ඇමරිකානු ජනාධිපතිවරයාගේ ජාත්‍යන්තර ආක්‍රමණශීලීත්වය පිළිබඳව ලෝක අවධානය යොමුව ඇති මේ දිනවල බොහෝ දෙනෙක් ඊට හාත්පසින්ම වෙනස් තවත් එක් දෙයක් පිළිබඳ කතා කරති. එය ද ඇමරිකා එක්සත් ජනපදය පුරා දිග හැරෙන අපූරු කතාවකි. ඒ මානව සංහතියම සහකම්පනයේ ආලෝකයෙන් පිරී යන ලෝකයට සාමය පතමින් සාම පා ගමනක යෙදෙන බෞද්ධ භික්ෂූන් වහන්සේලා පිරිසක් සමඟ එක්ව සිටින ‘ආලෝකා’ නමින් යුතු අපූරු සුනඛයකුගේ කතාවයි. ඒ අනුව මෙම ‘ආලෝකා’ මිනිස් ශිෂ්ටාචාරයට නව ආලෝකයක් උදා කරන්නකු බව නිසැක ය.
ඇමරිකා එක්සත් ජනපදයේ සාම පා ගමන අරඹන්නට පෙර, මේ බෞද්ධ භික්ෂූන් පිරිස ඉන්දියාවේ දින 100 ක සාම පා ගමනක නිරත වෙමින් සිටිය දී අහම්බෙන් මේ සුනඛයා හමු වී තිබේ. ඔහු කැමැත්තෙන්ම භික්ෂූන් වහන්සේලා පසුපස පැමිණෙන්නට පටන් ගත්තේය. අව්, වැසි, කඳු, පල්ලම්, ගංගා, ඇළ, දොළ කිසිවක් නොසලකමින් ඔහු මේ ගමන ඇවිද ගියේ ය. භික්ෂූන් වහන්සේලා ඔහුට “ආලෝකා” යැයි නම් තැබුවේ මේ අතරතුරදී ය. සිය නළලතේ ස්වාභාවිකව පිහිටි හදවත් හැඩැති සලකුණ නිසා ලොව පුරා බොහෝ දෙනෙකුගේ ආදරය දිනා ගන්නට ආලෝකා සමත් විය.
ඉන්දියාවේ පා ගමන අතරවාරයේ වාහනයකට ගැටුණු ආලෝකා බරපතළ ලෙස තුවාල ලැබූ අතර, ඉක්මනින් සුවපත්වීම සඳහා භික්ෂූන් වහන්සේලා ඔහුව වාහනයක නංවා රැගෙන යන්නට උත්සාහ කළ ද, ඒ සෑම අවස්ථාවකදීම වාහනයෙන් මහ මඟට පැන ඇවිද යන්නට උත්සාහ කළේය. මේ සිදුවීම ද සමාජ මාධ්‍යවල පුළුල්ව ව්‍යාප්ත විය.
ඉන්දියාවේ සාම පා ගමනින් පසු එයට සහභාගී වූ භික්ෂූන් වහන්සේලා ටෙක්සාස් ප්‍රාන්තයේ ෆෝර්ට් වර්ත් හි හුවොං ඩාඕ විපස්සනා භාවනා මධ්‍යස්ථානයේ ආශ්‍රමයට පැමිණියේ ඇමරිකා එක්සත් ජනපදය තුළ සැතපුම් 2,300ක් තරම් දීර්ඝ වූ සාම පා ගමනක් ඇරඹීමේ අපේක්ෂාවෙනි. මෙයට ආසන්න වශයෙන් භික්ෂූන් වහන්සේලා 19 නමක් පමණ සහභාගී වන්නට නියමිතව සිටි අතර, එයට ආලෝකා ද එක් කර ගන්නට භික්ෂූන් වහන්සේලා තීරණය කළහ.
මෙම සාම පා ගමන තරගයක් හෝ උද්ඝෝෂණයක් නොවේ. ශාරීරික විඳදරාගැනීම සහ ආධ්‍යාත්මික අභිප්‍රාය මුසු කළ, ඉතා පැරණි බෞද්ධ පිළිවෙතක් ලෙස මෙය හැඳින්විය හැකිය. එය මනා සිහියෙන් යුතුව ඇවිදීම සහ ලෝකයට අහිංසාව පිරිනැමීමේ උත්සාහයකි.
