මංගල එක්ක අසීරුම තැන සීරුවෙන් හිටගත්ත දවස....

තරුණ ගැහැනු පිරිමි වටකරගෙන ඒ මංගලමය දේශපාලන ව්‍යාපෘතිය මුදාහරින්නේ හරියටම අද වගේ දවසක...  

ආන්න ඒ ව්‍යාපෘතියේ කොටස්කාරයෙක් වෙලා හරියටම අවුරුදු තුනකට කලින් අද වගේ දවසක මංගල එක්ක මාධ්‍ය සාකච්ඡාවේ මමත් වාඩි වෙනවා.

කොච්චර මාධ්‍ය සාකච්ඡාවල වාඩි වෙලා කතා කරල තිබුනත් එදා මංගලගේ දකුණු පසින් වාඩි වෙලා කතා කරද්දි මට චකිතයක් තිබුනා. එදා මම කතා කරේ ලංකාවේ සංහිඳියා ක්‍රියාදාමය සහ අතුරුදහන්වූවන්ගේ පවුල්වලට අහිමි යුක්තිය ගැන.

ඒක මංගලගේ විෂයක්. අතුරුදහන්වූවන් වෙනුවෙන් මව්පෙරමුණ හදාගෙන සටන් කරපු මංගල ළඟ තියාගෙන ඒ විෂය කතා කරන එක තමයි මට අමාරුම වැඩේ වුණේ.

ඊට පස්සේ දෙරණේ සංඛ 360 වැඩසටහනකදි මංගලගෙන් අහනවා ඔයා වාඩි වෙන්නේ තරුණ අය එක්ක වුනාට එයාලා තවම කතා කරන්නේ අතුරුදහන්වූවන් ගැන... නීතියේ ආධිපත්‍ය ගැන... මේවා පරණ තැටිම නේ කියල...

මංගල කියනවා රට අද මේ ඉන්න තැනට පත්වෙලා තියෙන්නෙ පරණ තැටි නිසාම තමයි... ආගම ජාතිය විකුණගෙන අවුරුදු 74ක් තිස්සේ අරන් ගියපු ග්‍රෝත්‍රික යුගය අවසන් කිරීමේ අරමුණෙන් තමයි අපි ඒ ගමන පටන් ගත්තේ කියල.

 

නිකන්ම නිකන් මාධ්‍ය සාකච්ඡාවක් වෙනුවට මංගල ඒක හැම අතින්ම තරුණ වැඩක් කරා. ඒ වැඩෙන් හුඟක් අය කැළඹුණා... මංගල රටේ දේශපාලන සිතියම ආයේ ලියමින් හිටියා...

අසීරුම තැන්වල සීරුවෙන් ඉන්න තරුණ ගැහැනු පිරිමි මංගලට ඕන වුනා...

ඒ නිසාම ඒ මංගලමය ගමන වටේ පුදුම තරම් තරුණ පිරිසක් රට වටෙන් එකතු වෙමින් හිටියා.

මංගල බොහොම සැහැල්ලුවෙන් Freedom Hub එකේ එහා මෙහා යමින් අපි හැමෝටම අර මහත මෘදු මොළොක් අතින් තට්ටු කරමින් ශක්තිය කාන්දු කරා...

හදිසියේම අපිට මංගලගේ අත අත්ඇරුණා...

එහෙම අත් නොහැරෙන්න අද ගොඩක් දේවල් වෙනස් වෙන්න තිබුනා...

මංගල රේන්බෝ එන්ඩ් එකේ ඉඳන් බලන් ඉන්නවා ඇති...

කොහොමවුනත් අපි  ඒ “පරණ තැටි” තවම ගහනවා...

ඒක මංගලමය පොරොන්දුවක්.


(මාධ්‍යවේදිනී, ජයනි අබේසේකර)
 jayaniabeysekara89@gmail.com

(Jayani Abeysekara ගේ ෆේස්බුක් පිටුවෙන් )