පිය පාර්ශවයෙන් උරුම වූ ජැමෙයිකානු වර්ණය පවුලේ මංගල අවස්ථා වල මල් කුමාරියක් වීමේ අවස්ථා අහිමි කළේය.
ඇහැට කනට නොපෙනීම මා පොතට පතට මෙන්ම ක්‍රීඩාවට නැඹුරු කළ කාරණා වූ අතර ප්‍රැක්ටිස් කළුවට වඩා කළුපාට නිසා ස්කූල් බස්සෙකෙ කොල්ලන් මා හැදින්වූයේ කාල් ලුවිස්ගේ නංගී ලෙසය.
ළමා මනෝවිද්‍යාව හා ධනාත්මක චින්තනය පිළිබඳව එකල ප්‍රසිද්ධ පාසලේ එවකට අලුතින් පත්ව ආ ක්‍රීඩා ගුරුවරයා මගෙ ක්‍රීඩා ගුරුතුමිය නොමැති අවස්ථාවක පුහුණුවීම් අවස්ථාවක මගෙන් මගේ නම විමසා, ''ඒකෙ තේරුම නං මොනරි නේද? දාන්ඩ තිබ්බෙ කපුටි කියලා නෙ'' කියමින් සරදම් කළේ අනෙක් සිසුන්ද ඉදිරි යේය....
එදිනෙන් පසුව කිසිම හේතුවක් නිසා මා පාසල් පුහුණුවීම් නොගිය අතර හේතුවක් නොදක්වා වෙනත් පාසලකට යා යුතු බවට අරගලයක් දියත් කළෙමි.
හේතුව කිසිවෙකුට සොයා ගැනීමට නොහැකිවූ අතර මාසයකට පසුව මගේ ක්‍රීඩා ගුරුතුමියට නොපවසා සිටීමට නොහැකිවූ අතර ඇය මට වෙනත් පාසලකට යාමට උපකාර කරන බවටද, අරුන්දාට හොඳ රිටන් එකක් දෙන බවටද පොරොන්දු කරවාගෙන මා දිරිමත් කළාය..
ඈම පවසන අන්දමට මොන මනෝ විජ්ජාවක්වත් නොදන්නා නමුත් ජාතික තලයේ ක්‍රීඩිකාවක වූ ඈ කුඩා දැරියක වූ මගේ මනස මගේ මවටත් වඩා හොදින් ඒ අවස්ථාවේ කළමනාකරණය නොකරන්නට මට වන විනම්බෑසිය සිතා ගන්නටත් බැරි ය.
ඉදින් මේ ඝර්මකලාපීය දූපතේ කළු හමට විරුද්ධවන්නන්ට රිටන් දීමටත්, ඒවායින් ජිවිතය නොනවත්වා එනයින්ම ආතල් ගැනීමටත් ඈ මට උගැන්වූවාය....
කළු හමට ඇදිය යුත්තේ ලා පැහැති මළානික වර්ණ බව යොවුන්වියේ විලාසිතා ගැන අවබෝධයක් නැති එව්කට මගේ විලාසිතා නිර්මාණ ශිල්පිනිය වූ මව් රැජිනගෙ තෝරාදීම් නිසා විශ්වවිද්‍යාලයට යන තුරුම මා ඇන්දේ පැළැන්දේ අර අවර්ණ වර්ණයන්‍ ය.
විශ්වවිද්‍යාල ජීවිතයේ හමේ පැහැය කිසිදු ලෙසකින් ප්‍රශ්න ගතනොවූ අතර මා එනයින් අවතක්සේරු නොකරන මිනිසුන් අප්‍රමාණ ලෙසින් හමුවීමද ඔවුන්ගේ ආදරය නිතැතින් දිනාගැනීමද මට හැකිවිය....
ඒ ජීවිතය වර්ණවත් කළ බොහෝ ගැහැණුන් මිනිසුන් අදටත් මා අස හිදී ..
ඉතිම් මා ඉතා ප්‍රමෝදයෙනුත් සිනාවෙනුත් පිබිදෙමින් ජීවිතය මගේ විලාසිතාවට අනුව ගෙවමින් පසුවෙමි.....
පාට කළු වුවද වර්ණවත්ව හිදිය යුතු බව මට උගැන්වූයේ මගේ මිතුරෙකි. මා ආදරය කළ මිනිසෙකු මට අහිමිවූයේ මගේ උපන් කැත නිසා යැයි අපහාස කළ ගැහැණුන් දෙදෙනෙකුගෙ වචන දෙක තුනකට හිත රිද්දාගෙන සිටි අවදියකය..
"බලාපන් මංදිහා මං ලස්සන මිනිහෙක් නෙවෙයි. ඒකට ලස්සනට ඇදලා තැනකට බැස්සම මට වඩා පොරක් උඹ දැකලා තියනවද?"
ඉන් පසු මා අන්කවරදාටත් වඩා වර්ණවත් වූයෙමි..හරහට නොව කෙළින් බලන්නට උගත්තෙමි...
ඉදින්,
* Miss world
* Miss universe
* Miss river
ඔය ලෝක සම්මතයයි කියනා ලස්සනෙන් එහා බුද්ධියක්ද හදවතක්ද ඇති බව ප්‍රකට කළ ගැහැණුන් ය. ලංකාවට ලෝකය දුරස් බව ඇත්තය...නමුත් දූපතකට එහා ලෝකයක් අපට ඇත.
(මයුරි පරණමාන)
මයුරි පරණමාන ශ්‍රී ජයජයවර්ධනපුර සරසවියේ දර්ශනය සහ මනෝ විද්‍යාව, පිලිබඳ උපාධිධාරියෙකු වන අතර කැලණිය වි.වි. සමාජ විද්‍යාව සම්බන්ධයෙන් ශාස්ත්‍රපති උපාධිය ලබා ඇත. එසේම විවෘත විශ්ව විද්‍යාලයේ නීතිය පිලබඳ උපාධිය ලබා ඇති ඇය, ශ්‍රේෂ්ඨාධිකරණ නීතිඥවරියක් වන අතර පුද්ගලයන් ලියාපදිංචි කිරීමේ දෙපාර්තමේන්තුවේ සංවර්ධන නිලධාරිනියක් ලෙස සේවය කරයි. මෙම සටහන ඇයගේ මුහුණු පොතෙහි පළකරන ලද්දකි.
