කෙසේ වෙතත්, වරාය ක්ෂේත්‍රයේ පවතින දැඩි බහාලුම් තදබදය සහ අරමුදල් සපයා ගැනීමේ අභියෝග හේතුවෙන් මෙම අභිලාෂයන් බිඳ වැටීමේ අවදානමක් පවතින බව ආර්ථික හා ක්ෂේත්‍ර විශ්ලේෂකයෝ පෙන්වා දෙති.
කොළඹ පැවැති ශ්‍රී ලංකා - ජර්මානු ව්‍යාපාරික සංසදයේදී ශ්‍රී ලංකා වරාය අධිකාරියේ (SLPA) සභාපති ආචාර්ය පරාක්‍රම දිසානායක ප්‍රකාශ කළේ බහාලුම් පර්යන්ත, සැපයුම් යටිතල පහසුකම් සහ රාජ්‍ය-පෞද්ගලික හවුල්කාරිත්වයන් (PPP) කඩිනම් කිරීමේ දැඩි අවශ්‍යතාවයක් පවතින බවයි. ලෝකයේ ප්‍රමුඛතම වරායවල් 25 අතර පවතින කොළඹ වරාය මේ වන විට එහි උපරිම මෙහෙයුම් ධාරිතාවට ආසන්න වෙමින් පැවතීම මෙයට ප්‍රධානතම හේතුවයි.
දැනට ශ්‍රී ලංකාවේ සමස්ත බහාලුම් හැසිරවීමේ ධාරිතාව විසි අඩි ඒකක (TEUs) මිලියන 10ක් පමණ වන අතර, මේ වසරේ අපේක්ෂිත ඉල්ලුම මිලියන 9.3ක් තරම් ඉහළ අගයක් ගනු ඇතැයි ගණන් බලා ඇත. සාමාන්‍යයෙන් වරායක ධාරිතාව උපයෝගී කරගැනීම 70% ඉක්මවන විට මෙහෙයුම් ප්‍රමාදයන් සහ බාධා (Bottlenecks) ඇතිවන බව ජාත්‍යන්තර මුහුදු ප්‍රවාහන දත්ත පෙන්වා දෙයි. කොළඹ වරාය දැනටමත් 90%කට වඩා වැඩි උපයෝගීතා මට්ටමක පවතින අතර, පසුගිය අප්‍රේල් මාසයේ පමණක් බහාලුම් ප්‍රවාහනය 22%ක කැපී පෙනෙන වර්ධනයක් වාර්තා කර ඇත.
මෙම අධික තදබදය හේතුවෙන් නෞකා ප්‍රමාද වීම් සහ මෙහෙයුම් කාලය දීර්ඝ වීම නිසා කලාපයේ සෙසු තරඟකාරී වරායවල් වෙත ජාත්‍යන්තර නැව් සමාගම් ආකර්ෂණය වීමේ අවදානමක් පවතී.
මෙම අර්බුදයට විසඳුම් ලෙස ලබන වසරේදී නැගෙනහිර බහාලුම් පර්යන්තය (ECT) විවෘත කිරීමට සැලසුම් කර ඇති අතර, එමඟින් කොළඹ වරායේ සමස්ත ධාරිතාව මිලියන 14ක් දක්වා ඉහළ යනු ඇත. මීට අමතරව හම්බන්තොට වරාය මඟින්ද TEUs මිලියන 2ක ධාරිතාවක් එකතු වීමට නියමිතය.
දීර්ඝකාලීන විසඳුමක් ලෙස බහාලුම් මිලියන 11ක ධාරිතාවකින් යුත් 'කොළඹ උතුරු වරාය' (Colombo North Port) ව්‍යාපෘතියේ ශක්‍යතා අධ්‍යයන සිදුවන අතර, ඩොලර් මිලියන 600ක ආයෝජනයකින් යුත් බටහිර බහාලුම් පර්යන්තයේ (WCT) දෙවන අදියර ද සැලසුම් කර ඇත.
කෙසේ වෙතත්, ලෝක බැංකුව සහ ආසියානු සංවර්ධන බැංකුව (ADB) වැනි ජාත්‍යන්තර මූල්‍ය ආයතනවල ආධාර සහ රාජ්‍ය-පෞද්ගලික හවුල්කාරිත්වයන් මත මෙම ව්‍යාපෘති රඳා පවතින බැවින්, පවතින නියාමන ක්‍රියාවලීන් සහ ප්‍රසම්පාදන ප්‍රමාදයන් හේතුවෙන් ව්‍යාපෘති නියමිත වේලාවට නිම කිරීමට නොහැකි වීමේ අවදානමක් පවතී.
යටිතල පහසුකම් සංවර්ධනය කළද, භූ-දේශපාලනික බලපෑම් සහ වරායේ කාර්යක්ෂමතාව මත ජාත්‍යන්තර නැව් සමාගම් ආකර්ෂණය කර ගැනීම ශ්‍රී ලංකාව සතු ප්‍රධානතම අභියෝගය වනු ඇත.
(විශේෂ ලියුම්කරුවකු විසිනි)
