ගීතයක වචන, එයින් කියවෙන අදහස, සහ ගීතවත් කිරීමට යොදාගන්නා සංගීත ස්වර ඉතාමත් සරල සුගම ලෙසින් පවත්වාගෙන යාමට ළමා ගීත රචකයන් මෙන්ම නිර්මාණකරුවන් සැලකිලිමත් වන්නේ මේ නිසයි.
සාර්ථක ළමාගීතයක් ළමුන්ට පමණක් නොව වැඩිහිටියන්ට ද එකසේ රස විඳිය හැක.
ළමා ගීතවල ප්‍රධාන වශයෙන් අඩංගු පොදු කරුණු තුනක් ඇත:
# ගීත පහසුවෙන් තේරුම් ගත හැකි වීම,
# දුෂ්කරතාවයකින් තොරව ගායනා කළ හැකි වීම සහ
# ගායනයට සුදුසු රංගනයක් එකතු කල හැකි වීම.
ළමාගීතයක් තුළින් දරුවන්ට - නව සිතුවිලි, අලුත් වචන, නිර්මාණශීලි රංගන සහ සංගීත උපකරණ වාදනය කිරීම වැනි බොහෝ දේ ඉගැන්විය හැකිය.
ළමා ගීත නිර්මාණයේදී සැලකිය යුතු කරුණු වඩාත් තහවුරු කෙරෙන එක් අවස්ථාවකි පාසල් සංගීත විෂය සහ ඊට අදාල පාඩම් මාලා සැකසීම.
අධ්‍යාපන විශේෂඥයින් විසින් සංගීත පාඩම්මාලා පිළියෙළ කරනුයේ අනාගතයට වුවමනා පරිකල්පන ශක්තියෙන් යුතු නිර්මාණශීලි පුද්ගලයින් පිරිසක් බිහිකිරීමේ අදහසින් මිස හුදෙක් විභාගයක් සමත් කරවීම පමණක් අරමුණු කරගෙන නොව. සංගීතය සමඟ මුසු වී ජීවිතය ගොඩනගන පුද්ගලයාට තවත් කෙනෙකුගේ හදවතෙහි රිද්මය හඳුනාගැනීමට අපහසු නැත.
සියළු කලාවන් අතරේ සංගීතයට මිනිසකු සමබර කර තැබීමට ද හැකිබව පර්යේෂණ මඟින් සනාථ කර ඇත.
නමුත් මෑත කාලයේ ළමයින්ගේ ගීත රසවින්දනය, රුචිකත්වය සහ හැකියාවන් වෙනත් දිශාවකට ගමන් කරන අයුරු අසන්නට සහ දකින්නට ලැබීම ඉතා
අවාසනාවන්ත කරුණකි.
අද ළමයා ඇසීමට, ගැයීමට, සහ රස විඳීමට තෝරාගන්නා ගීත දෙස බලද්දී ළමයාගෙන් ළමාකම ගිලිහී යනවාදෝ කියා අපට සිතේ. නමුත් මෙසේ දරුවාට බැරෑරුම් වැඩිහිටි ගීත තෝරාදෙන්නේ දෙමාපියන් හෝ ගුරුවරුන්ය. බොහෝ දෙමාපියන් කෙටි කාලින ප්‍රතිලාභ කෙරෙහි යොමුවනවා මිස දිගු කාලීනව දරුවා සංගීත ක්ෂේත්‍රය තුළ රඳවා තැබීමේ වටිනාකම ගැන සිතන්නේ නැත.
අද දෙමාපියන්ට වුවමනා තම දරුවට ඉක්මන් ප්‍රසිද්ධියක් ලබාදීමට සහ හැකිනම් මූල්‍ය වාසියක් ලබාගැනීමටය. ඔවුන්ට අවනත වන ළමයා ද ගිරවුන් මෙන් වචන අහුලා ගනිමින් හඬට කුමක් හෝ ගීතයක් ගායනා කර දෙමාපියන් සතුටු කිරීමේ උත්සාහයක යෙදේ. මෙම තත්ත්වයට වගකිවයුතු අය අතරේ දෙමාපියන්, ගුරුවරුන් සහ විද්‍යුත් මාධ්‍ය ඉදිරියෙන් සිටී.
තම දරුවාට වුවමනා ශාරීරික පෝෂණයට රසයෙන් ගුණයෙන් පිරි ආහාර ලබාදෙනවා මෙන්ම, දරුවාට අවශ්‍ය පෙනුම ලස්සන ලබාදීමට සුදුසු ඇඳුම් පැළදුම් ලබාදෙනවා මෙන්ම ඔවුන්ගේ ළමා මනසට අවශ්‍ය නිසි පෝෂණය ලබාදීමට ද දෙමාපියන් දැනුවත් විය යුතුය, උනන්දු විය යුතුය.
