නව ව්‍යස්ථාව, සැබෑ මහජන සහභාගිත්ව ව්‍යවස්ථාවක් බවට පත්කර ගැනීමේ අරමුණින් ගොඩනැගෙමින් පවතින පුළුල් මහජන ව්‍යාපාරය විසින් දියත්කරනු ලබන වැඩසටහන් මාලාවක් හෙට, දෙසැම්බර් 13 සඳුදා, කොළඹ දී ආරම්භවීමට නියමිතය.
මෙම ව්‍යාපාරය සඳහා මේ වනවිටත් සියයකට අධික බහුජන සංවිධාන සහ පුද්ගලයින් වශයෙන් පන්සියයකට අධික පිරිසක් සිය සහයෝගය පළකොට තිබේ.
ආණ්ඩුව තනි මතයට ව්‍යවස්ථාවක් ගෙනාවොත් අධිකරණය හමුවට!
ආණ්ඩුවේ ව්‍යවස්ථා සම්පාදන ක්‍රියාවලිය පුරවැසි අදහස් නොතකා, මහජන සහභාගිත්වයෙන් තොරව සිදුවන්නක් බවට පත්වුවහොත් එම තත්ත්වය වැළැක්වීම සඳහා සාමූහික නඩුකරයක පාර්ශ්වකරුවෙකු බවට පත්වීමට ද දැනටමත් බොහෝමයක් සිවිල් සංවිධාන, විද්වතුන්, වෘත්තීය සමිති සහ පුද්ගලයන් සිය එකඟත්වය පළ කර ඇත.
හෙට, දෙසැම්බර් 13, උදෑසන 10.00 සිට දවල් 1.00 දක්වා කොළඹ 03, බාලා තම්පෝ මාවතේ පිහිටි CMU ශාලාවේ පැවැත්වීමට යෝජිත “මහජන ව්‍යවස්ථාවක් සඳහා කතිකාව” වැඩසටහනේ දී මෙම වැඩපිළිවෙලට එකඟතාවය පළකළ සංවිධාන සහ පුද්ගලයන් ඒකරාශී වී ඒ සම්බන්ධ ඉදිරි ක්‍රියාමාර්ග සාකච්ඡා කොට, මහජන සහභාගිත්ව ව්‍යවස්ථාවක් සඳහා වන අභිලාෂය සහ පුරවැසි ශක්තිය සංකේතාත්මකව රටට ප්‍රදර්ශනය කිරීමට අපේක්ෂා කෙරේ.
එදින සන්ධ්‍යාවේ, ආණ්ඩුව ව්‍යවස්ථා සම්පාදනය සඳහා අනුගමනය කරන ක්‍රියාවලිය වෙනස් කරවමින් එය මහජන ව්‍යවස්ථා සම්පාදන ක්‍රියාවලියක් බවට පත්කරවීම සහ මහජන ව්‍යවස්ථාවක් සඳහා ජනමත විචාරණයක් ඉල්ලා සිටිමින් ඔවුන් ජනාධිපති ලේකම් කාර්යාලය ඉදිරිපිට නිහඬ උද්ඝෝෂණයක නිරත වීමට නියමිතය.
බ්‍රිටෝ ප්‍රනාන්දු, හර්මන් කුමාර, ජයනි අබේසේකර, තමාරා දයානි, පද්මා පුෂ්පකාන්ති, වෛද්‍ය හසන් ජුනයිඞ්, සම්පත් පුෂ්පකුමාර, නිහාල් අහමඞ්, පී. මුත්තුලිංගම්, සමන් හමන්ගොඩ, උදේනි දිසානායක, තිලක් කාරියවසම් සහ සමන් සෙනෙවිරත්න තාවකාලික සංවිධායක කමිටුවට ඇතුළත් වන අතර, මෙය පුළුල් බහුජන ව්‍යාපාරයක් බවට පත්කිරීම සිය අභිලාශය බව ඔවුහු අවධාරණය කරති.
ශ්‍රී ලංකා වෙලාවෙන් හෙට උදෑසන 09:30 සිට විදේශයන්හි සිට ද සූම් තාක්ෂණය ඔස්සේ මෙම අවස්ථාවට සහභාගි විය හැකිය.
Zoom Link - https://us02web.zoom.us/j/82618777047
Zoom හමුවේ අංකය - 82618777047
පුපුරුවාගෙන ආ එවුන් පුපුරුවාගෙන වැනසෙයි ! | මොණරවිලගේ ලියමන
පවුලේ අවුලක්! | Gossip