භික්ෂූන් වහන්සේලා අහිංසාව, දයානුකම්පාව, අවබෝධය සහ මෛත්‍රිය පතුරුවාලීමේ උතුම් අරමුණින් ගමන ආරම්භ කළහ. උන් වහන්සේලාගේ සෑම පියවරක්ම මෙම පණිවිඩය ඉදිරියට ගෙන යයි. උන් වහන්සේලා මහා මාර්ග සහ කුඩා නගර හරහා ගමන් කරන විට, ආලෝකා ඒ අසලින්ම ඇවිද යයි. ඇතැම් විට ඔහු ඉදිරියෙන් ද, ඇතැම් විට භික්ෂූන් වහන්සේලාගේ සිවුරට හේත්තු වී ද ගමන් කරයි. ආහාර පාන සහ කාරුණික වදනින් අමතන පිරිස් අසල මඳක් නැවතී ගිමන් හරින්නට ද ආලෝකා අමතක කරන්නේ නැත.
ආලෝකා සහ මාර්ගයේදී හමුවන මිනිසුන් අතර ඇති සම්බන්ධය අසාමාන්‍ය ය. සමාජ මාධ්‍ය තුළ ආලෝකා මේ වන විට අතිශය ජනප්‍රිය චරිතයක් බවට පත්ව සිටින බැවින්, ඔහුට අතිශය හිතෛශී වන්නෝ දහස් ගණනක් සිටිති. ලෝක සාමයේ පණිවිඩය ආලෝකා තුළින් ආලෝකවත් වන්නේ ඒ අයුරිනි.
ආලෝකා සංකේතවත් කරන්නේ කුමක්ද? ඒ තුළ ඇත්තේ ගැඹුරු අරුතකි. ඔහු නොසැලෙන මිත්‍රත්වය, හවුල් අරමුණ සහ සාමකාමී ස්ථාවරත්වය නියෝජනය කරයි. ඔහු මිනිසුන් සහ සතුන් අතර පරතරය නැති කරමින්, දයානුකම්පාව සහ සංහිඳියාව යනු වචනවලින් පමණක් නොව, ක්‍රියාවෙන් ද සාක්ෂාත් කරගත හැකි බව පෙන්වා දෙයි.
ආලෝකාගේ නළලතේ පිහිටි හදවත් හැඩැති සලකුණ, මෙම මෙහෙයුමේ සංකේතය බවට පත්ව ඇත. සාමය යනු සිතිය යුතු දෙයක් පමණක් නොව, හදවතින් දැනිය යුතු දෙයක් බව එයින් මතක් කර දෙයි.
බෞද්ධ භික්ෂූන් වහන්සේලා සමඟ ආලෝකාගේ ගමන සුවිශේෂී වුවත්, විශ්වාසවන්තකම සහ දීර්ඝ සුනඛ ගමන් පිළිබඳ ඉතිහාසය පුරාම දක්නට ලැබෙන කතා ද මෙහිදී අමතක කළ යුතු නොවේ.
නිදසුනක් ලෙස, ‘බොබී ද වොන්ඩර් ඩෝග්’ (Bobbie the Wonder Dog) යනු අතරමං වීමෙන් පසු නැවත සිය පවුල වෙත යාම සඳහා එක්සත් ජනපදය පුරා සැතපුම් 2,500 කට වඩා වැඩි දුරක් ඇවිද ගිය සුනඛයෙකි. මෙම අසාමාන්‍ය දස්කම සහ ඔහුගේ නොපසුබස්නා උත්සාහය ලොව පුරා අවධානය දිනා ගත්තේය.
