රෝගී තත්ත්වයක් හේතුවෙන් වැලිසර ලය රෝහලේ ප්‍රතිකාර ලබමින් සිටියදී අභාවප්‍රාප්ත වූ සුදාවන්නිලැත්තන් මියයන විට 66 වැනි වියේ පසුවිය.
ඔහු දරුවන් සිව්දෙනෙකුගේ පියෙකි.
තම උරුමය රැකගැනීම වෙනුවෙන් දැඩි උත්සාහයක නිරත වූ රතුගල ආදිවාසී නායකයා 2016 වසරේ ශ්‍රී ලංකා පාර්ලිමේන්තුවට පැමිණ ජනතා නියෝජිතයින් හමුවී සිය වර්ගයාගේ උරුමය සුරක්ෂා කිරීම වෙනුවෙන් හඬ නැගූ අයෙකි.
ආදීවාසී නායකයාගේ අවසන් කටයුතු අද (09) දිවයිනේ සෙසු ප්‍රදේශවල වෙසෙන ආදිවාසී නායකයින් සහ නෑදෑ හිතවතුන් විශාල පිරිසක් සහභාගීතවයෙන් සිදු කිරීමට නියමිතය.
ශ්‍රී ලංකාවේ ආදිවාසී ප්‍රජාව, විශේෂයෙන්ම රතුගල වැදි ජනතාව මරණයකදී අනුගමනය කරන චාරිත්‍ර නූතන සමාජයට වඩා බෙහෙවින් වෙනස්ය.
කෙසේවෙතත් ඔහුගේ අභාවයත් සමඟ, ලෝකයෙන් වැසී ගිය දුර්ලභ ආදිවාසී අවමංගල්‍ය චාරිත්‍ර කිහිපයක් පිළිබඳව මේ වන විට සමාජයේ දැඩි අවධානයක් යොමුව තිබේ.
ස්වභාවධර්මයේ දායාදයෙන් නිමවූ "අවසන් නිවහන"
රතුගල නායකයාගේ දේහය තැන්පත් කර ඇත්තේ වනාන්තරයේ ස්භාවික දායාදයන්ගෙන් නිමවූ සුවිශේෂී පෙට්ටියකය.
එය ආදිවාසී ජනතාව සොබා දහම සමඟ පවත්වන අවියෝජනීය බැඳීමේ සංකේතවත් කරනු ලබයි.
මෙම පෙට්ටිය සැකසීමට පෙට්ටියේ බඳ සකස් කිරීම සඳහා 'බක් මී' සහ 'හික්' යන ශාකවල ශක්තිමත් පොතු භාවිතා කර ඇත.
පෙට්ටියේ කොටස් එකිනෙකට සම්බන්ධ කර ශක්තිමත් කර ඇත්තේ වනාන්තරයෙන් සොයාගත් 'කිරිවැල්' වර්ගයකින් වීමත් විශේෂත්වයකි.
මියගිය පසු නැවතත් සොබා දහමට මුසුවිය යුතුය යන ප්‍රබල මතය මෙම චාරිත්‍රය තුළ සංකේතාත්මකව ගැබ්ව පවතී.
සොහොන සැකසීම
අතීතයේ ආදිවාසීන් ඔවුන්ගේ දේහයන් ගල් ගුහාවල හෝ වනාන්තරවල මිහිදන් කළද, නායකයෙකුගේ මරණයකදී එය ගම්මානය ආශ්‍රිතව ගෞරවාන්විතව සිදු කිරීම විශේෂත්වයකි.
පූජා වත්පිළිවෙත්
මියගිය නායකයා වෙනුවෙන් දඩමස්, මී පැණි සහ කුරක්කන් තලප වැනි සාම්ප්‍රදායික ආහාර පූජා කිරීමේ චාරිත්‍රයක් මෙහිදී අනුගමනය කෙරේ.
ආදිවාසී විශ්වාසයට අනුව මියගිය නායකයා "නෑ යකෙක්" ලෙස නැවත ඉපදී තම පරපුර ආරක්ෂා කිරීමට පැමිණෙන බව ඔවුන්ගේ විශ්වාසය වේ.
මේ වෙනුවෙන් ඉදිරියේදී රතුගල වැදි ජනයා විසින් "කිරි කොරහ" ශාන්තිකර්මය ද පවත්වනු ලබයි.
රතුගල අනන්‍යතාවය
ශ්‍රී ලංකාවේ ආදිවාසී ප්‍රජාව අතර රතුගල ආදිවාසීන් යනු ඉතා සුවිශේෂී සහ තවමත් ස්වභාවධර්මය සමඟ දැඩිව බැඳී සිටින කණ්ඩායමකි.
මොනරාගල දිස්ත්‍රික්කයේ මඩොල්සිම කඳු පන්තියට නුදුරින් පිහිටි රතුගල ගම්මානය කේන්ද්‍ර කරගෙන මොවුන් ජීවත් වේ.
මෙම පිරිස දිවයිනේ සෙසු ආදිවාසී කණ්ඩායම් අතරින් තවමත් තමන්ටම ආවේණික වූ භාෂා රටාවන් සහ වනාන්තරය සමඟ බැඳුණු ජීවන රටාවන් දැඩිව අනුගමනය කරන්නන් වීමත් විශේෂත්වකි.
තම නායකයාගේ අභාවය ඔවුන්ට පුද්ගල මරණයක් පමණක් නොව තම සංස්කෘතික ගමන්මගෙහි සිදුවූ විශාල හිස්තැනක් ලෙස ද සඳහන්.
උපුටා ගැනිම - adaderana.lk
