකන්නේ ඉතාම පහත් විදිහට, කම්කරු අමාත්‍යංශය දෙන තීන්දු පවා මේ කොම්පැනි පිළිපදින්නේ නෑ,'' යැයි ලංකා කම්කරු කොංග්‍රසය නියෝජනය කළ මධ්‍යම පළාත් සභාවේ හිටපු මන්ත්‍රී ඒ.පී.සත්‍යවේල් කියා සිටියේ, ලංකෙම් සමාගම් සමුහයට අයත් ආගරපතන වතු යායේ කම්කරුවන් ගෙන යන අරගලයට සහයෝගය ලබා දෙමිනි.
ලංකා කම්කරු කොංග්‍රසයේ ප්‍රධාන ලේකම්, රාජපක්‍ෂ ආණ්ඩුවේ වතු යටිතල පහසුකම් රාජ්‍ය ඇමැති ජීවන් තොන්ඩමාන් ගේ විශේෂ නියෝජිතයා ලෙස ඊයේ දිනයේ ආගාරපතන වතු කම්කරුවන් සමඟ එක්වූ සත්‍යවේල් කියා සිටියේ, කම්කරුවන්ට දවසක වැටුප රුපියල් දහසක් ලබා දෙන ලෙස පඩි පාලක සභාව මගින් නිදේශ කර ගැසට් මගින් පළ කර තිබියදීත්, වැටුප් ලබා නොදී කම්කරුවන් තවත් පිඩනයට ලක් කරන බවය.
''පොහොර නැති නිසා දළු නැති වෙලා තියෙනවා. එහෙත් දළු කිලෝ 20 ක් දවසකට කඩන්න ඕනෑ කියලා කොම්පැනිකාරයෝ කම්කරුවන්ට බල කරනවා. කිලෝ 20 කැඩුවේ නැත්නම් වරුවක පඩියක් විතරයි දෙන්නේ,'' යැයි මධ්‍යම පළාත් සභා හිටපු මන්ත්‍රී සත්‍යවේල් වතු සමාගම් වලට චෝදනා කරමින් ආණ්ඩුවෙන් ඉල්ලා සිටින්නේ මේ ගැන සැලකිල්ලට ගන්නා ලෙසය.
වතු සමාගම් හා වෘත්තීය සමිති වසර දෙකකට වතාවක් කම්කරුවන්ගේ වැටුප් හා අනෙකුත් සුබ සාධන සම්බන්ධයෙන් වන සාමුහික ගිවිසුම අවසන් වරට 2016 දී අත්සන් කෙරුණු අතර රුපියල් දහසේ ගැටලුව නිරාකරණයට පඩි පාලක සභාවට යොමු කිරිමත්, ඒ මගින් ලබා දුන් නිර්දේශයන්ට එරෙහිව වතු සමාගම් අභියාචනාධිකරණය වෙත යාමත් සමඟ එම සාමුහික ගිවිසුම අහෝසි විය.
එම ගිවිසුම් වලට එළඹෙන පාර්ශවයක් ලෙස වතු හාම්පුතුන්ගේ පිළිගැනීමට ලක්වන ලංකා කම්කරු කොංග්‍රසය නව සාමුහික ගිවිසුමකට එළඹෙන ලෙස බලපෑම් කරමින් සිටී.
''සාමුහික ගිවිසුම කියන්නේ වතු කම්කරුවන්ගේ ආරක්‍ෂක ආයුධය. දැන් අනෙකුත් වෘත්තීය සමිතිත් මේක තේරුම් අරන් තියෙනවා. අපි කොහොමත් වතු කම්කරුවන්ට සාධාරණය ඉටු වෙන තුරු සටන් කරනවා,'' යැයි සත්‍යවේල් පවසයි.
ලංකා කම්කරු කොංග්‍රසයේ නියෝජ්‍ය නායිකා අනුෂියා අන්නමලේ සිවරාජාගේ නායකත්වයෙන් ඩයගම, තලවාකැලේ කොටගල සහ ලිඳුල වතුවල සිය ගණනක් කම්කරුවන් ඉකුත් 12 වැනිදා ලිඳුල නගරයට රැස් වී උද්ඝෝෂණය කළේ නව සාමුහික ගිවිසුමක අවශ්‍යතාව පෙන්වා දෙමින්ය.
නාන සාර නිසා නාන සර් ! | "ස" ගේ දැනගැනීම පිණිසයි
