සිය ක්‍රීඩා දිවියේ හොඳම කාලයන් තවමත් වාර්තා කරමින් සිටින මේ මැරතන් ධාවකයා අප්‍රේල් 13 වැනි ඉරිදා ස්විට්සලන්තයේ පැවති සූරිච් මැරතන් තරගය පිට පිට තෙවැනි වතාවටත් ජයග්‍රහණය කළේ පැය 2යි: මිනිත්තු 09යි: තත්පර 16ක් සටහන් කරමින්. තමාගේ උපරිම දක්ෂතා යුගය පසුකර ඇතැයි නිතර සලකා බැලෙන ධාවකයෙකුට මේ කාලය විස්මයජනක හපන්කමක්.
කිප්ටූ මීට පෙර 2023 හා 2024 වසරවලදී ද සූරිච් මැරතන් තරගය ජය ගත්තා. මේ වසරේදී ඔහු සටහන් කළේ මේ තරග මාර්ගයේ ඔහුගේ දෙවැනියට වේගවත්ම කාලය. මෙය දෙවැනි වන්නේ ඔහුගේ M45+ මාස්ටර්ස් මැරතන් ලෝක වාර්තාව වන 2:09:12 ට පමණයි. මේ අනුව සිය 45-49 වයස් කාණ්ඩයේ කිප්ටූගේ ම ලෝක වාර්තාවට වඩා මෙවර ඔහුගේ සූරිච් කාලයේ වෙනස වී තිබුනේ තත්පර හතරක් පමණයි. මෙය වයස් කාණ්ඩ වාර්තාවක් නොවූව ද, එය 48 හැවිරිදි වියේ පසුවන පුද්ගලයෙකුගෙන් ප්‍රදර්ශනය වූ එදා මෙදා තුර වේගවත්ම මැරතන් ධාවනය යි.
අමෙරිකා/කෙන්යා ජාතික Bernard Lagat විසින් M45+ වයස් කාණ්ඩයේ කළින් පිහිටුවා තිබූ 2:14:23 වාර්තාව මිනිත්තු පහකින් මකා දමන විට කිප්ටූගේ වයස වී තිබුනේ අවුරුදු 46ක්.
තමන්ගේ තරුණ වියේදී හෝ තරුණ වැඩිහිටියෙකුව සිටියදී හෝ මැරතන් ධාවනයට පිවිසෙන අනෙකුත් බොහෝ කෙන්යානුවන් මෙන් නොව කිප්ටූ ඔහුට වයස විසි ගණන්වල මැද වනතුරු ම දිවීම ආරම්භ කළේ නැහැ. ඔහු මැරතන් ධාවනය ආරම්භ කළේ කෙන්යානු හමුදාවන්ට සේවය කරමින් සිටියදී. කිප්ටූ ප්‍රථම වතාවට 2007 වසරේදී කෙන්යාව වෙනුවෙන් ජාත්‍යන්තර මට්ටමෙන් තරග කළේ ඔහුට වයස 31ක්ව තිබියදී.
‘කවදාවත් වියපත් නොවන විස්මය’ යන නම පටබැඳුනු කිප්ටූගේ හොඳම දක්ෂතාව වන්නේ 2015 වසරේ Eindhoven මැරතන් තරගයේ සටහන් කළ 2:06:00 කාලය.
එහෙත් ඔහු පසුගිය වසර හතරෙන් තුනකදී ම පැය 2යි මිනිත්තු 10 ට අඩු කාලයන් වාර්තා කර තිබෙනවා. කිප්ටූ අප්‍රේල් 13 වැනිදා සූරිච් මැරතන් තරගය ජයග්‍රහණය කළේ ඔහුගේ කෙන්යානු ස්වදේශික තරගකරු Joel Kipsang Kositany (2:11:25) සටහන් කළ දෙවැනි ස්ථාන කාලය අතර මිනිත්තු දෙකක සැලකිය යුතු පරතරයකින්.
මාක් කිප්ටූ 2026 වසරේ ජූනි මස 21 වැනිදා 50 වැනි වියට පා තබනවා. ඔහුට ඒ වනතුරු ඔහුගේ සූරිච් ජයග්‍රාහී දක්ෂතාව දීර්ඝ කිරීමට හැකිවුවහොත් 2:10 මැරතන් ධාවනයක යෙදුනු පළමු 50 හැවිරිදි පුද්ගලයා ලෙස ඉතිහාසගත වීමේ අවස්ථාවක් මේ දුර දිවීමේ දිරිය ක්‍රීඩකයා ඉදිරියේ තිබෙනවා.
(සටහන | වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com