ශාපලත් සාතන්ලාද? ජනතාවගේ පුත්‍රයාද? - (වරුණ රාජපක්ෂ)

අප සුරක්ෂිත වන්නේ, අප ජේසුස් වහන්සේ තදින් අල්ලා සිටින නිසා නොව ඔහු අපව තදින් අල්ලා සිටින නිසාය.

"මේ නත්තල දිලින්දන් සමග සමරන්න , ඔබ එක්වේලක් දිලිදු පවුලක් සමග එකව ලබාගන්න, නත්තල ඔවුන් සමග සමරන්න" කාදිනල් තුමාගේ නත්තල් පනිවිඩය එයයි. සැබැවින්ම එය ජේසු සමිදානෝ නත්තලට දුන් අර්ථය කැටිකර ගත් අපූරු පනිවිඩයකි. එසේ කිරීමෙන් මේ නත්තලේ, ඔබේ දිලිදු සහෝදරයාගේද මෙන්ම ඔබේද සිතට සතුට, සැනසීම උදාවෙනු ඇත.

එහෙත් නත්තල් රැය පහන්ව උදාවන දිනයේ ඔහුගේ කුසගින්න ඔබට නිවා දැමිය නොහැක. එය කලහැක්කේ ආගමෙන් නොව දේශපාලනයෙනි. ඒ වගකීම මේ මොහොතේ පැවරාගෙන ඇත්තේ ජනාධිපතිවරයාය.

පසුගිය නත්තලට පෙර රට තිබුනේ අන්දකාරයේ ගිලී යමිනි. කිසිවෙකු ඒ අන්දකාරය තුලින් ආලෝකය සොයා යන මාවතට ජනතාව රැගෙන යාමට ඉදිරිපත්වූයේ නැත. එහෙත් එක් මිනිසෙක් මා ඔබ අන්දකාරයෙන් ආලෝකයට ගෙන යමියි ඉදිරිපත් විය. ජීසස්ට මෙන් ඔහුටද ගල් මුගුරු විවේචන හැර දිරිදෙන වදනක් හෝ නොවීය. 

එහෙත් පහුගිය නත්තල උදාවන විට සිහින් ආලෝක ධාරවක් රටට පතිත වෙමින් තිබුනි.  

"අන්දකාරයේ සිටි මිනිසුන් ඉමහත් ආලොකයක් දුටුවෝය. ගණදුරු දේශයේ විසූ අය කෙරෙහි එළියක් දැන් බබලන්නේය."
- ශුද්ධවූ බයිබලය

 ආලෝකය කරා යන මග පලල් මගක් නොවේ , පහසු මගක්ද නොවේ, ආලෝකය වෙත ලගාවීමට  ඒ දුෂ්කර මාවත ගෙවා දැමිය යුතුමය.

රනිල් මෙය දැන සිටියේය. බංකොලොත් රටක කිසිවෙකුට සහනයක් , සැනසීමක් නැත. කලහැකි එකමදේ හැකි ඉක්මනින් බංකොලොත්භාවයෙන් නිදහස් වීමය.

බංකොලොත්භාවයේ සිටියදී ලෝකයේ කිසි රටක් පඩි වැඩිකර නැත, විශ්‍රාම වැටුප් වැඩිකර නැත, සුභසාදන සහන වැඩිකර නැත. එය හරියටම පාන්ගෙඩියකින් සහ මාලුකූරීන් දෙදෙනෙකුගෙන් පන්දහසක් මිනිසුන්ගේ කුසපිරවීම හා සමාන ප්‍රාතිහාර්‍යකි. ඔහු එයද කලේය.

එහෙත්
අන්දකාරයේදී, කලහැකි කිසිත් නැතිවූ විට ඔහුව තෝරාගත් අනුගාමිකයන් පවා රළු මගේ රට ගෙනයාමේදී මතුවන අභියෝග හමුවේ ඔහුව හැරයා හැක. ජුදාස් මෙන් ඔහුව පාවාදිය හැක.

එහෙත් ඒ මග හැර වෙනත් මගක්ද නැත.

"පටු දොරටුවෙන් ඇතුල්වෙයල්ලා, මක්නිසාද විනාශයට යන දොරටුව විශාල ය. පාරත් පලල්‍ ය. එයින් ඇතුලුවන්නෝ බොහෝය, මක්නිසාද ජීවනයට යන දොරටුව පටුය, පාරත් අවහිරය. එය හම්බ වන්නේ කීපදෙනෙකුටය."

ජීසස්ගේ මේ කියමනට තව එක වාක්‍යක් එක් කලයුතුය. එනම් ,ඒ මගේ යන්නට ධර්‍යය තිබුනේ එකම එක මිනිසෙකුට පමනි.
ජීසස් මෙන් සියලු දෙනාගේ පාපයන් තමන්වෙත පවරාගෙන නින්දා , අපහාස විදිමින් ඒ මගට ජනතාව කැදවූයේ ඔහු පමනි. ඔහු දෙවියන්ගේ පුත්‍රයා නොවුනද , ඔහුට ජනතාවගේ පුත්‍රයා කියා ඇමතීමේ වරදක් නැත.

මේ නත්තලින් පසු උදාවන්නේ මතිවරණ වසරකි. ලංකාව වැනි රටවලට මැතිවරණ වලට අවශ්‍යවන්නේ හරි මග නොව ජනප්‍රිය මගය. ජනප්‍රිය නොවන හරි තීන්දු නොව ජනප්‍රිය වැරදි තීන්දුය, පොරොන්දු වැසිය. පහසු මාවත්‍ ය. ඒ පොරොන්දු මලු ගෙනෙන සැන්ටලාට  ලදරුවන් මෙන් රැවටී පහසු මාවතේ රූටාගොස් අපායට වැටුනු පසුත් පහසු මාවතම සොයන මිනිසුන්ට අපි මෙසේ කියමු.

ජනප්‍රිය කතා කියන ජනප්‍රිය නායකයන්ව බොහෝදෙනා තදින් වැලද ගන්නා මුත්, දුකේදී ඔබව ආරක්ෂා කලේ  ඔබ තදින් වැලද ගත් තැනත්තන් නොව ඔබ ප්‍රතික්ෂේප කල එහෙත් ඔබව තදින් වැලද ගෙන සිටි මිනිසාය.

 

එනිසා තීරණය ඇත්තේ ඔහුගේ අතේ නොව ඔබේ අතේය. ඔහු දැනටමත් ඔබව බංකොලොත්භාවයෙන් ගලවාගෙන ඇත. ඔබව ගලවාගත් ගැලවුම්කරුද , ශාපලත් සාතන්ලාගේ පොරොන්දු මලුද යන්න ඔබම තීරණය කරන්න .

මේ නත්තල හයහතර නොතේරෙන ඔබේ අසල්වැසියන් සමග ගතකරන්න , ඔවුන්ට සාතන්ලාගෙන් ගැලවීමට සහය වන්න. චැතම් ස්ට්‍රීට් නත්තල් පනිවිඩය එයයි.

(වරුණ රාජපක්ෂ)
දේශපාලන ක්‍රියාකාරික

 *2023.12.24 දින Chatham Street Journal පුවත්පත*
Read More - https://bit.ly/3tlvoAV
Like us on Facebook: https://www.fb.com/ChathamStreetjournal
Subscribe now : https://bit.ly/3H0Kfoc
Website: www.csj.lk
Follow us via WhatsApp: https://bit.ly/csj-wapp