ඉන්දීය විදේශ කටයුතු අමාත්‍ය එස්.ජයශන්කර්ද අග්‍රාමාත්‍යවරයාගේ ස්ථාවරය තහවුරු කරමින් ප්‍රකාශයක් නිකුත් කරන ලදී.
මෙම ප්‍රකාශ මගින් ඉන්දියාව සහ ශ්‍රී ලංකාව අතර 1974 දී අත්සන් කරන ලද ගිවිසුම (India Sri Lanka Maritime Boundary Agreement) අත්සන් කිරීම පිළිබඳව කොංග්‍රස් පක්ෂය මෙන්ම එහි නායිකා ඉන්දිරා ගාන්ධි මෙන්ම තොරතුරු දැන ගැනීමේ පනත යටතේ ලබා ගත්තේ යැයි කියන තොරතුරු මත පදනම්ව 1961 දී පණ්ඩිත් ජවහල්ලාල් නේරු විසින් කච්චතිවු දූපත “කුඩා නොවැදගත් දුපතක් බැවින් අයිතිවාසිකම් කීමට බලාපොරොත්තු නොවන බවට’’ කරන ලද ප්‍රකාශයක් පදනම් කරගෙන මෙම දේශපාලනය බෝම්බය පත්තු කර ඇත.
සිරිමා බණ්ඩාරනායක මැතිණිය සහ ඉන්දිරා ගාන්ධි මැතිණිය අතර අත්සන් කරන ලද ගිවිසුමට දැනට වසර පනහක කාලයක් ගත වී ඇත.
ශ්‍රී ලංකාව සමග ඉන්දියාව මෙම ගිවිසුමට 1974 දී එළැඹෙන්නේ දීර්ඝ කාලීනව පැවැති සාකච්ඡා කිහිපයකට පසුවය. මෙම සාකච්ඡාවල අතීතය 1920 තරම් අතීතයට දිව යන අතර 1966 දී යාපනයේ සි.එස් නවරත්නම් මහතා විසින් ද ඓතිහාසික විශ්ලේෂණයක් ඉදිරිපත් කරන ලදී. 1976 දී තවත් ගිවිසුම් තුනකට එළඹුණු අතර ඒ මගින් සමුද්‍රීය මායිම් සලකුණු කරගත් අතර එක් ගිවිසුමකට මාලදිවයින ද අත්සන් තැබීය.
කච්චතිවූ දූපත
ජයලලිතා මහ ඇමතිවරිය විසින් 2008 වර්ෂයේ දී ද නැවතත් 2011 වර්ෂයේ ද ඉන්දීය ශ්‍රේෂ්ඨාධිකරණය හමුවට ගොස් මෙම ගිවිසුම අහෝසි කිරීම පිළිබඳ කරුණු දැක්වූ තමිල්නාඩු රජය අසාර්ථක විය. සිරිමා බණ්ඩාරනායක මැතිණිය සහ ඉන්දිරා ගාන්ධි මැතිණිය අතර අත්සන් කරන ලද ගිවිසුමට දැනට වසර පනහක කාලයක් ගත වී ඇත.
මේ සියල්ල පිටුපස තිබෙන්නේ ඉදිරියේ පැවැත්වෙන මහ මැතිවරණයයි. ලොව විශාලතම ප්‍රජාතන්ත්‍රවාදි රාජ්‍යයේ මහ මැතිවරණයේදී මිලියන 969 ක් ඡන්දදායකයන් ඡන්දය භාවිත කිරීම ආරම්භ කරනු ඇත්තේ එහි පළවෙනි අදියර පැවැත්වෙන අප්‍රේල් 19 වන දිනය. එම පළමු අදියරට තමිල්නාඩු ප්‍රාන්තයද අයත් වන අතර ලෝක් සභාව තුළ මන්ත්‍රීධුර 39 ක් තමිල්නාඩුවට හිමිවේ.
හින්දු බස කතා නොකරන දකුණු ඉන්දියාවේ තිබෙන ප්‍රාන්ත තුළ වෙනම බලයක් ගොඩනගා ගැනීමට BJP උත්සාහ කරයි.