තවත් ප්‍රකට කතාවක් වන්නේ, ‘වර්ල්ඩ් වූෆ් ටුවර්’ (World Woof Tour) නමින් හැඳින්වෙන ඔස්කාර් සුනඛයාගේ ගෝලීය ගමනයි. දකුණු අප්‍රිකාවේ සුනඛ රැකවරණ මධ්‍යස්ථානයකින් බේරාගත් ඔස්කාර්, ලොව පුරා අතරමං වූ සතුන් පිළිබඳ අවධානය යොමු කරවීමේ අරමුණින් සිය හිමිකාරිය සමඟ රටවල් 30කට අධික සංඛ්‍යාවක සංචාරය කළේය. චීන මහා ප්‍රාකාරය, අයිෆල් කුළුණ සහ ටජ් මහල් වැනි ලෝක ප්‍රකට ස්ථාන රැසකට ගමන් කරමින් “ලොව වටා ගිය පළමු සුනඛයා” ලෙස විරුදාවලිය ලත් ඔහු, සත්ත්ව සුබසාධනය වෙනුවෙන් විශාල මෙහෙවරක් ඉටු කළේය.
මෙම ගමන් ස්වරූපයෙන් වෙනස් වුවද, ආලෝකාගේ සාම පා ගමන සමඟ ඒවාට පුදුම සමානකමක් ඇත. ඒ, අන් අයව දිරිගැන්වීමට සුනඛයෙකු සතු බලයයි. සුනඛයන් වටා ගෙතී ඇති මේ කතා මිනිස් හදවත් තුළ විශ්වාසවන්තකම, නොපසුබට බව සහ නිහඬ බලය වැනි හැඟීම් ජනිත කරයි.
ජපානයේ හචිකෝ (Hachikō) වැනි විශ්වාසවන්ත සුනඛයන්ගේ කතා, අපගේ ජීවිතයේ වටිනාකම් වන පක්ෂපාතිත්වය සහ බලාපොරොත්තුව මූර්තිමත් කළ හැකි බව ද අපට සිහිපත් කර දෙයි.
භික්ෂූන් වහන්සේලා සහ ආලෝකා සිය ගමන අඛණ්ඩව කරගෙන යන විට, ඔවුන්ගේ ගමන අපට මෙම වටිනා පාඩම මතක් කර දෙයි. ඒ, සාමය යනු ළඟා විය යුතු අවසානයක් නොව, එක පියවරක් බැගින් ගමන් කළ යුතු මාර්ගයක් බවය. වේගයෙන් ගමන් කරන ලෝකයක, භික්ෂූන් වහන්සේලා ඇවිදීම තුළින්ම භාවනාවක්, සන්සුන් බවක් අත්විඳිය හැකි බව සිහිපත් කර දෙයි.
ආලෝකාගේ සෑම පියවරක්ම සියලු සීමා ඉක්මවා ගිය බැඳීමක් පිළිබඳ පණිවිඩයක් අප කරා ළඟා කර දෙයි. ඉන්දියාවේ මහ මඟක අතරමං වූ සුනඛයෙකු, අද මිතුරෙකු සහ ලෝක සාමයේ සංකේතයක් ලෙස පිළිගෙන ඇත.
මේ සාම පා ගමන ප්‍රජාවන්ට, සෑම නැවතුමක්ම සහ සුබ පැතුමක්ම, කාරුණික බව, ඉවසීම සහ එකිනෙකා සමඟ ජීවත් වීම පිළිබඳ මෙනෙහි කිරීමට ලැබෙන වටිනා අවස්ථාවකි.
ආලෝකා භික්ෂූන් වහන්සේලා සමඟ යන මෙම සාම ගමන නිහඬ වුවත් අතිශයින් ගැඹුරු ය. එය අධිෂ්ඨානය, මිත්‍රත්වය සහ ඈතින් පෙනෙන සාමය පිළිබඳ අමරණීය කතාවකි. ඒ අනුව ආලෝකා යනු මනුෂ්‍යත්වයේ උතුම් පරමාදර්ශ ක්‍රියාවෙන් නිරූපණය කරන අති උදාර සත්ත්වයකු ලෙස මේ වන විට ලෝක සම්භාවනාවට ලක් වෙමින් තිබේ.
(සටහන | නිරංජන් චාමින්ද කරුණාතිලක)
hnckcreations@gmail.com
උපුටා ගැනීම -vinivida.lk