ළමයාට කියවීමට සුදුසු පොත් පත් තෝරා දිය යුත්තේ දෙමාපියන්ය. දරුවාගේ කුසලතා දියුණු කිරීමට වුවමනා අතිරේක ක්‍රියාකාරකම් තෝරා බේරා ඒ වෙත දරුවන් යොමුකළ යුත්තේ දෙමාපියන් ය. එසේම ළමයාට අසන්නට දකින්නට සලස්වන ගීත, නාට්‍ය, චිත්‍රපට තෝරා බේරා දිය යුත්තේ ද දෙමාපියන් විසිනි.
වර්තමානයේ විවිධ නාලිකා මගින් සංවිධානය කරනු ලබන ප්‍රසාංගික සංගීත තරඟ සඳහා දෙමාපියන් විසින් තම දූ පුතුන් සහභාගී කරනු ලැබේ. බොහෝ විට මෙම තරඟ සඳහා ළමයා ගායනා කිරීමට තෝරාගන්නේ වැඩිහිටියකු විසින් තෝරාදෙනු ලබන ගීතයකි. ඇතැම් විට ළමයා ගයන ගීතයෙහි අර්ථය ළමා ලෝකයට ගෝචර නොවන බව දෙමාපියන් තේරුම් ගන්නේ නැත. ඔවුන්ට එය තේරුම් ගැනීමට වුවමන්වක් ද නැත. තේරුම් ගියත් සමහර විට
දෙමාපියන්ද සමාජ රැල්ලට එකතු වී සිටිනවා විය හැක.
නිවැරදි සංගීත අභ්‍යාස ලබාදීම තුළින් සහ සංගීතය පිළිබඳ මනා අවබෝධයක් ලබා දී ළමයා පෝෂණය කළ යුතු බව සිතන දෙමාපියන් අද සමාජය තුළ විරලය. කටේ කිරි සුවඳ යාමටත් පෙර පුංචි දරුවන් මුවින් වැඩිහිටියන්ටම වෙන් වූ ගීත ගායනා කරවීමත් ඊට අනුබල දීමත් තුළින් අනාගතයේ සිදුවන සමාජීය විනාශය ගැන බොහෝදෙනකුට නොතේරේද නැතිනම් නොතේරෙනවා ලෙසින් සිටින්නේද යන්න ප්‍රශ්නයකි.
දක්ෂ දරුවන් ලොවට හඳුන්වාදීමට ඔවුන්ගේ හැකියා ඇගයීමට මුල්වී කටයුතු කරන මාධ්‍යයන් ද මේ ගැන සිතිය යුතු කාලය උදා වී ඇත. මෑත කාලයේ ඉතා ජනප්‍රිය වී ඇති ප්‍රසාංගික සංගීත සංදර්ශන (reality shows) තුළ යම් යම් වෙනස්කම් කිරීම තුළින් සංගීත ලොව තුළ ළමයාගේ ගමන් මග නිවැරදි කළ හැකි බව මගේ විශ්වාසයයි.
සංගීතයෙන් පුද්ගලයකු තුළ සංවේදීභව සහ සංයමය වැනි වටිනා මිනිස් ගුණාංග ගොඩනැගිය හැක.
අප ගීත සමඟ එකතුවන්නේ මව් කිරිබොමින් මවගේ උකුලේ නැලවෙද්දී ය. කුඩා දරුවකුගේ ජිවිතයට ඇතුළු කළ යුතු බොහෝ වැදගත් කරුණු, ඔවදන්, දැනුම සහ සිතුවිලි ළමා ගීත තුළින් කියා දිය හැක. යහපත් දරුවකු නිර්මාණය කිරීමට ළමා ගීත කදිම මෙවලමකි.
Dr. Nadee Dissanayake
Founder/Secretary - CUP
Senior Commissioner
Inland Revenue, Sri Lanka
info@nadeed.org
සබැඳි පුවත් :
පොතපත මිනිසා සම්පූර්ණ කරයි - (ආචාර්ය නදී දිසානායක)
නත්තලට පොඩ්ඩන්ට තෑග්ගක් !
දුවා දරුවන් 'වළාකුළු' අතරට ගෙන යන නදී...! - Kids Song (වීඩියෝ )
ආචාර්ය නදී දිසානායක සමඟ පිළිසඳරක්
