ජාතික රූපවාහිනිය කළ බරපතල නිගරුවක් ! -බුද්ධි ගලප්පත්ති 

 

 

ජාතික රූපවාහිනිය කොරෝනා සමයේ නිවෙස් තුළටම වී කලකිරීමෙන් අවිනිශ්චිත බවින් සිටින්නට සිදු වී ඇති ප්‍රේක්ෂක ජනතාව ඉන් බිඳකින් හෝ මුදවා ගනු වස් විකාශය කරනු ලබන වැඩ සටහන් දෙකක් පිළිබඳ කෘතවේදීව සටහන් කරමි.

 

පෙරදා සජීවීව රූගත කොට සංරක්ෂණය කොට ඇති ජනප්‍රිය හා කලාත්මක වේදිකා නාට්‍ය විකාශය පළමුවැන්නයි.

 

කේ.බී.හේරත්ගේ මායාදේවී හා පුණ්‍යසේන ගුණසිංහගේ කාලගෝල දැනටමත් විකාශය වූ නාට්‍ය අතර වේ. 

 

අද (7) රාත්‍රියේ කේ.බී. හේරත් ගේ තවත් අපූරු රංග කාර්යයක් වූ දෝන කතිරිනා විකාශය කෙරෙන බව සඳහන් පූර්ව ප්‍රචාරක දැන්වීම් දුටිමි. 

 

මෙය ඉතා අගය කළ යුතු පියවරකි. 

 

එහෙත් එකම අඩුපාඩුව ලෙස මා දකින්නේ ටෙලිනාට්‍යයක් මෙන් විනාඩි 20 ක පමණ කොටස්වලට කඩා විකාශය කිරීමයි. 

 

ඒ අතරෙහිත් වෙලාව කීමටත් වෙළඳ දන්වීම් සඳහාත් බාධාවීම නිසා නාට්‍යයක් නැරඹීමේ රසය ප්‍රෙක්ෂකයන්ට නොලැබෙන බව රූපවාහිනිය වටහා ගෙන නොමැත. 

 

වේදිකා නාට්‍යයක් රූපවාහිනියේ විකාශය කරනවා නම් එය කොටස් දෙකකට වඩා දීර්ඝ නොකළ යුතුවන්නේ, කුඩා කොටස්වලට කඩා පෙන්වන වේදිකා නාට්‍ය නිර්මාණයකින් නාට්‍යමය රසය විඳ ගැනීමට ප්‍රේක්ෂකයන්ට ඉඩ නොලැබෙන බැවිනි.

 

රූපවාහිනිය ඒ පිළිබඳ සිතනවා නම් එය ප්‍රේක්ෂක අපගේ සතුටට හේතුවන බව කිව යුතුය. 

 

 

 

දෙවැන්න ජාතික රූපවාහිනිය විසින් විකාශය කරනු ලබන පෙරදා රසික සිත් දිනූ සිංහල සිනමාවේ කලාත්මක චිත්‍රපට විකාශයයි. 

 

සාමාන්‍යයෙන් රූපවාහිනී වැඩ සටහන් නැරඹීමට ( ක්‍රිකට් හැර ) කැමැත්තක් නැති මා අහම්බෙන් මෙන් පසුගිය දින කීපයක විකාශය වූ සිංහල චිත්‍රපට දෙකක් එනම්, ආචාර්ය ලෙස්ටර් ජේම්ස් පීරිස්ගේ ගොළු හදවත හා සංදේශය නැරැඹූවෙමි. 

 

ඉදිරි දිනෙක ප්‍රසන්න විතානගේ සිනමාකරුවාගේ සම්මානිත නිර්මාණයක් වූ ආකාස කුසුම් ද විකාශයට නියමිත බව දුටුවෙමි.

 

ඉදිරියේ දී විකාශය වීමට නියමිත චිත්‍රපට නාමාවලියට ආචාර්ය ලෙස්ටර් ජේම්ස් පීරිස්ගේ ගම්පෙරළිය ද ඇතුළත් කිරීමට යෝජනා කරමි. උසස් පෙළ සන්නිවේදන හා මාධ්‍ය අධ්‍යනය විෂය නිර්දේශයට ගම්පෙරළිය චිත්‍රපටය ද ඇතුළත්වන බැවින් එය විකාශය කිරීම චිත්‍රපටය නරඹා නොමැති දරුවන්ගේ යහපතට හේතුවන බව ද සටහන් කරමි.

