මා ඒ ගැන වැඩි කලබල නොවන්නේ දේශපාලන විහිළු කිසිදා පරණ නොවන බැවිනි.
ඉංග්‍රීසියෙන් දේශපාලනය යනු පොලිටික්ස්ය. එහි මුල් දිවයන්නේ පුරාණ ග්‍රීසියේ නගර හෝ පුරවර හැඳින්වීමට යෙදුණු 'පොලිස්' යන වචනය වෙතය.
උපහාස ලේඛකයෝ 'පොලි-ටික්ස්' යන්න වෙනත් ක්‍රමයකටත් විග්‍රහ කරති. 'පොලි' යනු බොහෝ/ සමූහ (Many) වැනි අරුතක් දෙයි. ටික්ස් යනු ලේ උරා බොන කෘමියෙකි. කිනිතුල්ලා ද ටික්කෙකි. බොහෝ පොලි-ටික්කන් කරන්නේද ජනතාවගේ ලේ උරා බීමය.
තවත් උපහාස ලේඛකයකු ලියා තිබූ ආකාරයට දේශපාලනඥයා (පොලි-ටික්කා) යනු ඩ්‍රුකියුලා කෙනෙකි. එහෙත් ඔහුට උල් දත් නැති අතර, ඒ වෙනුවට උල් අං දෙකක් පිහිටා තිබේ.
ටික්කා සේම පොලිටික්කා ද පරපෝෂිතයෙකි. ඔහු යැපෙන්නේ ඡන්ද දායකයාගෙනි.
ඡන්ද දායකයා ද පොලිටික්කාට නොදෙවැනි අමුතු ජාතියේ සත්වයෙකි. ඡන්දයක් එනතුරු ආණ්ඩුවටත් දේශපාලනඥයන්ටත් බණිමින් සිටින ඔහු, ඡන්දයකදි ඔවුනගෙන් කෙනකුට මනාපය දෙයි. ''ලෝකයේ හොඳම දේශපාලන විහිළු හැමවිටම වැඩි ඡන්දයෙන් තේරීපත් වෙති.'' යනුවෙන් කියුමක් ඇත්තේද එහෙයිනි. එය අසත්‍යයක්ද නොවන්නේ නිතරම වාගේ පාර්ලිමේන්තු තුළින් සුපිරි විහිළු අසන්නට ලැබෙන බැවිනි.
මෑතකදී මුහුණුපොතේ දක්නට ලැබුණු ඡායාරූපයකින් කියැවුණේ සිරි ලංකාවට ද ZOMBIE - සොම්බි නමැති මත්ද්‍රව්‍ය උවදුර ළඟා වී ඇති බවකි. සිරි ලාංකික නගරයකට සමාන පසුතලයක තරුණියක් දෙකට නැවී (ඉණෙන් පහළට) මහත් අපහසුවෙන් මෙන් සිටී. සොම්බි මතට ගොදුරු වන්නන් මෙසේ කොන්ද නමාගෙන සිටිනු දුටු මට සිහිපත් වූයේ නැවත හිස ඔසවන මෙරට දේශපාලන පක්ෂවල රුස්වීම් සඳහා ගොස් සිටින පුද්ගලයන්ය. බැලූ බැල්මට නොපෙනුණත් ඔවුන්ගේ කොඳු නාරටි දෙකට නැමිලාය. සොම්බි මත් රෝගීන් මෙන්ම මළගිය පරාණකාරයන්ට සමානය. සිහි බුද්ධිය නැතිව ගොසිනි.
එසේ සිතන කල, සොම්බි උවදුර සිරි ලංකාවට පැමිණියේ මෑතකදි නොවන බව පෙනී යයි. දේශපාලන මත්ද්‍රව්‍ය සිරි ලාංකිකයාට හුරු වූයේ නිදහස ලැබූ දා සිටමය. නැත්නම් තමන්ගේ ලේ උරා බොන පොලි-ටික්කන් ඉදිරියේ කොඳු නමාගෙන සිටින සොම්බි දායකයන් ලෙස හැසිරෙන්නේ නැත. (සිරි ලංකන්ස් යන යෙදුම සොම්බියන්ස් යනුවෙන් යොදාගැනීමේ වරදක් ද නැත. නිදසුනක්: සොම්බියන් එයාර් ලයින්/ සොම්බියන් ක්‍රිකට් ටීම් යනාදී වශයෙන්.)
කිසිම පක්ෂයකට ඡන්දය නොදී සිටීම බුද්ධිමත්කමේ ලක්ෂණයකැයි සිතන පුරවැසියෝ ද වෙති. එහෙත් එවිට අමනයන් (සොම්බියන්) විසින් පත් කර ගන්නා අමන ආණ්ඩුවක් යටතේ සිටීමට වන බව ඔවුහු අමතක කරති.
රුසියානු විහිළු කතාවක මෙසේ කියැවෙයි.
මැතිවරණ සමයකදි රුසියානුවෙක් ඡන්දය පාවිච්චි කිරීම සඳහා ඡන්ද මධ්‍යස්ථානයකට ගියේය. එහි ඡන්ද පෙට්ටි දෙකක් තිබුණි.
''මගේ ඡන්දය දැමිය යුත්තේ කුමන පෙට්ටියටද? ඇයි මෙතන පෙට්ටි දෙකක්?''
ඡන්ද දායකයා, නිලධාරියකුගෙන් ඇසීය.
''එකක් පුටින්ට.''
''අනික?''
''ඒකත් පුටින්ට.''
''නෑ. මට වෙන පෙට්ටියක් ඕනේ.''
නිලධාරියා, ඔහු වෙනත් කාමරයකට ගෙන ගියේය.
එහි මිනී පෙට්ටියක් දක්නට තිබුණි.
යුක්රේනියානුවන් රුසියානු විරෝධී ත්‍රස්තවාදීන් ලෙස හැඳින්වීම පිළිබඳව පුටින්ට චෝදනාවක් නැගුණි.
එක් විදේශීය මාධ්‍යවේදියෙක් මේ පිළිබඳව ඔහුගෙන් ප්‍රශ්න කළේය.
පුටින් මෙසේ පිළිතුරු දුන්නේය.
''ත්‍රස්තවාදියා කවුදැයි හඳුනා ගැනීම දෙවියන් වහන්සේට බාර කාර්යයක්. මා කරන්නේ සැක කටයුතු පුද්ගලයන් දෙවියන් වෙත යැවීම පමණයි.''
ඇමෙරිකානු පුවත්පතක, උපහාස කොලමේ මෙසේ සඳහන්ව තිබුණි.
''රුසියාවේ මත්ද්‍රව්‍ය ඇත.
සොම්බි නැත.
පුටින් ඇත.''
(කපිල කුමාර කාලිංග)
ප්‍රවීණ සාහිත්‍යවේදී
Kapilakalinga@gmail.com
(උපුටා ගැනීම - deshaya.lk)