2019 මහ මැතිවරණයේදී NDA සන්ධානයෙන් තරග කළ භාරතීය ජනතා පක්ෂයට කිසිදු මන්ත්‍රී ධුරයක් තමිල්නාඩු ප්‍රාන්තයේ හිමි නොවූ අතර මෙවර ඔවුන් AIADMK පක්ෂය සමඟ ද සන්ධාන ගත නොවී වෙනම තරග කරයි. හින්දු බස කතා නොකරන දකුණු ඉන්දියාවේ තිබෙන ප්‍රාන්ත තුළ වෙනම බලයක් ගොඩනගා ගැනීමට භාරතීය ජනතා පක්ෂය උත්සාහ කරයි.
බ්‍රිතාන්‍ය අධිරාජ්‍යවාදීන් විසින් යටත් කරගන්නා තුරු කිසිදු අවස්ථාවක දකුණු ඉන්දීය කලාපය උතුරු ඉන්දියාව සමග සම්බන්ධව පැවතියේ නැත. මහාභාරතයක් ගොඩනගන ලද්දේ බ්‍රිතාන්‍ය අධිරාජ්‍යවාදීන් විසිනි. ඉන්දියාවේ වඩාත්ම වේගයෙන් දියුණු වන සියලුම ප්‍රාන්ත ඇත්තේ දකුණු ඉන්දියාවේය.
තම ඡන්ද පදනම වැඩි කර ගැනීම නරේන්ද්‍ර මෝඩී සහ භාරතීය ජනතා පක්ෂයේ ඒකායන පරමාර්ථය වන්නට ඇත.
භාරතීය ජනතා පක්ෂයට අභියෝග කරන INDIA (India National Development Inclusive Alliance ) හි නායකයන් වන රාහුල් ගාන්ධිගේ මවටත් 1974 දී තමිල්නාඩුවේ මහ ඇමැති වූ වර්තමාන මහ ඇමති ස්ටාලින්ගේ පියා වන කරුණානිධිටත් පහරදීම මගින් තම ඡන්ද පදනම වැඩි කර ගැනීම නරේන්ද්‍ර මෝඩී සහ භාරතීය ජනතා පක්ෂයේ ඒකායන පරමාර්ථය වන්නට ඇත.
නමුත් හාස්‍යජනකම තත්වය ලංකාවේ සියලුම දේශපාලන පක්ෂ මේ සම්බන්ධයෙන් දක්වන නිද්‍රාශීලී පිළිවෙත යි. අතීතයේ ඉන්දියානු ව්‍යාප්තවාදය ගැන මෙන්ම වර්තමානයේ ජාතිකවාදය පිළිබඳ කතා කරන සියලුම කොටස් මේ සම්බන්ධයෙන් මුනිවත රකිනු දක්නට ලැබේ.
භාරතීය ජනතා පක්ෂයට පහසු ජයක් ලැබෙනු ඇතැයි යනුවෙන් උපකල්පනය කරන දේශපාලනවිශ්ලේෂකයන් රාශියක් සිටියත් ඉන්දියාවේදී ජනමත සමීක්ෂණ අසාර්ථකවනු බොහෝ ව්‍යවස්ථාවලදී අප දැක ඇත. මෑත දී පැවැති ප්‍රාන්ත පහක මැතිවරණයෙන් අපේක්ෂා කළාට වඩා වැඩි ග්‍රහණයක් භාරතීය ජනතා පක්ෂය ලබා ගත්තද මුළු ඡන්ද සංඛ්‍යාවේ එකතුව ගණනය කළ විට වැඩි ඡන්ද ප්‍රමාණයක් ලබා ගැනීමට කොංග්‍රසය සමත් වී ඇත. (BJP 48133463/ CONG 49077907). එබැවින් අපේක්ෂා කරනවාට වඩා වැඩි තියුණු තරගයක් මහ මැතිවරණයේදී පැවතිය හැකිය.
සටහන :
නීතිඥ රසාංග හරිශ්චන්ද්‍ර
නිදහස් ලේඛක
prasadrharischandra@gmail.com
සබැඳි පුවත් :
කච්චතිවු ලංකාවට දුන්නාට මෝදිට කේන්ති ගිහින්