 

පසුගිය  5 ඉරිදා දිවාකාලයේ සංදේශය යළිත් වරක් ( මෙතෙක් සංදේශය නරඹා ඇති වාර සංඛ්‍යාව දහ දොළොස් වතාවකට වැඩිවූව ද ) සංදේශය නැරඹීමට සැරසුණේ චිත්‍රපටය නැරඹූ පළමු දිනයේ සිට අද දක්වාම ආසාවකින් හා කැමැත්තකින් නැරඹීමට හැකි පැරණි චිත්‍රපටයක් වන බැවිනි.

 

1960 තිරගත වූ සංදේශය පාසල් සිසුවකු ලෙස මුල් වතාවට මා නැරඹූවේ මාතර රිච්මන්ඩ් සිනමා  (අද එස්.කේ ) සිනමා ශාලාවේදීය.

 

 සංදේශය නැරඹීමට විශේෂ හේතුවක් වූයේ අප පාසලෙහි, සාන්ත සර්වේෂස් විද්‍යාලයේ ඉහළ පංතියක ඉගෙනුම ලැබූ ක්‍රිකට් හා පාපන්දු ක්‍රීඩාවෙහි හපන් රාජපක්ෂ සහෝදරයන්ගේ වැඩිහිටි අය්යා කෙනෙක් සංදේශයේ රඟපාන බවත්, ඔහුගේ නිශ්චල ඡායාරූප පුවත්පත්වල පළව තිබී දුටු නිසාත්ය.

 

සංදේශය නරඹන්නට ගොස් සිදුවූ අකරතැබ්බ්ය ද මට සිහිවේ. අම්මාත් තාත්තාත් මල්ලීත් සමග ගන්දර සිට මාතරට ගියේ උදේ 10.30 දර්ශනය නරඹන්නට වූවත් රිච්මන්ඩ් සිනමාශාලාව හවුස්ෆුල් වී තිබීම නිසා කුමක් කළ යුතුදැයි සිතා ගැනීමට නොහැකිව සිටියෙමු.

 

 නැවත ගෙදර ගොස් 2.30 දර්ශනයට පැමිණීම ද කාලය නාස්ති කර ගැනීමකි. ගඟෙන් එගොඩහ, රාහුල පාරේ ඉන්නා නැන්දා කෙනෙක් පිළිබඳ අම්මාට මතක් විණ. මාතර රෝහලේ හෙදියක් වූ ඈ අනුලම්මාය. අපි බක්කි කරත්තයක නැගී රාහුල පාරට ගියෙමු. දවල් කෑම අවසන කල් වේලා ඇතිව ආපහු රිච්මන්ඩ් සිනමා ශාලාවට පැමිණ සංදේශයත්, පාසලේ රාජපක්ෂ අය්යාත් දැක ගත්තෙමි.

 

අන්න අපේ ඉස්කෝලෙ අය්යා කියා අම්මාට පෙන්වන කොටම ඔහුගේ රුව මැකුණු හැටිත් මතකය. ඔහු රඟපෑවේ කැරලි නායක බණ්ඩාරගේ සගයෙක් විදියටය.

  

 

මා පළමු වරට ගාමිණී ෆොන්සේකා තිරයේ දුටුවේ සංදේශයෙනි. ඔහු බණ්ඩාරගේ ( ආනන්ද ජයරත්න ) ගේ අනුගාමික තම්මිටය. කැරලිකාර මුරකරුවෙක් වූයේ අපේ පාසලේ රාජපක්ෂ අය්යාය. ඔහු ඩී.රාජපක්ෂ බව දැනගතිමි. 

 

රෝලන්ඩ් ඒ.ප්‍රනාන්දු ලියූ ලෙස්ටර් ජේම්ස් පීරිස්ගේ සංදේශය ( තොරතුරු, ඡායාරූප, විචාර ඇතුළත් පර්යෙෂණාත්මක ග්‍රන්ථය - 2003 ) කෘතියෙහි මේ සියලු නම්ගම් තිබිණ.

 

සංදේශය නරඹා කාන්ති ගුණතුංගගේ ගාමිණී, ආනන්ද ගේ ෂේන් ගුණරත්නගේ, අයිරාංගනී මීදෙණිය( සේරසිංහ) හියුගෝ ප්‍රනාන්දු ආදීන්ගේ මෙන්ම පෘතුගීසි බලකොටුවේ කපිතාන් ආතර් වැන්ලැන්ගම් බර්ග් හා ලයිතාන් රෙග් වැන්ක්‍යුලන් බර්ග් ආදීන්ගේ රඟපෑම්වලින් මත් වී සිටියෙමි. 

 

කෝ හතුරෝ ගීතයේ සිට, රෑන ගිරා රෑන අඹේ මී බිබී, රැජින මමයි අපේ රාජ්ජේ, පුන්සඳ එළියයි එන මඳ සුළඟයි, පෘතුගීසිකාරයා, වැනි ගීත මිහිරෙන් අද ද අප සිත් සැනහෙන්නේ අරීසෙන් අහුබුදු සූරීන්ගේ ගී පද මාලාහි තිබූ රමණීය ගීතවත් භාෂාව, මිහිරි තනු ( සුනිල් සාන්ත ) පසුබිම් සංගීතය ( කේ.ඒ. දයාරත්න ) වාදක මණ්ඩලය මෙහෙයවීම ( ආර්. මුත්තුසාමි ) ආදීන්ගේ දායකත්වය නිසා මෙන්ම ලතා ධර්මදාස වල්පොල, මොහිදීන් බෙග්, එච්.ආර්.ජෝතිපාල, සිඩ්නි ආටිගල ආදීන්ගේ ගායන මධුරතාව ද නිසාය.

 

අහුබුදු සූරීන් සුදා යන වචනය කෙතරම් කලාත්මකව භාවිත කොට ඇද්ද යන්න විමසීම වටී. ඔහු සොයමින් මා එනවා මේ - ගීත ගයා රඟා රඟා-ලා, මාගේ සූදා මාගේ සූදා තාම නෑ... ජනප්‍රිය චිත්‍රපට සංකල්පයේ ඇරැඹුම සංදේශය බව සිනමා විචාරක ගාමිණී වේරගම පවසයි. 

 

සිනමානුරූපී බවින් ද, ගීත ඉදිරිපත්කිරීමේ නැවුම් සිනමානුරූපී ස්වභාවය ද සංදේශයෙහි ප්‍රශස්ථ ලක්ෂණ සේ වේරගම දකියි.

 

විලී බ්ලේක්ගේ අර්ථාන්විත කැමරාකරණය,දේශීය සිනමාවට පසුකාලයේ පෝෂණයට උරදුන් කලාකරුවන් රැසකගේ බිහිවීම සංදේශයෙහි විශිෂ්ටතා අතර වේ. 

 

 

 

දෛවයෝගයේ රඟපෑම් අතික්‍රමණය කරමින් එක් රැයකින් ගාමිණී ෆොන්සේකා තම රංගන ශක්‍යතා පෙන්වමින් මහා නළුවකුගේ උපත සටහන් කරයි.

 

සුමිත්‍රා ගුණවර්ධන (පීරිස්), තිස්ස ලියනසූරිය, සුමිත්ත අමරසිංහ, අරීසෙන් අහුබුදු, ජීවරාණී කුරුකුලසූරිය සංදේශය සමග කල එළි බසිති. 

 

සිනමාස් සමාගමේ වැටුප් ලේඛනයේ සිටි ආනන්ද ජයරත්න, කාන්ති ගුණතුංග, ඩේවිඩ් ධර්මකීර්ති, හියුගෝ ප්‍රනාන්දු, වින්ස්නට් වාස් වැනි නළු නිළියන් සමග කටයුතු කරන්නට ලෙස්ටර්ට සිදු වූවත්, ඔහු ඔවුන්ගේ රංගන කුසලතා මැනවින් උකහා ගනිමින් ඔවුන් පුරුදු වී සිටි රංගන විලාස අවශ්‍ය ලෙස වෙනස් කිරීමට සමත් වූ බව පෙනේ. ( දේශීය සිනමා වංශය - ප්‍රථම කාණ්ඩය ගාමිණී වේරගම 2014 )

 

  

 

 

 

 

 

මෙතෙක් අප නරඹා තිබූ සංදේශය චිත්‍රපටයේ නාමාවලිය තිරයේ පතිත වන කල්හි අපට ඇසුණේ ''කෝ හතුරෝ කෝ හතුරෝ කෝ අපගේ හතුරෝ'' ගීතයයි. 

 

ගේය පද රචනයට මෙන්ම චිත්‍රපටයේ තේමාවට ද වඩාත්ම උචිත රූපාවලියක් මත නාමාවලිය තිරයෙහි දිස්විණ.

 

එහෙත් ජාතික රූපවාහිනිය සංදේශය නාමාවලිය තිරයේ පතිත වන කල්හි පසුබිමින් වාදනය කළේ පුරුතුගීසි කාරයා ගීතය යැයි කිවහොත් මොහොතකට හෝ ඔබ එය විශ්වාස කරනවාද? ඔව්, ඉරිදා අප දුටු සංදේශය නාමාවලිය පසුබිමින් ඇසුණේ පුරුතුගීසිකාරයා ගීතය වීම අහම්බයක් සේ නොසලකා හැරිය හැක්කක් ද? 

 

විකාශයට ඉතා නුසුදුසු පිටපතක් වූවත් චිත්‍රපටය අද දවසේ පරපුරට දැක බලා ගන්නට සැලැස්වීම පිළිබඳ රූපවාහිනියට ස්තුතිවන්ත වූවත් මේ අපරාධයට නම් ඔවුනට සමාවක් දිය නොහැකිය. 

 

ඔවුන්ට ලැබුණු පිටපතෙහි තිබුණේ පෘතුගීසිකාරයා ගීතය නම් රූපවාහිනිය කළ යුතුව තිබුණේ චිත්‍රපටයේ මුඛ්‍යාර්ථයට තේමාවට කිසිසේත්ම නොගැලපෙන ගීතයේ හඬ නිහඬ කොට නාමාවලිය විකාශය කිරීම නොවේ ද?

 

''කෝ හතුරෝ ගීතය'' යුද හමුදාව විසින් අනුවාදනයක් ලෙස භාවිත කරනු විනා ගුවන්විදුලියකින් අසන්නට නොලැබෙන ගීතයකි.

  

 

 

ආචාර්ය ලෙස්ටර් ජේම්ස් පීරිස් උපතින්  කතෝලිකයෙකි. කතෝලික පාසලක අධ්‍යාපනය හැදෑරූ ඔහු කලක් එංගලන්තයේ වාසය කළේය. සිංහල බෞද්ධ සංස්කෘතිය හෝ ජන සමාජය පිළිබඳ විසාල දැනුමක් නැත්තෙකු වූවත්, ඔහු කිසිදු අවස්ථාවක චිත්‍රපටයේ තේමා ගීතය විකෘත කරන්නට උත්සාහ කළේ නැත. 

 

සිංහල සිනමාවට කලාත්මක චිත්‍රපට රැසක්ම දායාද කළ සිනමාස් සමාගමේ අධිපති කේ. ගුණරත්නම් ද්‍රවිඩ ජාතිකයකු වූවත් සංදේශයෙන් මතුකරන්නට ලෙස්ටර් උත්සාහ කළ කන්ද උඩරට සිංහල කරලිකරුවන්ගේ ප්‍රතිරූපය විනාශ කොට පෘතුගීසින්ගේ පරාක්‍රමය ඔසවා තබන්නට උත්සාහ කළේ නොමැත.

 

අතිශය අර්ථවත් තේමා ගීයක් රචනා කළ අරීසෙන් අහුබුදු සූරීන් විසින් ඉරිදා ජාතික රූපවාහිනිය විකාශය කළ සංදේශය නරඹන ලද්දේ වී නම් මවිතයට පත්වනු නියතය. 

 

ජාත්‍යාල විරුවන් අතින් ඝාතනය වූ කේ. ගුණරත්නම් හෝ ගම්පෙරළිය, රන්සළු, නිධානය වැනි විශිෂ්ට සිනමා කෘති දායාද කළ ආචාර්ය ලෙස්ටර් පීරිස් මෙවැනි විසූක දස්සන දකින්නට ජීවතුන් අතර නොසිටීම ඔවුන්ගේ වාසනාවක්දැයි නොදනිමි.